Psalmy 140 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Давидо́скиро Пса́лмо.

² Зра́кх ман, о Раё Дэ́вла, чорэ́ манушэ́ндыр, ракх ман фуе́ манушэ́ндыр:

³ савэ́ придуминэна чорипэ́н дро лэ́нгиро ило́, ёнэ саро́ дывэ́с скэдэ́напэ ваш марибэ́н.

⁴ Ёнэ кэрэ́на дукханэдыр лэ́нгирэ данда́ сыр сапэстэ, мижэх сапэскири трута (ядо) исын тэл лэ́нгирэ ушта́. Сэ́ла.

⁵ Ракх ман, Раё Дэ́вла, фуе́-манушэ́нгирэ вастэ́ндыр, ракх ман нахратонэ манушэ́стыр, савэ́ придуминэна тэ равэн пирэ́ (сто́пы).

⁶ Пхутькирдэ́ гарадэ́ шэлэ и фэлы́ ваш ма́нгэ, ёнэ росчхудэ кхуды́ паш дром; ёнэ чхудэ́ фэля́ сеткаса пэ ма́ндэ. Сэ́ла.

⁷ Мэ пхэндём Ра́скэ-Дэвлэ́скэ: “Ту сан миро Дэвэ́л!” О Раё Дэ́вла! Причху́в кан кэ миро мангипэ́н Ту́кэ.

⁸ О, Дэвлалэ! Раё Дэ́вла, Зоралыпэ́н, Саво́ зракхэ́ла ман: Ту учхакирдян миро шэро́ дро марибнаскиро дывэ́с.

⁹ О, Раё Дэ́вла! На домэк, соб (кай) тэ явэ́л, сыр камэ́на фуй мануша́, на подэ васт анги́л лэ́нгирэ зракирибнаскэ ваш фуипэ́н, соб (кай) ёнэ тэ на пхутён кэ вучипэ́н.

¹⁰ Мэк одолэнгирэ шэрэ́, со исын трусця́л ма́ндэ, тэ учхакирэн жа пэс лэ́нгирэ кошыбнэнца, со джа́на лэ́нгирэ уштэндыр.

¹¹ Мэк хачкирдэ́ вангара тэ пэрэ́н пэ лэ́ндэ, мэк ёнэ тэ пэрэ́н дрэ яг, дрэ бидугно́скирэ ґанбиня́ (ямы), соб (кай) ёнэ тэ на уштэ́н палэ.

¹² Мэк фуе́-чибало ману́ш тэ на зоралёл пэ пхув, мэк фуй мануша́ тэ ухтылэ́н нахратонэ (нахальнонэ) манушэ́н кэ са́мо хасибэ́н.

¹³ Мэ джино́м, со Ту, Раё Дэ́вла, явэ́са тэ затэрдёс пал одолэнгиро рэ́ндо, савэ́н притасавэ́на, пал чорорэнгиро чачипэ́н.

¹⁴ [р.с.] Палдава́ чачунэ́ мануша́ явэ́на тэ парикирэ́н Тырэ́ лавэ́скэ, чачипнаскирэ явэ́на тэ дживэ́н, кай Ту сан.