Psalmy 17 - Библия - Пэ Балтитко Романи чиб (Романэс) 2019

¹ Давидоскири Па́тери (Моли́тва). Шун ман, Раё Дэ́вла, миро чачипэ́н, пришунпэ, сыр мэ кхара́ва зоралэ́с Тут ясвэ́нца. Шун миро мангипэ́н Ту́кэ, ёв выджа́ла мирэ́ нахоханэ уштэндыр.

² Мэк Ту тэ сэндякирэс ман пир миро чачипэ́н, мэк Тырэ́ якха́ тэ дыкхэ́н пэ дова́, со исын чачипна́скиро!

³ Ту спробиндян миро ило́, Ту явдя́н кэ мэ раты́: Ту розґалыян ман и Ту на лахтян нисо́: миро муй на пхэнэ́ла чорипэ́н.

⁴ Дрэ манушэ́нгирэ рэ́нды мэ приракхцём Тыро́ припхэныбэ́н, соб (кай) тэ на джав пир дром захалэ манушэ́нца.

⁵ Ке́ли Ту рикирдян, соб (кай) мэ тэ джав пир Тыро́ дром, мэ на пыём мирэ́ пирэндыр (стопэндыр).

⁶ Мэ кхардём Тут, пал-дова́ со Ту шунэса ман, о Дэ́вла: Рисёв кэ мэ и пошун мирэ́ лава́.

⁷ Сыка́в Тыри́ лачхэ́-илы́ткима, пал-дова́, со Ту сан Зракхибнаскиро ваш одолэ́нгэ, савэ́ явэ́на кэ Тыри́ чачи́ риг тэ гарадён одолэ́ндыр, савэ́ бунтуинэна проти лэ́ндэ.

⁸ Ракх ман, сыр якхакири лялька (зрачко); гарав ман дрэ зэр (тенё) Тырэ́ пхакэнгири,

⁹ чорэ́ манушэ́ндыр, савэ́ тасавэна ман, вэргэ́ндыр кэ мэрибэ́н, савэ́ обджана трусця́л ман.

¹⁰ Ёнэ запхандлэ якха́ тхулыпнастыр, пэ́скирэ муенца ракирэ́на пхутькирдэс и нахратэс.

¹¹ Ёнэ исын какана́ трусця́л амэ́ндэ, кай тэ на рисёвас, ёнэ фэ́ни дыкхана, сыр тэ пэран пэ амэ́ндэ,

¹² Ёнэ исын сы́рбы шчэр, со исын ґа́лко (корысно) тэ роскушэл и сыр шчэроро (левицо), со гарадёла дрэ ха́шча.

¹³ Тэрдёв анги́л, Раё Дэ́вла, тэ стрэнинэс мирэ́ вэргэ́н, рав лэн тэлэ́: зра́кх миро ди фуе́ манушэ́ндыр Пэ́скирэ куртала́са,

¹⁴ манушэ́ндыр Тырэ́ вастэ́са, Раё Дэ́вла, манушэ́ндыр свэто́стыр, конэ́стэ исын саро́, со ёнэ камэ́на. Лэ́нгиро пэр Ту пхэрдякирэса Пэ́скирэ пиралятыр, ёнэ радынэ́напэ пэ́скирэ чхаворэндыр, и ёнэ ячкирэна пэ́скиро миштыпэ́н чхаворэнгэ.

¹⁵ А мэ ява́ва тэ дыкха́в Тыро́ муй дрэ чачипэ́н, ке́ли мэ джанґадёвава, мэ ява́ва тэ радынавпэ, соб (кай) тэ явав пашы́л Ту́тэ.