Psalmy 139 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Давидо́скиро Пса́лмо. О, Раё Дэ́вла, Ту роздыкхцян лачхэ́с ман, и Ту джинэ́са ман.

² Ту джинэ́са, ке́ли мэ бэшава и уштава; ту ґалёса дурипнастыр, со мэ думинава.

³ Ту дыкхэ́са пирда́л (скрозь) миро дром и миро пасибэн и сарэ́ мирэ́ дрома́ исын джиндлэ́ Ту́кэ;

⁴ пал-дова́ со ишчо (инкэ́) нанэ лав пэ мири́ чиб, соб (кай) Ту акана́ тэ на джинэсас миштэ́с лэс.

⁵ Ту облыян ман пала́л и анги́л, и Тыро́ васт исын чхудо пэ ма́ндэ.

⁶ Дасаво Тыро́ джиныбэ́н пал ма́ндэ дивинэла ман, дава́ исын вучо́ годыпэ́н, мири́ годы́ на доджа́ла кэ дава́.

⁷ Карик мэ джа́ва криг Тырэ́ Духо́стыр? Ци карик мэ кэравпэ Тырэ́ якхэ́ндыр?

⁸ Ко́ли мэ джа́ва кэ Болыбна́скиро Раё, Ту сан одо́й; ці, ко́ли мэ кэра́ва чхуибэ́н дро лю́но (преисподнё), акэ, Ту сан одо́й;

⁹ Ко́ли мэ ла́вас злокоскирэ пхака́ (кры́лы) и вурнявава тэ джива́в пэ са́мо морёскиро (дэрьявэ́скиро) яго́ро (краё),

¹⁰ аж и одо́й Тыро́ васт лыджа́ла ман, и Тыро́ чачо́ (право) васт рикирэ́ла ман.

¹¹ Ко́ли мэ пхэнавас: “Мэк тэ учхакирэл калыпэ́н (цямлыпэ́н) ман, и мэк тэ явэ́л дуд (свэ́то) ратяса трусця́л ма́ндэ;

¹² аж и цямлыпэ́н на гаравэла ман Ту́тыр, и рат зяинэла дыцьлэс сыр дывэ́с: цямлыпэ́н исын дасаво – паць, сыр дуд.

¹³ Пал-дова́ со Ту создыян мирэ́ андратунэ́ паша́, Ту чхудя́н кхэтанэ́ ман дрэ мирэ́-дакири лочови́.

¹⁴ Мэ ява́ва тэ парикира́в Ту́кэ, пал-дова́ со мэ сом создыно́ дивнэс кэ дар. Древа́н ди́вна исын Тырэ́ бутя́, и миро ди джинэ́ла миштэ́с дава́.

¹⁵ Мирэ́ кокалы́ на сыс ґарадэ́ Ту́тыр, ке́ли мэ бариём тэ явав пэ свэ́то дро гарадо́ штэ́то, и ке́ли ман кхувэнас дро екхипэ́н дро хор штэ́то.

¹⁶ Тырэ́ якха́ дыкхнэ́ ман, ке́ли мэ со́мас тыкно́ джидо́ и сарэ́ мирэ́ масэнгирэ паша́ сыс зачхиндлэ́ дрэ Тыри́ лылвари́; адя́кэ-паць одо́й сыс сарэ́ мирэ́ дывэса́, ке́ли ишчо (инкэ́) ни екх дывэ́с на сыс.

¹⁷ Нэ сыр дро́га исын ма́нгэ Тырэ́ ду́мы, о Дэ́вла! Кицы́ бут исын лэн.

¹⁸ Ко́ли мэ пиригинавас лэн, лэн явэ́лас буты́р сыр прахинки дро пра́хо. Сыр мэ джангадёвава, мэ сароекх сом Ту́са.

¹⁹ О, Дэ́вла! Тэ мулякирэс Ту фуе́ манушэ́н! Тэ джа́н криг ма́ндыр тумэ́, савэ́ исын нахрата кэ чу́жо рат.

²⁰ Ёнэ ракирэ́на киркэс пал Ту́тэ, Тырэ́ вэ́рги, ёнэ ивья́ (напра́снэс) причхувэна фуипэ́н кэ Тыро́ лав.

²¹ О, Раё Дэ́вла! Ци мэ бидыкхава одолэ́н, савэ́ бидыкхэна Тут? Ци на ячнэ́ джунгалэ́ (на брыдиндлэ) ма́нгэ одолэ́, кон ґаздэ́лапэ пэ Ту́тэ?

²² Мэ бидыкхава лэн сарэ́ илэ́стыр, ёнэ ячнэ́ мирэ́ вэргэнца.

²³ Роздыкх лачхэ́с ман, о Дэ́вла и уджин миро ило́; спробин ман и уджин, со мэ думинава;

²⁴ и дыкх, ци исын, саво́ ж фуипэ́н дрэ ма́ндэ, и лы́джа ман дро ве́чно джиибэ́н.