Psalmy 27 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. Рай Дэвэ́л исын миро дуд (свэ́то) и Ёв зракхэ́ла ман; конэ́стыр ма́нгэ тэ страхадёвав? Рай Дэвэ́л приракхэла ман Лэ́скирэ зоралыпнаса; конэ́стыр мэ тэ дарав?

² Ке́ли чорэ́ мануша́, мирэ́ вэ́рги и мирэ́ намала явэ́на пэ ма́ндэ тэ роскошэн мирэ́ маса́, ёнэ обштавэнапэ и пэрэ́на.

³ Ко́ли халадэ́ обджана трусця́л проти ма́ндэ, миро ило́ на страхадёла; ко́ли марибэ́н ґаздэ́лапэ пэ ма́ндэ, мэ усае́кх ява́ва тэ ужакирав лачхипэ́н Ра́стыр-Дэвлэ́стыр.

⁴ Мэ родавас тэ пхучав Ра́стыр-Дэвлэ́стыр пал екх бахт, соб (кай) мэ тэ бэшав дро Ра́скирэ-Дэвлэ́скиро Кхэр пэ ада́кицы, кицы́ мэ ява́ва тэ джива́в, тэ дыкха́в Ра́скирэ–Дэвлэ́скири шук, и тэ мангавпэ дро Лэ́скиро Кхэр.

⁵ Дрэ пхарэ́ дывэса́ Ёв гаравэла ман дро Пэ́скиро Штэ́то, Ёв гаравэла ман дрэ Пэ́скири гарады Ша́тра; Ёв ґаздэ́ла ман пэ бэ́рга.

⁶ И какана́ миро шэро́ явэ́ла ґаздыно́ вучэды́р мирэ́ вэргэ́ндыр, одолэ́н, савэ́ исын трусця́л ма́ндэ, Мэ ява́ва тэ янав свэ́нта дыибэна́ радыма́тыр дрэ Лэ́скири Шатра. Мэ ява́ва тэ бага́в и мэ ява́ва тэ бага́в марибны́тко гилы́ Ра́скэ-Дэвлэ́скэ.

⁷ Шун, Раё Дэ́вла, ке́ли мэ кхара́ва Тут зоралэ́ заня́са, тангинэ ман и отпхэн ма́нгэ.

⁸ Миро ило́ пхэндя́ ма́нгэ: “Рисёв и поклонинпэ патыва́са (кэр шэрэ́са патыва́са) Ма́нгэ.” Мэ рисёва́ва тэ родав Тыро́ муй, Раё Дэ́вла.”

⁹ На гарадёв, ма́ндыр; на традэ пэ́стыр Тырэ́ писхари́с дрэ холы́. Ту помогиндян ма́нгэ! На ячкир ман и на мэк ман, Дэ́вла, Саво́ зракхэ́ла ман.

¹⁰ Ке́ли миро дад и мири́ дай мэкэ́на ман, усае́кх Рай Дэвэ́л прилэ́ла ман.

¹¹ Сыкля́кир ман, О Раё Дэ́вла, тэ джав Тырэ́ дромэ́са и лы́джа ман чачипнаскирэ дромэ́са, пал-дова́ со бут вэ́рги дыкхэ́на цямкэс пал ма́ндэ.

¹² На ячкир ман пэ мирэ́-вэргэнгири во́ля: пал-дова́ со хоханэ́ якхи́тка уштынэ́ проти ма́ндэ и одова́, кон пхурдэла хоханэ́ холя́са пэ ма́ндэ.

¹³ Нэ мэ патя́ва, со мэ дыкха́ва Ра́скирэ-Дэвлэ́скиро лачхипэ́н дро дава́ джиибэ́н.

¹⁴ Рикирэ́н наде́я пэ Растэ-Дэвлэ́стэ, явэ́н муршканэ́ и Ёв зорьякирэла Тумаро ило́; чачо́, рикирэ́н наде́я пэ Растэ-Дэвлэ́стэ.