Psalmy 36 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Давидо́скиро Пса́лмо, Ра́скирэ-Дэвлэ́скиро Писха́ри.

² Ке́ли фуй ману́ш кэрэ́ла чорипэ́н, лэ́скиро ило́ сы́рбы ракирэ́ла мирэ́ илэскэ: “На трэй мирэ́ якхэнгэ тэ дарэ́н Дэвлэ́стыр.”

³ Пал-дова́ со ёв шарэла пэс хоханэ́ лавэ́нца, ёв сы́рбы родэ́ла пэ́скиро чорипэ́н, хай, дава́ выкхарэла холы́ дрэ лэ́стэ.

⁴ Лэ́скирэ-москирэ лава́ исын налачхэ́ и хоханэ́; ёв пирияця́ тэ явэ́л годо́ и тэ кэрэ́л лачхипэ́н.

⁵ Ёв придуминэла чорипэ́н, ке́ли ёв исын пашто́ пэ пэ́скиро чхуибэ́н, ёв исын тэрдо́ пэ на́лачхо дром, ёв на ячэ́ла джунгало́ (брыдинэла) чорипна́стыр.

⁶ Раё Дэ́вла! Тыри́ лачхэ́-илы́ткима доджа́ла кэ болыбэ́н, и тыро́ патяибэ́н исын аж кэ о́блоки.

⁷ Тыро́ чачипэ́н-дава́ исын сыр Дэвлэ́скирэ бэ́рги. Ту сэндякирэса чачунэ́с манушэ́н, сыр хор исын мо́рё (дэрья́в). Ту зракхэ́са манушэ́н и мурдалэ́н.

⁸ Сыр дро́го исын Тыри́ лачхэ́-илы́ткима, о Раё Дэ́вла! И манушы́тка чхавэ́ гарадёна дрэ зэр (тень) Тырэ́ пхакэндыр.

⁹ Ту чалякирэса лэн барвалэ́ скаминдэстыр дро Тыро́ кхэр, Ту дэ́са тэ пьен лэ́нгэ рэка́тыр (лэня́тыр) Пэ́скирэ кучонэ́ миштыпна́стыр.

¹⁰ Пал-дова́ со Ту сан Екх, Кон дэ́ла джиибэ́н сарэскэ, Тыро́ дуд дэ́ла дуд амарэ́ джиибнаскэ.

¹¹ Мэк тэ явэ́л бутэды́р Тыри́ латхэ-илы́ткима пэ одолэ́ндэ, савэ́ джинэ́на Тут, мэк тэ явэ́л буты́р Тыро́ чачипэ́н одолэнца, конэ́стэ исын чачипнаскирэ илэ.

¹² На домэк, соб (кай) пхутькирдэ́ мануша́ тэ чхувэ́н пэ́скири ґэро́й пэ ма́ндэ, соб (кай) фуй мануша́ тэ традэ́н ман пэ́скирэ вастэ́нца.

¹³ [р.с.] Дыкхэ́н! Пынэ́ одолэ́, савэ́ кэрэ́на чорипэ́н и на могинэ́на тэ уштэ́н.