Psalmy 35 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. О тэрдёв дро миро рэ́ндо, Раё Дэ́вла, одолэнца, савэ́ чингардэнапэ ма́нца; джа́ марибна́са пэ одолэ́ндэ, савэ́ марэнапэ ма́нца.

² Лэ шчы́то и саструны зброя (латы), ушты́ и яв тэ дэс васт ма́нгэ.

³ Газдэ курта́ла (мечо) и тэрдёв пэ дром одолэ́ндэ, савэ́ традэнапэ пал ма́ндэ. Пхэн мирэ́ дескэ: “Мэ зракха́ва тут.”

⁴ Мэк одолэ́, савэ́ родэ́на миро ди, тэ явэ́н ладжакирдэ́ и тэ на явэ́л паты́в лэ́нгэ. Мэк ёнэ тэ рисён палэ и тэ пэрэ́н екх пэ екхэ́стэ-одолэ́, кон зракирэлапэ проти ма́ндэ.

⁵ Мэк ёнэ тэ явэ́н сыр чхучо́ пхус тэл балва́л, и мэк Ра́скирэ-Дэвлэ́скиро Янго́ло тэ традэ́ла криг лэн.

⁶ Мэк лэ́нгиро дром тэ явэ́л цямло и склизко, и мэк Ра́скирэ-Дэвлэ́скиро Янго́ло тэ явэ́л тэ традэлпэ пал лэ́ндэ.

⁷ А ко́ли ёнэ гарадэ́ лэ́нгири фэлы́ пэ ма́ндэ дрэ ґанби́н, сави́ ёнэ выґанадэ ни палсо́,

⁸ мэк тэ явэ́л хасибэ́н пэ кадасавэ́ манушэ́стэ, соб (кай) ёв тэ на джинэ́л и мэк дая́ фэлы́ тэ ухтылэл лэс кокорэс, со ёв гарадя; мэк ёв тэ пэрэ́л пэ хасибэ́н.

⁹ И миро ди явэ́ла обрадындло Ра́стыр-Дэвлэ́стыр. Миро ди явэ́ла тэ радынэ́лпэ Ра́стыр-Дэвлэ́стыр, Саво́ зракхця́ ман.

¹⁰ Сарэ́ мирэ́ кокалы́ сы́рбы пхэнэ́на кхэтанэ́ ма́нца: “Раё Дэ́вла, кон жа исын дасаво, саво́ подджа́ла пэ Ту́тэ. Ту зракхэ́са бизорья́кирэ манушэ́с одолэ́стыр, кон исын зоралэды́р лэ́стыр; Ту зракхэ́са одолэ́с, саво́ хала́ дукха́ и савэ́с тасавэна; кодолэ́с, саво́ исын дрэ трэ́бима одолэ́стыр, кон чорэла лэ́стыр.”

¹¹ Начачунэ якхи́тка (свидетели) ґаздэ́на проти ма́ндэ, ёнэ допхучэна ма́ндыр пал дова́, со мэ на джино́м (на джина́в).

¹² Ёнэ отдэна палэ чорипнаса пал миро лачхипэ́н; ёнэ янэ́на калыпэ́н мирэ́ дескэ.

¹³ Нэ ке́ли ёнэ сыс насвалэ, мэ со́мас уридо́ дро дзарано гоно́ праскаса (пеплоса); мэ тэлякирдём пэ́скиро ди постоса и миро мангипэ́н Дэвлэ́скэ рисия́ кэ миро ило́.

¹⁴ Мэ лыджиём пэс сы́рбы дава́ сыс миро дру́го (мал) ци миро пшал, мэ со́мас сыр ману́ш, саво́ ровэла пал датэ; Мэ бандякирдём шэро́ сыр одова́, кон ровэлас пал датэ.

¹⁵ Нэ ке́ли мэ лангандыём, ёнэ обрадынлэпэ и скэдынэ́пэ кхэтанэ́: холямэ́ плёткарья скэдынэ́пэ пэ ма́ндэ. Мэ на джино́м, со́скэ ёнэ пхалькирэнас (понижынэнас) ман и на пириячэнас.

¹⁶ Ёнэ скрежынэнас дандэнца пэ ма́ндэ кхэтанэ́ одолэнца, савэ́ са́нас холямэс ма́ндыр.

¹⁷ О, Раё Дэ́вла! Сыр ґара́ Ту явэ́са тэ на дыкхэ́с пэ дава́? Зра́кх миро ди хасибнастыр лэ́нгирэ вастэ́ндыр, миро екхоро диёро шчэрэндыр (левэндыр).

¹⁸ Мэ ява́ва тэ парикира́в Ту́кэ пэ баро́ скэдыибэ́н, мэ ява́ва тэ шара́в Тут анги́л бутэ́ манушэ́ндэ.

¹⁹ Мэк мирэ́ вэ́рги тэ на радынэ́нпэ холя́са ма́ндыр, ке́ли исын намишто ма́нгэ, мэк одолэ́, савэ́ бидыкхэна ман, тэ на марэ́н якхаса пэ ма́ндэ.

²⁰ Ёнэ на ракирэ́на, сыр лэ́нгэ трэй рама́нё; нэ ёнэ придуминэна хоханэ́ лава́ пэ одолэ́ндэ, савэ́ дживэ́на штылэ́с пэ дая́ пхув.

²¹ Ёнэ роспутравэна буґлэс пэ́скирэ муя́ пэ ма́ндэ, и ракирэ́на: “Ѓа́да, ґа́да! Амарэ́ якха́ дыкхнэ́ дава́.”

²² Ту дыкхця́н дава́, Раё Дэ́вла. На яв штыл, Раё Дэ́вла, на дурьёв ма́ндыр.

²³ Джангадёв и ушты́ Кокоро́ тэ затэрдёс пэ миро сэ́ндо пал миро рэ́ндо, миро Дэ́вла и миро Рай Дэвэ́л.

²⁴ Сэндя́кир ман пир Тыро́ чачипэ́н, и на домэк, соб (кай) ёнэ тэ радынэ́нпэ холя́са ма́ндыр, ке́ли исын намишто ма́нгэ.

²⁵ Мэк ёнэ тэ на ракирэ́н дро пэ́скиро ило́: “Гада! Лэ́скиро исын амаро́.” Мэк ёнэ тэ на ракирэ́н: “Амэ проглытындям (накхадям) лэс.”

²⁶ Мэк ёнэ тэ явэ́н ладжакирдэ́ и тэ пэрэ́н екх пэ екхэ́стэ-одолэ́, савэ́ радынэ́напэ чорипна́стыр; мэк тэ урьен ёнэ пэ пэ́стэ ладж и бипатыв, кон ґаздэ́ла пэс шарибнаса пэ ма́ндэ.

²⁷ Мэк тэ радынэ́нпэ зоралэ́с и тэ явэ́н весе́ла (лошалэ́) одолэ́, савэ́ древа́н мангэна, соб (кай) мэ тэ явав бибангипнаскиро, мэк ёнэ тэ ракирэ́н ўса́ды (сак): “Мэк тэ явэ́л ґаздыно́ шарибэ́н Ра́скэ-Дэвлэ́скэ, Саво́ жычынэла кучипэ́н Пэ́скирэ писхари́скэ.”

²⁸ И мири́ чиб явэ́ла тэ ракирал пал Тыро́ чачипэ́н, и явэ́ла тэ шарэл Тут со дывэ́с.