Psalmy 135 - Библия - Пэ Балтитко Романи чиб (Романэс) 2019

¹ Аллилуя! Шарэ́н Рас-Дэвлэ́с! Шарэ́н тумэ́ Ра́скирэ-Дэвлэ́скирэ писха́рья,

² савэ́ исын тэрдэ́ дро Ра́скирэ-Дэвлэ́скиро Кхэр дрэ грэды (дворы) кэ амарэ́ Дэвлэ́скиро Кхэр.

³ Шарэ́н Рас-Дэвлэ́с; пал-дова́ со Ёв исын лачхо́! Бага́н псалмы Лэ́скирэ лавэ́скэ, пал-дова́ со Ёв исын дро́го.

⁴ Ёв выкэдыя́ Яково́с ваш Пэ́скэ, а Израилё сыр Пэ́скиро миштыпэ́н.

⁵ Пал-дова́ со мэ джино́м, со Рай Дэвэ́л исын баро́ и амаро́ Рай Дэвэ́л исын вучэды́р сарэ́ дэвлорэндыр.

⁶ Рай Дэвэ́л кэрэ́ла саро́, со Лэ́скэ закамэлапэ, ци пэ болыбэ́н, ци пэ пхув, ци дрэ мо́ри (дэрьява́), ци дрэ сарэ́ хор штэ́ты.

⁷ Ёв кэрэ́ла адя́кэ, со о́блоки ґаздэ́напэ пхувья́кирэ ягорэндыр; Ёв кэрэ́ла адя́кэ со джа́на блискави́цы брышындэса, Ёв янэ́ла балваля Пэ́скирэ складэндыр.

⁸ Ёв хасякирдя́ пэрвонэс, кон бияндёла ци манушэ́ндэ ци кхэритконэ́ мурдалэ́ндэ (машки́р ското) дро Еги́пто;

⁹ Ёв бичхадя́ знаме́нии (ґертыка́) и ди́вы машки́р Ту́тэ, о Еги́пто, пэ Фараоностэ и сарэ́ Лэ́скирэ дынарьендэ?

¹⁰ Ёв хасякирдя́ барэ́ Наюды́тка на́цыи и мулякирдя́ бут кралье́н:

¹¹ Сигонос, Аморее́нгирэ крали́с, Огос, Васаноскирэ крали́с и сарэ́ Ханааноскирэ кралипэна́.

¹² И Ёв дыя́ лэ́нгири пхув сыр мэкно́ миштыпэ́н Пэ́скирэ манушэ́нгэ Израилёстыр.

¹³ О, Раё Дэ́вла! Тыро́ лав ячэ́лапэ пэ сарэ́ ве́ки! О, Раё Дэ́вла! Рипирибэ́н пал Ту́тэ исын родо́стыр кэ ро́до.

¹⁴ Пал-дова́ со Рай Дэвэ́л явэ́ла тэ сэндякирэ́л Пэ́скирэ манушэ́н, и Ёв явэ́ла лачхэ́-дескиро кэ Пэ́скирэ писха́рья.

¹⁵ Наюдытконэ́-нацыенгирэ и́долы исын рупэ́стыр и сувнака́стыр, манушэ́нгирэ васта́ кэрдэ́ лэн:

¹⁶ лэ́ндэ исын муя́, нэ ёнэ на пхэнэ́на нисо́, лэ́ндэ исын якха́, нэ ёнэ на дыкхэ́на;

¹⁷ лэ́ндэ исын кана́, нэ ёнэ на шунэ́на, и нанэ пхурд (дыханиё) лэ́нгирэ мо́стыр.

¹⁸ Мэк одолэ́, савэ́ кэрдэ́ лэн, тэ явэ́н дасавэ́-паць сыр лэ́нгирэ и́долы; и сарэ́ яви́р мануша́, савэ́ ужакирэ́на лачхипэ́н далэ́ статулэ́ндыр (статуендыр).

¹⁹ Мануша́лэ Израилёскирэ кхэрэ́стыр! Тумэ́ тэ вышарэн и тэ парикирэ́н Ра́скэ-Дэвлэ́скэ! Ароноскиро кхэр! Тэ вышарэн тумэ́ и тэ парикирэ́н Ра́скэ-Дэвлэ́скэ!

²⁰ Мануша́лэ Левиёскирэ кхэрэ́стыр! Тэ вышарэн тумэ́ и тэ парикирэ́н Ра́скэ-Дэвлэ́скэ! Тумэ́, савэ́ дарэ́на Ра́стыр-Дэвлэ́стыр, тэ вышарэн и тэ парикирэ́н Ра́скэ-Дэвлэ́скэ!

²¹ Тэ вышарэн и тэ парикирэ́н Ра́скэ-Дэвлэ́скэ Сионо́стыр, Саво́ дживэ́ла кэ Ерусалимо! Аллилуя!