Psalmy 29 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. Шарэ́н Рас-Дэвлэ́с, тумэ́, болыбны́тка зорья, шарэ́н Рас-Дэвлэ́с пал Лэ́скири сла́ва и зоралыпэ́н;

² Шарэ́н Рас-Дэвлэ́с пал Лэ́скиро славу́тно лав. Поклонинэнпэ (кэрэ́н шэрэ́са) патыва́са Ра́скэ-Дэвлэ́скэ дро Лэ́скиро мангипны́тко шукарипэ́н.

³ Ра́скирэ-Дэвлэ́скири зан исын упра́л пэ паня́; Славу́тно Дэвэ́л грукинэла; Рай Дэвэ́л исын упра́л пэ вучэ́ паня́.

⁴ Ра́скирэ-Дэвлэ́скири зан исын зоралыпнаскири, Ра́скирэ-Дэвлэ́скири зан исын райканы.

⁵ Ра́скирэ-Дэвлэ́скири зан пхагирэ́ла кедры; чачо́, Рай Дэвэ́л пхагирэ́ла Ливаноскирэ кедры.

⁶ И Ёв зачхувэла лэн тэ ухтэн сыр целянтос, Лива́но и Сирионо сыр тэрнэ́ гуруво́рэс.

⁷ Ра́скирэ-Дэвлэ́скири зан роскэрэла блискавица яга́са.

⁸ Ра́скирэ-Дэвлэ́скири зан тринскирэла чхучи́ пхув; Рай Дэвэ́л триинскирэла чхучи́ пхув Кадэсоскири.

⁹ Ра́скирэ-Дэвлэ́скири зан зачхувэла миргэн (сернэн) тэ янэ́н тыкниньконэн, и вэша́ тэ чхурдэ́н тэлэ́ патря́ (ли́сты) и саро́ дро лэ́скиро штэ́то дро Болыбна́скиро Раё ракирэ́ла: “Сла́ва!”

¹⁰ Рай Дэвэ́л исын бэшто́ упра́л пэ тасадыпнаскиро панинг; чачо́, Рай Дэвэ́л исын бэшто́ сыр Кра́ли пэ сарэ́ ве́ки.

¹¹ Рай Дэвэ́л дэ́ла зор Пэ́скирэ манушэ́нгэ; Рай Дэвэ́л бахтякирэ́ла Пэ́скирэ манушэ́н раманёса (миро́са).