Psalmy 21 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Давидо́скиро Пса́лмо.

² О кра́ли радынэ́лапэ Тырэ́ зоралыпнастыр, о Раё Дэ́вла, и ёв исын древа́н лошало (весёло) зракхибнаса Ту́тыр.

³ Ту дыя́н лэ́скэ саро́, со лэ́скиро ило́ камдя́, и Ту на отпхэндянпэ долэ́стыр, со лэ́скирэ ушта́ мангнэ́. Сэ́ла.

⁴ Пал-дова́ со Ту прилыян лэс бахтякирибнаса ваш лачхипэ́н; Ту уридян вя́нка (коро́на) чачунэ́ сувнака́стыр пэ лэ́скиро шэро́.

⁵ Ёв мангдя́ джиибэ́н Ту́тыр, – Ту дыя́н лэ́скэ длэнго джиибэ́н пэ сарэ́ ве́ки.

⁶ Лэ́скири сла́ва исын бари, пал-дова́ со Ту зракхця́н лэс; Ту дыя́н лэ́скэ паты́в и бари сла́ва.

⁷ Пал-дова́ со Ту бахтякирдян лэс пэ сарэ́ ве́ки; Ту обрадындян лэс радыма́са, со Ту сан лэ́са.

⁸ Пал-дова́ со, кра́ли патя́ла дрэ Растэ-Дэвлэ́стэ и пир Най Вучэдэрэскири ла́ска ёв ячэ́лапэ пэ троно.

⁹ Тыро́ васт доджа́ла кэ сарэ́ лэ́скирэ вэ́рги; Тыро́ чачо́ васт ухтылэ́ла сарэ́н, кон бидыкхэла Тут.

¹⁰ Ту кэрэ́са лэ́ндыр хачкирдо бов яга́са, сыр Ту явэ́са; Раё Дэ́вла накхавэла лэн дрэ Лэ́скири холы́ и яг ха́ла кэ хась лэн.

¹¹ Ту хасякирэса лэ́нгирэ чхаворэ́н, кон исын пэ пхув, и одолэ́н, кон джа́ла пал лэ́ндэ манушэ́ндыр.

¹² Пал-дова́ со ёнэ зракирдэпэ тэ кэрэ́н чорипэ́н Ту́кэ; ёнэ обмеркиндлэ пэ́скирэ фуй мысли; савэ́ ёнэ на дэ́на ра́да тэ кэрэ́н,

¹³ пал-дова́ со Ту рискирэса кэ ёнэ думэса; Ту рискирэса марибны́тка бустя́ (стре́лы) пэ Пэ́скиро лу́ко пэ лэ́нгирэ муя́.

¹⁴ [р.с.] Тэ явэ́л Ту́кэ бари паты́в, Раё Дэ́вла, пал Тыро́ зоралыпэ́н; амэ ява́са тэ багас и тэ шарас тыри́ зор.