Psalmy 20 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Давидо́скиро Пса́лмо.

² Мэк Рай Дэвэ́л тэ шунэ́л тут дро дывэ́с, ке́ли исын пхаро́; мэк Яково́скирэ-Дэвлэ́скирэ лав тэ зракхэ́л тут вэргэ́ндыр;

³ Мэк Ёв тэ бичхавэл ту́кэ зор Лэ́скирэ Свэнтонэ́ Штэто́стыр и тэ подрикирэ́л тут Сионоскирэ Бэрга́тыр.

⁴ Мэк Ёв тэ рипирэл сарэ́ тырэ́ Свэ́нта дыибэна́, и мэк Ёв тэ прилэл Тырэ́ хачкирибнаскирэ яныбэна́. Сэ́ла.

⁵ Мэк Ёв тэ дэл ту́кэ, со тырэ́ илэскэ трэй и, соб (кай) тэ сполнинэ́лпэ сарэ́ тырэ́ планы.

⁶ Амэ ява́са тэ радынаспэ Тырэ́ зракхибнастыр, и амэ чхуваса амарэ́ сцяги амарэ́ Дэвлэ́скирэ лавэ́са. Мэк Рай Дэвэ́л тэ сполнинэл саро́, пал со ту мангэса.

⁷ Акана́ мэ джино́м, со Рай Дэвэ́л зракхэ́ла Пэ́скирэ помакхнэс; Ёв отпхэнэ́ла лэ́скэ Лэ́скирэ помакх свэнтонэ́ Болыбна́стыр, Лэ́скирэ чачунэ́-вастэскирэ зорья́са, со зракхэ́ла лэс.

⁸ Вари-савэ́ патя́на дрэ марибны́тка вурдэна́ и вари-савэ́ дрэ грэ́ндэ, нэ амэ ява́са тэ рипирас амарэ́ Ра́скирэ-Дэвлэ́скиро лав, амарэ́ Дэвлэ́скиро.

⁹ Ёнэ бандинэ тэлэ́ и пынэ́; нэ амэ уштыям и сам тэрдэ́ маму́й (пря́мэс).

¹⁰ [р.с.] Раё Дэ́вла! Кэр, соб (кай) кра́ли тэ лэл упралыпэ́н дро марибэ́н. Шун амэн, ке́ли амэ кхараса Тут.