Psalmy 18 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Давидо́скиро Пса́лмо, кон исын Ра́скирэ-Дэвлэ́скиро Писха́ри, саво́ выпхэндя багаибнытка лава́ Ра́скэ-Дэвлэ́скэ дро дывэ́с, ке́ли Рай Дэвэ́л зракхця́ Лэс лэ́скирэ-вэргэ́нгирэ вэргэ́нгирэ вастэ́ндыр и Сауло́скирэ вастэ́стыр.

² И пхэндя́ ёв: “Мэ рикирава сыр Дро́гима Тут дро ило́, Раё Дэ́вла, Ту дэ́са зор ма́нгэ.

³ Раё Дэ́вла, Ту сан мири́ бэ́рга и мири́” тва́рдыма/диз (крепость). Кон зракхэ́ла ман, Миро Дэ́вла, Ту дэ́са зор ма́нгэ; и дрэ Ту́тэ мэ ґарадёвава. Ту сан миро шчы́то, Саво́ зракхэ́ла ман, Саво́ затэрдёла пал ма́ндэ.

⁴ Мэ кхара́ва Рас-Дэвлэ́с, Саво́ зракхэ́ла ман мирэ́ вэргэ́ндыр, Савэс трэй тэ шарэ́н.

⁵ Мэрибнаскири дар исын трусця́л ма́ндэ, пал-дова́ со барэ́ надэвлытка валны (вэлны) трашадэ ман.

⁶ Дарья (дара) исын люностыр (адостыр) трусця́л ма́ндэ, мэрибнаскирэ фэля́ облынэ ман.

⁷ Ке́ли ма́нгэ яця́ пхаро́, мэ кхардём Рас-Дэвлэ́с и рондём заня́са анги́л мирэ́ Дэвлэ́стэ: Ёв шундя́ мири́ зан тэла́л Пэ́скирэ штэто́стыр дро Болыбна́скиро Раё, Ёв шундя́ мири́ годлыма.

⁸ Тэ́ньци пхув тринскирдяпэ и издрандыя, тэлатунэ́ бара́ бэргэндыр кхардэпэ (двигиндлэпэ) и издрандынэ, пал-дова́ со Дэвэ́л холя́сыя.

⁹ Тхув ґаздыя́пэ Лэ́скирэ рутхуне́ндыр (ноздрендыр), яг и вангара, со росхачонас уса́ буты́р Лэ́скирэ мо́стыр.

¹⁰ И Ёв бандякирдя болыбэ́н и гия́ тэлэ́, калыпэ́н (цямлыпэ́н) сыс анги́л Лэ́скирэ ґэра́.

¹¹ Ёв бэсця́ пэ херувимо и вурняндыя, и Ёв вурнялас пэ бэльвэлякирэ пхака́.

¹² И Ёв закэрдя цямлыпнаса ґэнста болыбна́скирэ о́блоки, со сыс пхэрдэ́ пане́са, савэ́ сыс трусця́л Лэ́стэ.

¹³ Ярко дуд зяинэлас анги́л Лэ́стэ, градо барэ́нца и вангара, со хачонас, выухтэнас облокэндыр.

¹⁴ И Рай Дэвэ́л адя́кэ-паць пхэндя́ дро громо, и Най Вучэдырэскиро выпхэндя пэ́скирэ заня́са, градоскирэ барэ́нца и вангарэнца, со хачонас.

¹⁵ Ёв вымэкця пэ́скирэ марибны́тка бэстя́ и росчхурдыя мирэ́ вэргэ́н, и Ёв дыя́ карье блискавицэнца и росчхурдыя вэргэ́н, со ёнэ нашэ́на.

¹⁶ Тэды панескирэ дугны (днишчы) ячнэ́ дыцьлэ (бицялэ́), и тэл-пхувья́киро фунда́менто отчхакирдяпэ, ке́ли Ту, Раё Дэ́вла, дыя́ го́дла даракунэс, сыр Ту пхурдыян зоралэ́с Пэ́скирэ рутхунендыр.

¹⁷ Рай Дэвэ́л догия́ вычипнастыр, ухтылдя ман, Ёв тырдыя яври́ ман барэ́ панендыр;

¹⁸ Ёв зракхця́ ман мирэ́ зоралэ́ вэргостыр, и одолэ́ндыр, савэ́ древа́н на вырикирдэ ман, пал-дова́ со ёнэ сыс зоралэды́р ма́ндыр.

¹⁹ Ёнэ тэрдинэ́ анги́л ма́ндэ дро дывэ́с, сыр сыс биба́хт ма́нгэ, нэ Рай Дэвэ́л сыс пэ мири́ риг.

²⁰ Ёв вылыджия́ ман пэ буґло́ штэ́то, Ёв зракхця́ ман, пал-дова́ со Лэ́скэ исын дро́го мэ.

²¹ Ёв отдыя́ палэ лачхипна́са пал миро чачипэ́н; Ёв бахтякирдя́ ман пал дова́, со мэ со́мас бибангипнаскиро.

²² Пал-дова́ со мэ рикирдёмпэ кэ чачипэ́н, со Рай Дэвэ́л пхэндя́, мэ на отрисиём Дэвлэ́стыр тэ кэра́в фуипэ́н.

²³ Мэ кэрдём пир сарэ́ Лэ́скирэ припхэныбэна́, мэ на отпхэндёмпэ Лэ́скирэ статутэндыр,

²⁴ Пал-дова́ со мэ сом бидошэ́нгиро анги́л Лэ́стэ, и мэ ракхцём пэс, соб (кай) тэ на кэра́в фуипэ́н.

²⁵ Рай Дэвэ́л бахтякирдя́ ман пал миро чачипэ́н, пал дова́, со мэ со́мас бибангипнаскиро анги́л Лэ́скирэ якха́.

²⁶ Лачхэ́-илэскирэнца Ту сан лачхэ́-илэ́скиро, бидошэнгирэнца Ту сан бидошэ́нгиро;

²⁷ Чыстонэ-илэскирэнца Ту сан лачхо́; фрэнтонэнца Ту сан годя́са пэ стрэ́га,

²⁸ пал-дова́ со Ту зракхэ́са одолэ́н, кон страдынэла. Нэ Ту бандякирэса одолэ́н, кон ґаздэ́ла накх.

²⁹ Ту захачкирэса мири́ лампа: Рай Дэвэ́л, миро Дэ́вла, Ту зазяинэса яга́са и цямлыпэ́н уджала.

³⁰ Ту дэ́са зор ма́нгэ тэ джав анги́л марибнытконэ́ халадэ́ндэ, Мирэ́ Дэвлэ́са мэ пириухтава форитко бар.

³¹ Миро Дэвэ́л исын бидошэ́нгиро, Ра́скирэ-Дэвлэ́скиро лав исын пропатякирдо. Ёв исын шчы́то ваш сарэ́нгэ, кон гарадёла дрэ Лэ́стэ.

³² Кон тэды исын Дэвэ́л апри́ч Растэ-Дэвлэ́стэ. Ци, кон жа исын Бэ́рга тэ зракхэлпэ апри́ч амарэ́ Дэвлэ́стэ?

³³ Дэвэ́л дэ́ла ма́нгэ зор и кэрэ́ла ма́нгэ маму́й (пря́мо) дром,

³⁴ Ёв кэрэ́ла мирэ́ ґэра́ сыр оленестэ, Ёв чхувэ́ла ман пэ вучэ́ штэ́ты;

³⁵ Ёв сыклякирэ́ла мирэ́ васта́ ваш марибэ́н, соб (кай) мирэ́ васта́ тэ надтырдэн харкуно лу́ко.

³⁶ Ту дыя́н адя́кэ-паць ма́нгэ шчы́то тэ зракхавпэ и Тыро́ чачо́ васт подрикирэ́ла ман, и Тыро́ лачхипэ́н дыя́ ма́нгэ зор.

³⁷ Ту кэрдя́н буґло́ дром ма́нгэ тэ штавав.

³⁸ Мэ традыёмпэ дрэ шалэ (пагоня) пал мирэ́ вэргэ́ндэ и ухтылдём лэн; и мэ на рисиём, анги́л, сыр мэ тэ хасякира́в лэн.

³⁹ Мэ пиримардём лэн, со ёнэ нашты́ тэ уштэ́н: и ёнэ пэрэнас тэл мирэ́ ґэра́.

⁴⁰ И Ту дыя́н ма́нгэ зор ваш марибэ́н. Ту бандякирдян мирэ́ вэргэ́н анги́л ма́ндэ.

⁴¹ И Ту порискирдян мэняса мирэ́ вэргэ́н тэ нашэ́н, соб (кай) мэ тэ хасякира́в одолэ́н, савэ́ бидыкхэна ман.

⁴² Ёнэ дынэ́ го́дла, нэ нико́н на сыс тэ зракхэ́л, ёнэ дынэ́ го́дла Ра́скэ-Дэвлэ́скэ, нэ Ёв на отпхэндя́ лэ́нгэ.

⁴³ Тэ́ньци мэ ростасадём лэн сыр пра́хо анги́л балваля, штакурдём лэн сыр бла́та пэ га́сы.

⁴⁴ Ту зракхця́н ман манушэ́ндыр, савэ́ бунтуинэна, Ту чхудя́н ман шэрэ́ манушэ́са пэ Наюды́тка на́цыи. Мануша́, савэ́н мэ на джиндём анги́л, явэ́на тэ дынаринэ́н ма́нгэ.

⁴⁵ Сыр фэ́ни ёнэ шунэ́на пал ма́ндэ, ёнэ кандэ́на ман, чхавэ́, намирэ-манушэ́нгирэ, бандякирэна шэрэ́ анги́л ма́ндэ.

⁴⁶ Чужонэ-манушэ́нгирэ чхавэ́ ячэ́на зломка и ёнэ выджа́на пэ́скирэ барунэ́ рикирибнэндыр, издраиндой.

⁴⁷ Тэ дживэ́л Рай Дэвэ́л! Тэ явэ́л бахтякирды мири́ Бэ́рга тэ зракхавпэ! Тэ шарэл вучэ́с саро́, со исын джидо́, Дэвлэ́с, Саво́ зракхэ́ла ман.

⁴⁸ Ёв исын Дэвэ́л, Саво́ отдэ́ла палэ вэргэ́нгэ пал ма́ндэ, Саво́ помогинэла тэ лав упралыпэ́н пэ манушэ́ндэ;

⁴⁹ Ёв зракхэ́ла ман мирэ́ вэргэ́ндыр: чачо́, одолэ́ндыр, савэ́ джа́на проти ма́ндэ. Ту зракхця́н ман нахратонэ (нахальнонэ) манушэ́ндыр.

⁵⁰ Палдава́ мэ парикирава, бут мо́лы Ту́кэ, Раё Дэ́вла, анги́л Наюды́тка на́цыи и мэ ява́ва тэ бага́в гиля́ Тырэ́ лавэ́скэ.

⁵¹ [р.с.] Дава́ исын Ёв, Кон зракхэ́ла Пэ́скирэ крали́с, Саво́ сыкавэ́ла ла́ска одолэ́скэ, конэ́с Ёв помакхця Давидо́скэ, и лэ́скирэ родо́скэ пэ сарэ́ ве́ки”.