Psalmy 14 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Давидо́скиро Пса́лмо. Дылыно́ пхэндя́ пэ́скэ: “Нанэ Дэвлэ́с!” Мануша́ ячнэ́ розмэкнэ, ёнэ кэрдэ́ злыднитка рэ́нды: нанэ ние́кх, кон кэрэ́ла пир чачипэ́н.

² Рай Дэвэ́л дыкхця́ болыбна́стыр пэ манушэ́скирэ чхавэ́ндэ тэ дыкхэ́л, ци исын вари-кон, саво́ ґалёла и родэ́ла Дэвлэ́с.

³ Сарэ́ гинэ́ криг чачэ́ дромэ́стыр, ёнэ сарэ́ ячнэ́ чорэ́ мануша́: нанэ ние́кх, кон кэрэ́ла пир чачипэ́н, нанэ ни екхорэс!

⁴ Нау́што чорэ́ манушэ́ндэ нанэ годы́, со ёнэ ха́на мирэ́ манушэ́н сы́рбы ёнэ ха́на маро́. А ёнэ на кхарэ́на Рас-Дэвлэ́с.

⁵ Ѓа́да, ёнэ явэ́на тэ издран дара́тыр, пал-дова́ со Дэвэ́л явэ́ла одолэнца, савэ́ кандэ́на Лэс.

⁶ Тумэ́ сандлэпэ чорорэстыр, пал-дова́ со ёв ракхэлапэ дрэ Растэ-Дэвлэ́стэ.

⁷ О, соб (кай) тэ явэ́л зракхибэ́н ваш Израилё Сионо́стыр! Ке́ли Рай Дэ́вла янэ́ла палэ Лэ́скирэ манушэ́н Сионо́стыр, соб (кай) Яково бут тэ радынэ́лпэ, и, соб (кай) Израилё тэ явэ́л лошало (весёло).