Psalmy 32 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. Сыклякирибэ́н. Бахтало́ исын кодова́ ману́ш, савэскиро чорипэ́н исын примангло, конэ́скиро грэ́хо исын отмэкно.

² Бахтало́ исын ману́ш, конэ́скэ Рай Дэвэ́л на загинэла лэ́скиро фуипэ́н, конэ́стэ нанэ хараныпэ́н (жэ́лучо) пэ ило́.

³ Ке́ли мэ со́мас штыл пал мирэ́ грэ́хи, мирэ́ кокалы́ вышутинэ пир миро роибэ́н гонденца и длэнгонэ годлэнца саро́ дывэ́с.

⁴ Со дывэ́с и рат Тыро́ васт пэкавэлас пхарэ́с ман: миро клёко (энергия) пирикэрдяпэ дро шукипэн сы́рбы дро хачкирдо лынай. Сэ́ла.

⁵ Мэ приґалыём пэ́скиро грэ́хо анги́л Ту́тэ, и Мэ на гарадём пэ́скиро чорипэ́н Ту́тыр. Мэ пхэндём: “Мэ ява́ва тэ приґалёвавпэ анги́л Растэ-Дэвлэ́стэ; ке́ли мэ пхагирава Лэ́скиро Зако́но”, и Ту отмэкэса мирэ́-грэхоскиро чорипэ́н. Сэ́ла.

⁶ Палдава́ кажно дэвлы́тко ману́ш явэ́ла тэ мангэ́лпэ Ту́кэ дро часо, ке́ли ёв сашты́ тэ латхэл Тут; чачо́, сыр барэ́ паня́ росчхувэнапэ, ёнэ на доджана кэ дасаво ману́ш.

⁷ Ту сан Штэ́то тэ гарадёвав ваш ма́нгэ: Ту приракхэса ман пхарипнастыр; Ту обджаса трусця́л ма́ндэ радымакирэ гиленца, со Ту зракхця́н Ман.

⁸ Мэ, Рай Дэвэ́л, ява́ва тэ сыклякирав тут чачипнаскэ и сыкава́ва дром, савэ́са трэй ту́кэ тэ джас. Мэ да́ва годыпэ́н ту́кэ, Мири́ якх явэ́ла пэ ту́тэ.

⁹ На яв сыр грай, ци сыр лошако, со лэ́ндэ нанэ “галыибэн, со лэн трэй тэ дэн андрэ́ цугле́нца и савари́са, соб (кай) ёнэ тэ подэнпэ Ту́кэ.

¹⁰ Фуй ману́ш бут мо́лы пэрэ́ла духо́са, нэ кодова́, Саво́ зоралэ́с патя́ла дрэ Растэ-Дэвлэ́стэ, Рай Дэвэ́л облэла лачхэ́-илыткимаса.

¹¹ Явэ́н весе́ла (лошалэ́) дрэ Растэ-Дэвлэ́стэ и зоралэ́с радынэ́нпэ, тумэ́, савэ́ сан чачипнаскирэ, и сарэ́, кон исын чачуно́ илэ́са, радынэ́нпэ зоралэ́с.