Psalmy 132 - Библия - Пэ Балтитко Романи чиб (Романэс) 2019

¹ Гилы́ анги́л Кхангири́. Раё Дэ́вла! Ри́пир Давидо́с и саро́ лэ́скиро пхарипэ́н,

² сыр ёв совлахадя́ Ра́скэ-Дэвлэ́скэ и дыя́ совла́х, Екхорэскэ Яковоскирэскэ, Зоралыпнаскирэ Дэвлэ́скэ:

³ “Мэ на джа́ва дрэ ша́тра мирэ́ кхэрэ́скири, мэ на пасёвава упрэ́ мирэ́-чхуибнаскири пэ цэ́рга,

⁴ мэ на да́ва мирэ́ якхэнгэ тэ совэн, мэ адя́кэ-паць на да́ва ли́ндра (тэ на дреминав) мирэ́ цымблэнгэ (ресницэнгэ),

⁵ анги́л дова́, сыр мэ латхава штэ́то Ра́скэ-Дэвлэ́скэ, ша́тра, Яково́скирэ Зоралыпнаскирэ Дэвлэ́скэ.

⁶ Амэ шундя́м пал лэ́стэ кэ Ефрафо, амэ латхям лэс пэ Иаримоскирэ (Яримоскирэ) фэ́лды.

⁷ Явэ́н, даса́ патыв пэ чанга́ пашыл Лэ́скирэ ша́тры, явэ́н даса паты́в пэ чанга́ пашы́л Лэ́скирэ ґэра́.

⁸ Яв, Раё Дэ́вла, пэ Тыро́ штэ́то тэ откхинёс, Ту, и Тыро́ ковчэго (мохто́) Законоса, со сыкавэ́ла Тыро́ зоралыпэ́н.

⁹ Мэк тэ урьен Тырэ́ рашая́ пэ пэ́стэ чачипэ́н, мэк тэ радынэ́нпэ зоралэ́с Тырэ́ свэ́нта.

¹⁰ На рисёв криг Пэ́скирэ Помакхнэ манушэ́стыр пал Давидо́стэ, Тырэ́ писхаристэ.

¹¹ Ту совлахадян чачипна́са Давидо́скэ, со Ту на рисёса криг Лэ́стыр: “Мэ чхува́ва пэ троно Тырэ́ чхавэ́с.

¹² Ко́ли Тырэ́ чхавэ́ явэ́на тэ рикирэнпэ кэ Миро Зако́но и кэ Мирэ́ допхэныбэна, савэ́нгэ Мэ ява́ва тэ сыклякирав лэн, тэды и лэ́нгирэ чхавэ́ адя́кэ-паць явэ́на тэ бэшэ́н пэ троно пэ сарэ́ ве́ки.”

¹³ Рай Дэвэ́л выкэдыя́ бэ́рга Сио́но, сави́ яця́ дро́го Лэ́скэ, соб (кай) тэ дживэ́л одо́й:

¹⁴ “Дава́ исын Миро штэ́то тэ откхинёвав пэ сарэ́ ве́ки, мэ ява́ва тэ джива́в ада́й, пал-дова́ со ёй яця́ дро́го Ма́нгэ.

¹⁵ Мэ, чачэс, бахтякирава ла́киро хабэ́н, Мэ да́ва чалэ́с чорорэ́ манушэ́нгэ;

¹⁶ и Мэ урьявава ла́кирэ раша́н зракхибнаса и ла́кирэ свэ́нта явэ́на тэ дэн го́дла радыма́са.

¹⁷ Мэ кэра́ва адя́кэ, со выбарьёла Давидоскири зор дрэ чхавэ́стэ, Мэ кэра́ва момолы́тко (свети́льнико) Мирэ́ Помакхнэскэ.

¹⁸ Мэ урьявава лэ́скирэ вэргэ́н ладжаипнаса; нэ лэ́скири вя́нка (коро́на) явэ́ла тэ зяинэл пэ лэ́стэ.”