Psalmy 141 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. О, Раё Дэ́вла! Мэ кхара́ва ясвэ́нца Тут: яв сыгэды́р кэ мэ; причху́в кан кэ мири́ зан, ке́ли мэ кхара́ва ясвэ́нца Тут.

² Мэк миро мангипэ́н (модло) тэ доджал кэ Ту сы́рбы фимиа́мо, а ке́ли мэ ґазда́ва васта́ сы́рбы бэльвэлякиро свэ́нто яныбэ́н.

³ Чхув стрэгарис, Раё Дэ́вла, пашы́л миро муй, тэ рикирэ́л вуда́р пэ мирэ́ ушта́.

⁴ На домэк, соб (кай) миро ило́ тэ рисёл криг кэ вари-саво́ чоро рэ́ндо, соб (кай) мэ тэ кэра́в дурэды́р фуипэ́н. На домэк, соб (кай) мэ тэ хав манушэ́нгирэ мизюли (сласти), савэ́ кэрэ́на чорипэ́н.

⁵ Мэк чачипнаскирэ мануша́ тэ пэкавэн ман, дава́ явэ́ла куч. И мэк ёв тэ сыкавэ́л мири́ банг, дава́ явэ́ла сы́рбы оливи́тко дзэт (елеё), савэ́стыр миро рама́нё (миро) на рисёла криг; нэ сароекх мэ ява́ва тэ мангавапэ, соб (кай) ёнэ тэ на кэрэ́н чорипэ́н.

⁶ Ке́ли лэ́нгирэ сэндарьен розмардэ пир бара́, ёнэ шунэ́на мирэ́ лава́, пал-дова́ со ёнэ исын гудлэ́.

⁷ Амарэ́ кокалы́ росчхурдынэ пашы́л загиибэ́н дрэ маґила (кула), сы́рбы, ке́ли вари-кон пхаравэла пхув (пахинэла) и чхинэла кашта́ пэ пхув.

⁸ Нэ мирэ́ якха́ исын пэ Ту́тэ, о, Раё Дэ́вла, миро Рай Дэвэ́л, дрэ Ту́тэ мэ зоралэ́с патя́ва: на домэк, соб (кай) миро ди тэ хасёл.

⁹ Ракх ман вастэ́ндыр, со чхудэ́ фэля́ пэ ма́ндэ, и фэля́ сетка́са, савэ́ кэрэ́на чорэ́ мануша́.

¹⁰ Мэк чорэ́ мануша́ тэ пэрэ́н дрэ лэ́нгирэ фэля́ пал екх мо́ло, а мэ обджава лэн.