Psalmy 144 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. Мэк тэ вышарэн Рас-Дэвлэ́с, Саво́ исын мири́ Бэ́рга тэ зракхавпэ, Кон сыклякирэ́ла мирэ́ васта́ ваш марибэ́н, мирэ́ ангушта (пальцы) тэ маравпэ;

² Ёв исын лачхэ́-дескиро кэ мэ и затэрдёла пал ма́ндэ. Ёв исын мири́ вучи́ вучарды́ (башня) и миро Зракхибнаскиро, миро шчы́то, дрэ Конэ́стэ мэ зоралэ́с патя́ва, Саво́ тэлякирдя мирэ́ манушэ́н тэл ма́ндэ.

³ Раё Дэ́вла! Со исын ману́ш, со Ту джинэ́са лэс, манушэ́скиро чхаво́, со Ту кутякирэса лэс?

⁴ Ману́ш исын сы́рбы балвалякиро пхурдыпэн, лэ́скирэ дывэса́ исын сы́рбы зэр (тенё), со проджа́ла (накхэла).

⁵ Раё Дэ́вла! Бандякир Тыро́ болыбэ́н и джа́ тэлэ́ бэ́рги, соб (кай) тэ джал тхув лэ́ндыр;

⁶ зазяин блискавицаса и росчхурдэ лэн; бичха́в Тырэ́ марибны́тка бустя́ (стре́лы) и притасав лэн:

⁷ протырдэ Тыро́ васт вучыпнастыр; подэ васт ма́нгэ бидатыр и зра́кх ман панингэндыр, чужонэ́-чхавэ́нгирэ вастэ́стыр,

⁸ савэнгиро муй ракирэ́ла фрэнта лава́ и лэ́нгиро чачо́ васт исын хохаибнаскиро.

⁹ О Дэ́вла! Мэ ява́ва тэ бага́в нэви́ гилы́ Ту́кэ, мэ ява́ва тэ бага́в псалмы пэ дэшэ-струнэнгири лута Ту́кэ,

¹⁰ Екхэ́скэ, Кон зракхэ́ла кралье́н, Кон выракхэла Пэ́скирэ писхари́с Давидо́с мэрибнытконэ куртала́тыр.

¹¹ Дэ воля́ ма́нгэ и выракх ман чужонэ́-манушэ́нгирэ вастэ́ндыр, савэнгирэ муя́ ракирэ́на фрэнта лава́ и лэ́нгиро чачо́ васт исын хохаибнаскиро.

¹² Мэк тэ явэ́н амарэ́ чхавэ́ сы́рбы раслины, со выбаринэ дро лэ́нгиро тэрныпэн, мэк тэ явэ́н амарэ́ чхая́ сы́рбы шэралэ́ сты́лбы, со исын вычингирдэ дрэ бари фэлатин (колов):

¹³ мэк тэ явэ́н пхэрдэ́ амарэ́ пираля́ (жытницы) кажнонэ́ гивэса, мэк тэ биянэн амарэ́ бакря́ бара́ и дэш бара́ (тысёнцы) тыкнорэн пэ амарэ́ чаритка пхувья́;

¹⁴ мэк тэ явэ́н масунэ амарэ́ гурува, мэк тэ на явэ́л ни саво́ пхарипэ́н, ни саво́ хасякирибэн, ни саво́ ровибэн пэ амарэ́ вули́цы (га́сы).

¹⁵ Тэ явэ́н бахталэ́ дасавэ́ мануша́, савэ́ндэ саро́ дава́ исын. Тэ явэ́н бахталэ́ мануша́, конэ́скиро Дэвэ́л исын Рай Дэвэ́л!