Psalmy 34 - Библия - Пэ Балтитко Романи чиб (Романэс) 2019

¹ Давидо́скиро Пса́лмо, ке́ли Ёв парудя пэс пэ бигодякирэ Манушэ́стэ анги́л Авимелехостэ, саво́ традыя́ лэс криг и Дави́до гия́ пэ́скэ.

² Мэ ява́ва тэ славинав, тэ парикира́в Ра́скэ-Дэвлэ́скэ саро́ часо, мэ ява́ва ўса́ды/сак (усегда) тэ шара́в Лэс мирэ́ уштэ́нца.

³ Миро ди явэ́ла тэ шарэлпэ Ра́са-Дэвлэ́са. Мануша́, савэ́ ха́на мэ́ньки, шунэ́на пал дава́ и явэ́на тэ радынэ́нпэ.

⁴ Шарэ́н и славинэ́н Рас-Дэвлэ́с ма́нца, ява́са кхэтанэ́ тэ барьякирас Лэ́скиро лав.

⁵ Мэ мангдёмпэ Ра́скэ-Дэвлэ́скэ и Ёв отпхэндя́ ма́нгэ, и Ёв зракхця́ ман мирэ́ трашаибнэндыр.

⁶ Ёнэ, савэ́ страдындлэ, дыкхнэ́ пэ Лэ́стэ и ёнэ зяиндлэ радыма́тыр, и лэ́нгирэ муя́ на сыс ладжакирдэ́.

⁷ Чороро́ ману́ш кхардя́ Лэс и Рай Дэвэ́л шундя́, и зракхця́ лэс сарэ́ лэ́скирэ пхарипнэндыр.

⁸ Лэ́скиро Янго́ло обджала трусця́л и ракхэ́ла сарэ́н, конэ́стэ исын трашаибэ́н анги́л Растэ-Дэвлэ́стэ и зракхэ́ла лэн.

⁹ Шунэ́н, соб (кай) тэ уджинэ́н, сыр Рай Дэвэ́л исын лачхо́; тэ явэ́л бахтякирдо́ адава́ ману́ш, кон гарадёла пал Лэ́стэ.

¹⁰ О, тумэ́ свэ́нта, мэк тэ явэ́л трашаибэ́н тумэ́ндэ анги́л Растэ-Дэвлэ́стэ, пал-дова́ со одолэ́ндэ, савэ́ндэ исын трашаибэ́н анги́л Лэ́стэ, на явэ́ла трэ́бима ни дро со.

¹¹ Тэрнэ́ шчэрорэндэ (левицэндэ) исын трэ́бима и ёнэ ха́на мэ́ньки бокха́тыр, нэ одолэ́ манушэ́ндэ, савэ́ гарадёна пал Растэ-Дэвлэ́стэ, на явэ́ла трэ́бима ни дро со.

¹² Явэ́н, мирэ́ чхавалэ, шунэ́н ман. Мэ сыклякирава тумэн пал дова́, соб (кай) тэ явэ́л дасаво трашаибэ́н анги́л Растэ-Дэвлэ́стэ.

¹³ Конэ́скэ исын дро́го джиибэ́н и конэ́скэ исын дро́го тэ дыкхэ́л лачхэ́ дывэса́?

¹⁴ То обрикирэс пэ́скири чиб фуе́ лавэ́ндыр и пэ́скирэ ушта́ хоханэ́ лавэ́ндыр;

¹⁵ ракх пэс тэ кэрэ́с фуипэ́н, кэр лачхипэ́н; ро́дэ рама́нё (миро) и прилэ́ зор тэ латхэс Лэс.

¹⁶ Ра́скирэ-Дэвлэ́скирэ якха́ дыкхэ́на пал чачипнаскирэ манушэ́ндэ, и лэ́скиро кан исын отпхандло, сыр ёнэ дэ́на го́дла кэ Ёв.

¹⁷ Рай Дэвэ́л отрискирэла Пэ́скиро муй одолэ́ндыр, кон кэрэ́ла чорипэ́н, соб (кай) тэ отчингирэлпэ рипирибэ́н пал лэ́ндэ пхувья́тыр.

¹⁸ Патяибнаскирэ мануша́ кхарэ́на Рас-Дэвлэ́с и Ёв шунэ́ла, И Ёв зракхэ́ла лэн сарэ́ лэ́нгирэ пхарипнастыр.

¹⁹ Рай Дэвэ́л исын пашы́л одолэ́ндэ, савэ́ндэ исын пхаро́ пэ ило́, и Ёв зракхэ́ла одолэ́н, кон дандырэла пэ́скиро ило́ пал грэ́хо.

²⁰ Чачипнаскирэ мануша́ страдынэна бут, нэ Рай Дэвэ́л помогинэла лэ́нгэ дро саро́ дава́.

²¹ Ёв ракхэ́ла сарэ́ лэ́скирэ кока́лы, ние́кх лэ́ндыр исын на пхагно.

²² Фуипэ́н мулякирэ́ла фуе́ манушэ́н, и одолэ́, савэ́ бидыкхэна чачипнаскирэн, пэрэ́на тэл ка́ра.

²³ [р.с.] Рай Дэвэ́л зракхэ́ла лэ́скирэ-дынарьенгирэ дия́ и одолэ́, савэ́ гарадёна пал Лэ́стэ, на явэ́на бангэ́.