Psalmy 147 - Библия - Пэ Балтитко Романи чиб (Романэс) 2019

¹ Шарэ́н Рас-Дэвлэ́с! Пал-дова́ со исын лачхэ́с тэ бага́н псалмы амарэ́ Дэвлэ́скэ; пал-дова́ со исын дро́го тэ шарэ́н Лэс!

² Рай Дэвэ́л ґаздэ́ла Ерусалимо, Ёв кэдэла кхэтанэ́ одолэ́н, савэ́н вылыджинэ́ Израилёстыр.

³ Ёв састякирэла одолэ́н, конэ́стэ исын пхаро́ пэ ило́, и Ёв пирипхандэла лэ́нгирэ франсы (раны).

⁴ Ёв гинэ́ла, кицы́ исын чэргэня́, Ёв кхарэ́ла лэн пир лэ́нгирэ лава́.

⁵ Амаро́ Рай Дэвэ́л исын баро́ и древа́н зоралыпнаскиро, нанэ ме́ра пэ Лэ́скиро годыпэ́н.

⁶ Рай Дэвэ́л ґаздэ́ла ковлэ́-илэ́скирэ манушэ́н, Ёв чхурдэ́ла тэлэ́ фуе́ манушэ́н кэ пхув.

⁷ Бага́н Ра́скэ-Дэвлэ́скэ и парикирэ́н Лэ́скэ, бага́н псалмы пэ лута амарэ́ Дэвлэ́скэ:

⁸ Кон учхакирдя́ болыбэ́н облокэ́нца, Кон кэдэла брышы́нд ваш пхув, Кон кэрэ́ла адя́кэ, со чар барьёла пэ бэ́рги.

⁹ Ёв дэ́ла кхэритконэ́ мурдалэскэ лэ́нгиро хабэ́н, и тыкнэ́ коракэ́нгэ (воронятэнгэ), савэ́ дэ́на го́дла (кэ Ёв).

¹⁰ Ёв на радынэ́лапэ зоралэ́с грэскирэ зорья́тыр, Лэ́скэ исын на дро́го муршэскири зор дрэ ґэра́.

¹¹ Лэ́скэ исын дро́га одолэ́, савэ́ дарэ́на Лэ́стыр, кодолэ́, савэ́ ужакирэ́на лачхипэ́н Лэ́скирэ ковлэ́-илыткиматыр.

¹² [1] Шар Рас-Дэвлэ́с, о Ерусали́ме! Шар Тырэ́ Дэвлэ́с, о Сио́не!

¹³ [2] Пал-дова́ со Ёв кэрдя́ зоралэ́ шыберы пэ тыри́ по́рта, Ёв бахтякирдя́ тырэ́ чхавэ́н машки́р Ту́тэ;

¹⁴ [3] Ёв дэ́ла рама́нё (миро) пэ тырэ́ кустыка (границы), Ёв дэ́ла чалэ́с ту́кэ най фэды́р парно́ гив.

¹⁵ [4] Ёв бичхавэ́ла Пэ́скирэ припхэныбэна́ пэ пхув, лэ́скиро лав прастала древа́н сы́гэс.

¹⁶ [5] Ёв дэ́ла ив сыр пошом / вы́лна (шэрсь), Ёв росчхурдэла ив сыр пра́ска (попело).

¹⁷ [6] Ёв чхурдэ́ла пэ́скиро градо котэрэнца (кускэнца): кон сашты́ тэ пирилыджал лэ́скиро шыл?

¹⁸ [7] Ёв бичхавэ́ла лэ́скиро лав и биладёла саро́; Ёв кэрэ́ла адя́кэ, со Лэ́скири балва́л пхурдэла и паня́ тхадэна.

¹⁹ [8] Ёв пхэнэ́ла статэчнэс Лэ́скиро лав Яково́скэ, Лэ́скирэ, стату́ты (уставы) и Лэ́скиро чачипэ́н Израилёскэ.

²⁰ [9] Ёв на кэрдя́ адя́кэ ни екхэ Наюдытконэ́ нацыякэ, пал-дова́ со ёнэ на джинэ́на Лэ́скирэ чачипэна́. Аллилуя!