Psalmy 42 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Сыклякирибэ́н Кареескирэ Чхавэ́ндыр.

² Сыр мирга (лань) древа́н камэ́ла пани́, саво́ тхадэ́ла, адя́кэ-паць дро мирэ́ ду́хо (фа́но) исын смэга / труш (жажда) кэ Ту, о Дэ́вла.

³ Миро ду́хо (фа́но) исын дрэ труш (смэгинэла) пал Дэвлэ́стэ Зоралэстэ, Джиибна́скирэ Дэвлэ́стэ: ке́ли мэ джа́ва и сыкадёвава анги́л Дэвлэ́стэ?

⁴ Мирэ́ ясва сыс ма́нгэ сыр хабэ́н дывэ́с и рат, ке́ли ёнэ ракирдэ́ ма́нгэ со дывэ́с: “Кай исын тыро́ Дэвэ́л?”

⁵ Ке́ли мэ пририпирава дава́, тэды мэ пхагирава пэскро ило́: сыр мэ псирдём машки́р бутэ́ манушэ́ндэ, сыр мэ лыджавас лэн кэ Дэвлэ́скиро Кхэр и давас го́дла радыма́тыр и шарибнастыр манушытконэ́ скопостыр, савэ́ свэнкинэнас.

⁶ О миро ди, со́скэ ту тугинэса и издраса дрэ ма́ндэ? Ужакир лачхипэ́н Дэвлэ́стыр; и мэ ява́ва тэ парикира́в Лэ́скэ, Кон зракхця́ ман.

⁷ О, миро Дэ́вла, миро ди исын дрэ ту́га дрэ ма́ндэ; мэ пририпирава пал Ту́тэ Иорданоскирэ пхувья́тыр, Гармоноскирэ вучипнэндыр, Мизароскирэ бэрга́тыр.

⁸ Хорипэ́н прикхарэла хорипэ́н лопотымаса, сыр паня́ пэрэ́на, сарэ́ Тырэ́ валны (вэлны) и панинга́, со кунякирэнапэ, гинэ́ упрэ́ вучэды́р ма́ндыр.

⁹ Рай Дэвэ́л дэ́ла Лэ́скири лачхэ́-илы́ткима дывэсэ́, а раты́ мэ багава гилы́ Лэ́скэ и мэ мангавапэ Дэвлэ́скэ, мирэ́ Джиибнаскирэскэ.

¹⁰ Мэ пхэна́ва Дэвлэ́скэ, мирэ́ Бэргакэ: “Со́скэ Ту бистырдян пал ма́ндэ? Со́скэ мэ псирава и издрава, ке́ли вэ́рго тасавэла ман.

¹¹ Мирэ́ вэ́рги обракирэна ман адя́кэ, со аж мирэ́ кокалы́ пхарадёна, ке́ли ёнэ ракирэ́на ма́нгэ со дывэ́с: “Кай исын тыро́ Дэвэ́л?

¹² [р.с.] Со́скэ ту тугинэса, миро ило́? Со́скэ ту издраса андрэ́ ма́ндэ? Ужакир лачхипэ́н Дэвлэ́стыр, и мэ ява́ва тэ шара́в Лэс, Кон зракхця́ ман.