Psalmy 16 - Библия - Пэ Балтитко Романи чиб (Романэс) 2019

¹ Давидоскири Гилы́. Давидоскири Па́тери (Моли́тва). Приракх ман, Дэ́вла, пал-дова́ со мэ гарадёвава дрэ Ту́тэ.

² Мэ пхэндём Ра́скэ-Дэвлэ́скэ “Ту сан миро Рай Дэвэ́л, саро́ миро кучипэ́н исын Ту́тыр.”

³ Свэ́нта дэвлы́тка мануша́ пэ пхув, савэ́ исын патяибнытка, – лэ́нгэ исын мири́ бари паты́в,

⁴ Одолэ́, савэ́ рисёна сы́гэс кэ яви́р дэвлорэ́, барьякирэна пэ́скири ту́га: Мэ на ява́ва тэ янав лэ́нгэ свэ́нто дыибэ́н ратэстыр, и мэ на ява́ва тэ выпхэнав титулы лэ́нгирэ дэвлорэнгирэ.

⁵ Раё Дэ́вла! Ту́тэ исын саро́, со мэ дорэсава, Ту дэ́са саро́ сы́рбы кучикатыр, Ту рикирэса мирэ́-джиибна́скиро тала́но.

⁶ Мири́ пхув сыс мериндлы шэлэса пир шука́р штэ́ты чачо́, миро мэкно́ миштыпэ́н радынэла ман.

⁷ Мэ ява́ва тэ славинав тут, Раё Дэ́вла, Саво́ сыклякирэ́ла ман; миро ило́ раты́ подпхэнэла ма́нгэ, карик мэ джа́ва,

⁸ Мэ кажно мо́ло рипирава, со Ту сан на́дур; пал-дова́ со Ту сан чачэ́ рига́тыр, мэ на ява́ва би радымакиро.

⁹ Палдава́ миро ило́ исын лошало, и миро ди радынэ́лапэ; и мири́ лоч (плоть) откхинёла дрэ наде́я.

¹⁰ Далэскэ, со Ту зракхэ́са ман люностыр (адостыр), Ту на дэ́са патяибнытконэ дынари́скэ тэ кирнёл дрэ маґила.

¹¹ Ту сыкавэса ма́нгэ дром кэ джиибэ́н: пал-дова́ со Ту сан пашы́л ма́ндэ, мэ древа́н радынавапэ, мири́ бари ра́дыма исын дрэ Тыро́ чачо́ васт.