Psalmy 145 - Библия - Пэ Балтитко Романи чиб (Романэс) 2019

¹ Давидо́скиро Шарибнытко Пса́лмо. Мэ ява́ва тэ шара́в кэ вучипэ́н Тут, миро Дэ́вла, о Кра́ли и мэ ява́ва тэ вышарав Тыро́ лав усады (сак) и пэ сарэ́ ве́ки.

² Со дывэ́с мэ ява́ва тэ вышарав Тут, и мэ ява́ва тэ шара́в Тыро́ лав усады (сак) и пэ сарэ́ ве́ки.

³ Древа́н баро́ исын Рай Дэвэ́л и исын мол, соб (кай) зоралэ́с тэ шарэ́н Лэс, и лэ́скиро барипэ́н нашты́ тэ ґалён.

⁴ Ро́до родо́стыр явэ́на тэ шарэ́н Тырэ́ бутя́ и явэ́на тэ выпхэнэн статэчнэс (тэ об΄явинэн) пал Тырэ́-зоралыпнаскирэ кэрибэна.

⁵ Мэ ява́ва тэ ракира́в пал славу́тно паты́в Тырэ́ райканэ́ славатыр и Тырэ́ ди́вна кэ дар бутя́.

⁶ И мануша́ явэ́на тэ роспхэнэ́н и пал Тыро́ зоралыпэ́н кэ дар, Тырэ́ бутендыр, и мэ ява́ва тэ выпхэнав статэчнэс пал Тырэ́ древа́н барэ́ рэ́нды.

⁷ И ёнэ явэ́на тэ выпхэнэн и тэ рипирэ́н пал Тыро́ баро́ лачхипэ́н и мэ ява́ва тэ бага́в зоралэ́с пал Тыро́ чачипэ́н.

⁸ Рай Дэвэ́л исын лачхэдескиро (милосно) и тангипнаскиро и, Ёв насыг холясо́ла, и исын древа́н лачхэ́-илэ́скиро.

⁹ Рай Дэвэ́л исын лачхо́ кэ сарэ́, и лэ́скиро дро́го лачхипэ́н исын пэ саро́, со Ёв создыя́.

¹⁰ Саро́, со Ту кэрдя́н, явэ́ла тэ парикирэл Ту́кэ, о Раё Дэ́вла, и Тырэ́ свэ́нта явэ́на тэ шарэ́н Тут.

¹¹ Ёнэ явэ́на тэ роспхэнэ́н пал Тырэ́-кралипнаскири сла́ва и тэ ракирэ́л пал Тыро́ зоралыпэ́н,

¹² соб (кай) тэ джинэ́н манушэ́нгирэ чхавэ́ пал Тырэ́-зоралыпнаскирэ рэ́нды и пал славу́тно райканы сла́ва Тырэ́ кралипнастыр.

¹³ Тыро́ кралипэ́н – кралипэ́н пир сарэ́ ве́ки, и Ту рикирэса зор пир сарэ́ ро́ды.

¹⁴ Рай Дэвэ́л подрикирэ́ла сарэ́н, кон пэрэ́ла, и ґаздэ́ла сарэ́ одолэ́н, савэ́ бандинэ пхарипнастыр.

¹⁵ Сарэ́ манушэ́нгирэ якха́ ужакирэ́на лачхипэ́н Ту́тыр, и Ту дэ́са хабэ́н лэ́нгэ тэды, ке́ли трэй лэ́нгэ.

¹⁶ Ту роскэрэса Тыро́ васт и дэ́са чалэ́с сарэскэ, со исын джидо́.

¹⁷ Рай Дэвэ́л исын чачипна́скиро дро саро́, со Ёв кэрэ́ла и Ёв исын лачхо́ дро сарэ́ Лэ́скирэ рэ́нды (де́лы).

¹⁸ Рай Дэвэ́л исын пашы́л сарэ́ндэ одолэ́ндэ, савэ́ кхарэ́на Лэс чачипна́са.

¹⁹ Ёв кэрэ́ла пир одолэнгиро лав, пэ ило́, савэ́ндэ исын трашаибэ́н анги́л Лэ́стэ и Ёв явэ́ла тэ шунэ́л лэ́скиро ровибэн и зракхэ́ла лэн.

²⁰ Рай Дэвэ́л приракхэла сарэ́н, савэ́нгэ исын дро́го Ёв; нэ Ёв хасякирэ́ла сарэ́н фуе́ манушэ́н.

²¹ Миро муй явэ́ла тэ шарэл Рас-Дэвлэ́с и мэк кажно лоч (плоть) тэ шарэл лэ́скиро Свэ́нто лав усады (сак) и пэ сарэ́ ве́ки.