Psalmy 39 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Идифимоскэ (Едуцыноскэ). Давидо́скиро Пса́лмо.

² Мэ пхэндём: “Мэ ява́ва тэ дыкха́в, со мэ кэра́ва, соб (кай) ма́нгэ тэ на кэра́в грэ́хо мирэ́ чиба́са (чибьяса): мэ ява́ва тэ ракхав миро муй каганцоса (намордникоса), пака фуй ману́ш тэрдо́ анги́л ма́ндэ”.

³ Мэ яцём лало́ (не́мо), мэ сом штыл, мэ аж со́мас штыл пал лачхипэ́н, и миро ду́хо (фа́но) пыя́ буты́р дро конфузо.

⁴ Миро ило́ росхачия дрэ ма́ндэ, ке́ли мэ дыём годы́ пэ́скэ (хор думиндём), захачи́я яг дрэ ма́ндэ, мэ пхэндём мирэ́ чиба́са;

⁵ О, Раё Дэ́вла, пхэн ма́нгэ, ке́ли миро джиибэ́н кончынэлапэ и пал кицы́ дывэса́ мэ мэра́ва. Со исын дасаво: пхэн ма́нгэ, кицы́ бэрша́ ма́нгэ ишчо (инкэ́) тэ джива́в?

⁶ Ѓа́да, фэ́ни пэ буґлыпэ́н мирэ́-вастэскиро Ту дыя́н ма́нгэ дывэса́ тэ джива́в и миро джиибэ́н исын кротко часо, сы́рбы нисо́ анги́л Ту́тэ. Дава́ исын патяибэ́н, со кажно (сва́ко) ману́ш, мэк ёв тэ тэрдёл вучэ́с, исын балвалякиро пхурдыпэн. Сэ́ла.

⁷ Дава́ исын чачо́, со ману́ш псирэ́ла сы́рбы екх зэр (тенё), чачо́, ёв чхурдэлапэ ивья́ (напра́снэс); ёв скэдэ́ла пэ́скэ, а на джинэ́ла, кон залэла дава́.

⁸ А какана́, со ма́нгэ тэ ужакирав, Раё Дэ́вла? Мэ ужакирава лачхипэ́н Ту́тыр.

⁹ Зра́кх ман сарэ́ мирэ́ чорипна́стыр, на домэк, соб (кай) дылыно́ ману́ш тэ обракирэл ман.

¹⁰ Мэ со́мас лало́, мэ на отпхандём миро муй пал-дова́, со Ту адя́кэ кэрдя́н.

¹¹ Лэ ма́ндыр криг дукха́, со Ту чхудя́н пэ ма́ндэ: мэ мэра́ва, сыр Ту марэ́са ман Тырэ́ вастэ́са.

¹² Ту сыклякири и дэ́са кара (хась) и сыкавэса банг манушэнтэ пал лэ́нгиро чорипэ́н, Ту хасякирэса, сыр моль дова́, со ёв камэ́ла; чачо́, кажно ману́ш исын сыр балвалитко пхурдыпэн. Сэ́ла.

¹³ Шун мири́ па́тери (моли́тва), о Раё Дэ́вла, и причху́в кан, со мэ ровава, на яв штыл мирэ́ ясвэндыр, со мэ сом чу́жо ману́ш Ту́кэ, саво́ лодэла, сыр сыс мирэ́ дада́.

¹⁴ [р.с.] Отрискир ма́ндыр Пэ́скирэ стрэ́нга якха́, и мэ ява́ва тэ радынавпэ анги́л, сыр мэ джа́ва криг пэ́скэ и ман на явэ́ла буты́р.