Psalmy 26 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. Приґалёв миро набангипэн пэ сэ́ндо, Раё Дэ́вла, пал-дова́ со мэ лыджиём лачхо́ джиибэ́н, мэ адя́кэ-паць патяндыём дрэ Растэ-Дэвлэ́стэ и мэ на обштававаспэ.

² Пропатякир ман, о Раё Дэ́вла, и спробин ман, жужакир мири́ годы́ и миро ило́.

³ Пал-дова́ со Тыри́ лачхэ́-илы́ткима исын анги́л мирэ́ якха́. И мэ дживдём пир Тыро́ чачипэ́н.

⁴ Мэ на со́мас бэшто́ хоханэ́ манушэ́нца, и мэ на со́мас кхэтанэ́ дуемуенгирэнца.

⁵ Ма́нгэ сыс на пир ило́, кай скэдэ́напэ фуй мануша́, и мэ на со́мас бэшто́ кхэтанэ́ фуе́ манушэ́нца.

⁶ Мэ выморава васта́ тэ сыкавав, со мэ на сом банго́, соб (кай) ма́нгэ тэ обджал трусця́л Тыро́ алта́рё, о Раё Дэ́вла,

⁷ тэ парикира́в зоралэ́с Ту́кэ и тэ пхэна́в пал Тырэ́ ди́вна бутя́.

⁸ О, Раё Дэ́вла, ма́нгэ яця́ пир ило́ гожыпэн, кай Ту дживэса и штэ́то, кай Тыри́ сла́ва исын.

⁹ На хасякир миро ди кхэтанэ́ грэхитконэ́ манушэ́нца, ци миро джиибэ́н кхэтанэ́ одолэнца, савэ́ прочхувэна манушэ́нгиро рат,

¹⁰ конэскирэ васта́ кэрдэ́ биды, и дро конэ́скиро чачо́ васт исын бут мыты.

¹¹ Нэ мэ ява́ва тэ лыджав джиибэ́н; зра́кх ман и тангинэ ман.

¹² Мири́ ґэро́й исын тэрды пэ во́рто (роўно) штэ́то, мэ ява́ва тэ славинав и тэ парикира́в Ра́скэ-Дэвлэ́скэ, кай мануша́ скэдэ́напэ тэ мангэ́нпэ Дэвлэ́скэ.