Psalmy 24 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. Сари́ пхув исын Дэвлэ́скири и саро́, со исын дро свэ́то, исын Лэ́скиро, и сарэ́, кон дживэ́ла пэ дава́ свэ́то (лот).

² Пал-дова́ со Ёв чхудя́ пхувья́киро фунда́менто, пэ хор мо́ри (дэрьява́) и чхудя́ дава́-паць пэ паня́.

³ Кон сашты́ тэ джал упрэ́ пэ Ра́скирэ-Дэвлэ́скиро вучипэ́н? Кон сашты́ тэ тэрдёл пэ Лэ́скиро свэ́нто штэ́то?

⁴ Кодова́, конэ́стэ васта́ исын жужэ́ (чыста), конэ́стэ исын лачхо́ ило́. Кон на совлахадя́ пэ́скирэ илэ́са ивья́, и кон на совлахадя́ хоханэ́с.

⁵ Кодова́ дорэсэ́ла бахтякирибэ́н Ра́стыр-Дэвлэ́стыр и чачипэ́н Дэвлэ́стыр, Саво́ зракхэ́ла.

⁶ Дава́ исын одолэ́ мануша́, савэ́ родэ́на Лэс, дава́ исын Яково́скиро ро́до, кон родэ́ла Тыро́ муй. Сэ́ла.

⁷ Псиравэн (откэрэн) буґлэс по́рты тэ явэ́н ґаздынэ́ ґаратунэ́ вудара́ дро Кхангири́. Славу́тно Кра́ли заджа́ла дрэ лэ́ндэ.

⁸ Кон исын Болыбна́скиро Кра́ли? Рай Дэвэ́л, Саво́ исын зорало́ и дро зоралыпэ́н? Рай Дэвэ́л исын зоралыпнаскиро кэ мэрибэ́н!

⁹ Псиравэн буґлэс по́рты! И тэ явэ́н ґаздынэ́ вудара́ дро ве́чно джиибэ́н! Болыбна́скиро Кра́ли заджа́ла дрэ лэ́ндэ.

¹⁰ Кон исын Болыбна́скиро Кра́ли? Рай Дэвэ́л, Саво́ исын пэ болыбна́скирэ Янголэндэ, Ёв исын Болыбна́скиро Кра́ли. Сэ́ла.