Psalmy 146 - Библия - Пэ Балтитко Романи чиб (Романэс) 2019

¹ Аллилуя! Шар миро ди Рас-Дэвлэ́с!

² Кицы́ мэ ява́ва тэ джива́в, ада́кицы мэ ява́ва тэ шара́в Рас-Дэвлэ́с, мэ ява́ва тэ бага́в псалмы мирэ́ Дэвлэ́скэ, пака мэ сом джидо́.

³ На патя́н зоралэ́с дрэ тхагарьендэ (дрэ князьендэ), ци дрэ манушэ́скирэ чхавэ́стэ, пал-дова́ со нанэ зракхибэ́н лэ́ндыр.

⁴ Сыр ёнэ мэрэ́на, лэ́нгиро ду́хо (фа́но) джа́ла криг, ёв рисёла дро пра́хо, дро дова́-паць дывэ́с сарэ́ лэ́нгирэ ду́мы хасёна.

⁵ Бахтало́ исын кодова́ ману́ш, конэ́скэ подэла васт Яково́скиро Дэвэ́л, кон ужакирэ́ла лачхипэ́н Ра́стыр-Дэвлэ́стыр, Лэ́скирэ Дэвлэ́стыр.

⁶ Ёв создыя́ болыбэ́н и пхув, мо́ри (дэрьява́) и саро́, со исын дрэ лэ́ндэ. Ёв усады (сак) рикирэ́ла патяибэ́н.

⁷ Ёв кэрэ́ла чачипна́скиро сэ́ндо ваш одолэ́нгэ, савэ́н притасавэнас. Ёв дэ́ла хабэ́н бокхалэ́нгэ: Рай Дэвэ́л мэкэ́ла пэ во́ля штарибнаскирэн (бэшыбнаскирэн).

⁸ Рай Дэвэ́л отпхандэла якха́ корорэнгэ, Рай Дэвэ́л ґаздэ́ла одолэ́н, савэ́ бандинэ тэлэ́ пхарипнастыр, Ра́скэ Дэвлэ́скэ трэй чачипнаскирэ.

⁹ Рай Дэвэ́л ракхэ́ла чужонэ́ манушэ́н; Ёв лэ́ла криг пхарипэ́н пиротэ́ндыр (сиротэндыр) и пивле́ндыр (удовэндыр), нэ Ёв бандякирэла дром фуе́ манушэ́нгэ.

¹⁰ Рай Дэвэ́л явэ́ла тэ кралинэ́л усады (сак)! О Сио́но, Тыро́ Дэвэ́л явэ́ла пир сарэ́ ро́ды. Аллилуя.