Psalmy 30 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. Гилы́, ке́ли багандлэ, сыр Свэнцындлэ Давидо́скиро Кхэр.

² Мэ ява́ва тэ шара́в Тут, о Раё Дэ́вла; пал-дова́ со Ту ґаздыян ман и на дыя́н во́ля мирэ́ намалэнгэ тэ радынэ́нпэ холя́са ма́ндыр.

³ О Раё Дэ́вла, Дэвэ́л миро, мэ да́ва го́дла кэ Ту тэ помогинэс, и Ту састякирдян ман.

⁴ О Раё Дэ́вла, Ту вылыджиян миро ди люностыр (адостыр) и Ту зракхця́н миро джиибэ́н, соб (кай) мэ тэ на джав дрэ маґила.

⁵ Бага́н шарибнытка гиля́ Ра́скэ-Дэвлэ́скэ, о, тумэ́ сарэ́ Лэ́скирэ мануша́, и парикирэ́н Лэ́скэ, и рипирэ́н лэ́скиро Свэ́нто Лачхипэ́н.

⁶ Пал-дова́, со Лэ́скири холы́ исын фэ́ни (то́ка) пэ мэнта (минута), а Лэ́скири ла́ска исын пэ саро́ джиибэ́н. Ясва сашты́ тэ явэ́н бэльвэле́, а злокоса (ранкоса) явэ́ла ра́дыма.

⁷ Мэ пхэндём пэ́скэ дро мишто́ джиибэ́н: “Мэ ние́кхвар на пэрава.”

⁸ Раё Дэ́вла, Ту Пэ́скирэ ласкатыр чхудя́н ман, сыр зоралыпнаскири бэ́рга тэ тэрдёвав; нэ Ту гарадыян ма́ндыр и мэ страхадыём.

⁹ Мэ дыём го́дла кэ Ту, о Раё Дэ́вла, тэ помогинэс и мэ ява́ва тэ мангавпэ Ра́скэ-Дэвлскэ.

¹⁰ Саво́ лачхипэ́н, ко́ли мэ мэра́ва, ке́ли мэ джа́ва дрэ маґила? Ци явэ́ла пра́хо тэ шарэл тут? Ци явэ́ла муло́ тэ ракирэ́л пир саро́ пал Тыро́ чачипэ́н?

¹¹ Шун, о Раё Дэ́вла, сыка́в Пэ́скири ла́ска. О, Раё Дэ́вла, подэ Пэ́скиро васт тэ зракхэс ман.

¹² Ту парудян миро ровибэн дро кхэлыбэн ваш ма́нгэ; Ту злыян миро жалобно балытко гоно́ (вретишчо) праскаса (пеплоса) и Ту уридян ман адя́кэ, со радынэла ман,

¹³ [р.с.] соб (кай) мэ тэ шара́в Тут сарэ́ илэ́стыр и тэ на явав штыл. Раё Дэ́вла, миро Дэвэ́л, мэ ява́ва тэ парикира́в Ту́кэ пэ сарэ́ ве́ки.