Psalmy 143 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. Раё Дэ́вла, шун мири́ па́тери (моли́тва) Ту́кэ, причху́в кан кэ дова́, пал со мэ манга́ва! Отпхэн ма́нгэ Тырэ́ патяибнастыр, Тырэ́ чачипнастыр.

² И на тэрдёв тэ сэндякирэс Тырэ́ писхари́с (рабо́с); пал-дова́ со ние́кх нанэ бидошэ́нгиро анги́л Тыри́ годы́.

³ Пал-дова́ со вэ́рго (врого) традэлапэ пал миро ди: ёв притасадя миро джиибэ́н дрэ пхув; ёв зачхудя ман тэ джива́в дро калыпэ́н (цямлыпэ́н), и мэ сом сы́рбы муло́.

⁴ Палдава́ миро ду́хо (фа́но) замыя́ дрэ ма́ндэ, ма́нгэ исын древа́н пхаро́ пэ ило́.

⁵ Мэ рипирава ґаратунэ́ бэрша́, мэ розлава сарэ́ Тырэ́ бутя́; мэ роздуминава хор пал Тырэ́-вастэнгирэ бутя́.

⁶ Мэ тырдава мирэ́ васта́ кэ Ту: миро ди исын трушало́ (жаждынэла) пал Ту́тэ сы́рбы пхув, сави исын трушалы (жаждынэла) пал брышы́нд. Сэ́ла.

⁷ Отпхэн сы́гэс ма́нгэ, о Раё Дэ́вла! Миро ду́хо (фа́но) замэрэла; на гарав Тыро́ муй ма́ндыр, соб (кай) ма́нгэ тэ на явав сы́рбы кодолэ́, савэ́ джа́на тэлэ́ дрэ ґанби́н (яма).

⁸ Кэр, соб (кай) мэ тэ шунав пал Тыри́ лачхэ́-илы́ткима тасярлатыр (ранкостыр), пал-дова́ со мэ зоралэ́с патя́ва дрэ Ту́тэ. Кэр адя́кэ, соб (кай) мэ тэ джина́в дром, савэ́са тэ псирав, пал-дова́ со мэ ґазда́ва миро ди кэ Ту.

⁹ О, Раё Дэ́вла! Зра́кх ман мирэ́ вэргэ́ндыр: пал-дова́ со мэ кэ Ту нашава тэ гарадёвав.

¹⁰ Сыкля́кир ман тэ кэра́в пир Тыри́ во́ля, пал-дова́ со Ту сан миро Дэвэ́л; мэк Тыро́ лачхо́ Ду́хо (Фа́но) тэ лыджа́л ман пэ чачипнаскири пхув.

¹¹ О, Раё Дэ́вла! Ваш Тыро́ лав, джидя́кир нэвэ́стыр ман. Лы́джа ман криг пхарипнастыр пир Тыро́ чачипэ́н.

¹² Тырэ́ лачхэ́-илыткиматыр росчхурдэ дрэ риг мирэ́ вэргэ́н тэ хасён и хасякир сарэ́ одолэ́н, савэ́ притасавэ́на миро ди, пал-дова́ со мэ сом Тыро́ писха́ри.