Psalmy 22 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Пэ зло́ко (ра́нко), анги́л, сыр Дывэсёла. Давидо́скиро Пса́лмо.

² Миро Дэ́вла, Мро Дэвлалэ! Со́скэ Ту мэкцян ман, со́скэ Ту сан дура́л тэ дэс васт ма́нгэ, ке́ли Мэ да́ва ґондя́ (ўздыхинава) пхарипнастыр.

³ О, Миро Дэ́вла! Мэ да́ва го́дла дывэсэ́, нэ Ту на отпхэндян ма́нгэ, и раты́ – нанэ спокоё ма́нгэ.

⁴ Нэ Ту сан Свэ́нто, Ту сан бэшто́ пэ Израилёскиро троно сыр Кра́ли.

⁵ Амарэ́ дада́ патяндынэ́ дрэ Ту́тэ; ёнэ патяндынэ́ и Ту зракхця́н лэн.

⁶ Ёнэ дынэ́ го́дла кэ Ту тэ помогинэс, и ёнэ сыс зракхнэ́. Ёнэ патяндынэ́ дрэ Ту́тэ, и ёнэ на сыс ладжакирдэ́.

⁷ Мэ сом кирмо, а на сом ману́ш; мануша́ холямэс обракирэна ман, манушы́тка на́цыи гинэ́на ман пал бла́та.

⁸ Сарэ́, кон бидыкхэла ман, санапэ холямэс ма́ндыр; ёнэ кунякирэна (качынэна) шэрэнца и ракирэ́на:

⁹ “Ёв допатяндыя пэ́скиро джиибэ́н Ра́скэ-Дэвлэ́скэ, мэк Ёв тэ подэл васт лэ́скэ бидатыр: мэк Ёв тэ зракхэ́л лэс, пал-дова́ со Ёв радынэ́лапэ Лэ́са.”

¹⁰ Нэ дава́ ж сан Ту, Кон вылыя ман да́кирэ лочовя́тыр (пэрэстыр), дава́ Ту чхудя́н ман тэ явав куч пашы́л да́кирэ цюця.

¹¹ Мэ со́мас отдыно́ Ту́кэ тэды, ке́ли мэ лахтёмпэ, Ту сан миро Дэвэ́л да́кирэ пэрэстыр.

¹² На яв дур ма́ндыр, сыр мэ пиридживава, сыр нанэ нико́н тэ дэл васт ма́нгэ.

¹³ Бут вэ́рги сыр гурува тэрдинэ́ трусця́л ма́ндэ; зоралэ́ гурува Васаностыр обштадэ ман.

¹⁴ Ёнэ порадэ пэ́скирэ муя́ пэ ма́ндэ, сыр шчэра́ (левы), со исын ґалка (корысна) тэ роскушэн.

¹⁵ Мэ вычхудём пэ́скири зор сыр пани́, и сарэ́ мирэ́ кокалы́ роспынэпэ пэ котэра́, миро ило́ исын сыр мом, со розбиладыя андра́л миро кужум (жэлудко).

¹⁶ Мири́ зор вышутия сыр котэ́р ґлэятыр (глинатыр), и Мири́ чиб прилипниндя кэ мирэ́ жанды. Ту чхудя́н ман дрэ мэрибнаскири бла́та.

¹⁷ Пал-дова́ со джукэла обгинэ трусця́л ма́ндэ; хевра чорэ́-манушэ́нгири обгия ман ригэ́ндыр; ёнэ пропхусадэ мирэ́ васта́ и ґэра́.

¹⁸ Мэ погинава сарэ́ мирэ́ кокалы́; вэргарья ж дыкхэ́на, ёнэ путравэна якха́ пэ ма́ндэ.

¹⁹ Ёнэ роскэрэна мирэ́ и́ди (ризы) машки́р пэ́стэ, ёнэ чхурдэна жрэбиё пэ мирэ́ урибэна́.

²⁰ Раё Дэ́вла! Ту на дурьёв ма́ндыр – Зоралыпэ́н миро, яв сыгэды́р тэ дэл васт ма́нгэ!

²¹ Зра́кх миро ди куртала́тыр, миро екхоро джиибэ́н джуклэнгирэ лапэндыр.

²² На домэк ман кэ шчэрэнгирэ пасти; вылэ ман бусонэ (диконэ) гурувэнгирэ шынгэндыр (рогэндыр).

²³ Мэ ява́ва тэ выпхэнав Тыро́ лав мирэ́ пшалэ́нгэ, Мэ ява́ва тэ шара́в Тут машкира́л манушэ́ндэ, савэ́ скэдэ́напэ тэ клонинэнпэ патыва́са Ту́кэ.

²⁴ Тумэ́, савэ́ дарэ́на Ра́стыр-Дэвлэ́стыр, клонинэнпэ патыва́са Лэ́скэ! Яково́скиро ро́до, славинэ́н Лэс. Саро́ Израилёскиро ро́до, дарэ́н Лэ́стыр.

²⁵ Пал-дова́ со Ёв на дыкхця́ вучипна́стыр, и рисия кэ страдындлэ мануша́, ке́ли сыс пхаро́; и Ёв на отрисия лэ́ндыр, нэ ке́ли ёнэ дынэ́ го́дла Лэ́скэ, тэ дэл васт, Ёв шундя́.

²⁶ Мэ ява́ва тэ шара́в Тут пэ баро́ скэдыибэ́н; мэ кэра́ва дова́, пал со мэ совлахадём анги́л одолэ́ндэ, савэ́ дарэ́на Лэ́стыр.

²⁷ Мэк тэ хан чалэ́с одолэ́, савэ́ ха́на мэ́ньки, а одолэ́, савэ́ родэ́на Рас-Дэвлэ́с, явэ́на тэ шарэ́н Лэс, мэк тэ дживэ́н тумарэ́ илэ пэ сарэ́ ве́ки!

²⁸ Сарэ́ яго́ры (краи́) пхувья́кирэ явэ́на тэ рипирэ́н, и тэ рисён кэ Рай Дэвэ́л, и сарэ́ Наюды́тка ро́ды поклонинэнапэ патыва́са Ту́кэ.

²⁹ Пал-дова́ со саро́ кралипэ́н исын Ра́скирэ-Дэвлэ́скиро; и Ёв кралинэла пэ манушы́тка на́цыи.

³⁰ Сарэ́ тхулэ барвалыпнастыр пир пхув явэ́на, тэ хан и поклонинэнапэ патыва́са; а сарэ́ одолэ́, савэ́ зджана дро пра́хо, явэ́на тэ бандён шэрэнца анги́л Лэ́стэ.

³¹ Манушэ́нгирэ ро́ды, со явэ́на анги́л, явэ́на тэ дынаринэ́н Лэ́скэ: мануша́ явэ́на тэ ракирэ́н пал Растэ-Дэвлэ́стэ ваш яви́р ро́ды.

³² [р.с.] Ёнэ явэ́на и пхэнэ́на пал лэ́скиро чачипэ́н манушэ́нгэ, савэ́ ишчо (инкэ́) латхэнапэ, со Ёв кэрдя́.