Psalmy 119 - Библия - Пэ Балтитко Романи чиб (Романэс) 2019

¹ Бахталэ́ исын одолэ́, савэнгиро джиибэ́н исын би дошэнгиро, савэ́ дживэ́на пир Ра́скирэ-Дэвлэ́скиро Зако́но.

² Бахталэ́ исын одолэ́, савэ́ рикирэнапэ кэ Лэ́скирэ допхэныбэна, савэ́ родэ́на Лэс сарэ́ илэ́стыр.

³ Ёнэ адя́кэ-паць на кэрэ́на начачипэ́н: ёнэ псирэ́на Лэ́скирэ дромэ́нца.

⁴ Раё Дэ́вла! Ту припхэндян ракхипныткэс тэ ракхэ́н Тырэ́ упхэныбэна́,

⁵ соб (кай) тэ лыджа́н ман мирэ́ дрома́ пир Тырэ́ стату́ты (уставы).

⁶ Тэ́ньци мэ на ява́ва ладжакирдо́, ке́ли мэ ява́ва тэ дыкха́в илэ́стыр пэ Тырэ́ припхэныбэна́.

⁷ Ке́ли мэ уджинава Тыро́ чачипна́скиро сэ́ндо, тэды мэ ява́ва тэ парикира́в Ту́кэ сарэ́ илэ́стыр.

⁸ Мэ ява́ва тэ ракхав Тырэ́ стату́ты: на мэк ман сарэ́са.

⁹ Сыр могинэ́ла тэрно́ ману́ш тэ дживэ́л би дошэнгиро? Ке́ли ёв явэ́ла тэ рикирэлпэ кэ Тыро́ лав.

¹⁰ Мэ родыём Тут сарэ́ мирэ́ илэ́са: на домэк, соб (кай) мэ тэ псирав кригал Тырэ́ припхэныбнэндыр.

¹¹ Мэ гарадём Тыро́ лав дро пэ́скиро ило́, соб (кай) ма́нгэ тэ на кэра́в грэ́хи проти Ту́тэ.

¹² Тэ шарэ́н зоралэ́с и тэ парикирэ́н Ту́кэ, о Раё Дэ́вла! Сыкля́кир ман Тырэ́ припхэныбнэнгэ.

¹³ Мирэ́ уштэ́нца мэ пхэндём сарэ́нгэ пал сарэ́ чачипэна́, со Ту пхэндя́н.

¹⁴ Мэ радындёмпэ джиибнастыр пир Тырэ́ нарипирибэна адя́кэ-паць, сыр барэ́ барвалыпнастыр.

¹⁵ Мэ ява́ва тэ розлав Тырэ́ упхэныбэна́ и мэ ява́ва тэ думинав зоралэ́с пал Тыро́ сыклякирибэ́н.

¹⁶ Мэ ява́ва тэ бахталёвав Тырэ́ статутэндыр, мэ на бистрава Тыро́ лав.

¹⁷ Кэр лачхипэ́н Тырэ́ писхари́скэ, соб (кай) ма́нгэ сашты́ тэ явэ́л тэ джива́в, и мэ ява́ва тэ ракхав Тыро́ лав.

¹⁸ Отпхандэ мирэ́ якха́ и мэ ява́ва тэ дыкха́в ди́вна рэ́нды Тырэ́ Законо́стыр.

¹⁹ Мэ сом чу́жо ману́ш пэ пхув, на гарав Тырэ́ припхэныбэна́ ма́ндыр.

²⁰ Миро ди пхарадёла барэ́ патыва́са кэ Тыро́ чачипэ́н дывэсэ́ и раты́.

²¹ Ту сыкадян банг пхутькирдэнгэ, Ту прокосцян одолэ́н, кон гия́ дрэ риг Тырэ́ припхэныбнэндыр.

²² Лэ криг ма́ндыр банг и ладж, пал-дова́ со мэ приракхцём Тыро́ пририпирибэн.

²³ Тхага́рья (кня́зи) адя́кэ-паць бэшнэ́ и ракирэ́на пэ ма́ндэ, нэ Тыро́ писха́ри розлэла Тырэ́ зако́ны.

²⁴ Тыро́ пририпирибэн адя́кэ-паць радынэла ман и дэ́ла годыпэ́н ма́нгэ.

²⁵ Миро ди пририкирдо зоралэ́с кэ пра́хо; джидякир ман пир Тыро́ лав.

²⁶ Мэ пхэндём анги́л сарэ́ндэ, со мэ кэрдём и Ту отпхэндян ма́нгэ.

²⁷ Кэр, соб (кай) мэ тэ ґалёвав Тырэ́ упхэныбэна́ и мэ ява́ва тэ розлав Тырэ́ ди́вна бутя́.

²⁸ Миро ди калёла, зораля́кир ман Тырэ́ лавэ́са.

²⁹ Лэ криг ма́ндыр хохаибэ́н и сыка́в Тыри́ ла́ска пир Тыро́ Зако́но.

³⁰ Мэ выкэдыём чачипна́скиро дром, и мэ рискирдём годы́ кэ Тыро́ чачипэ́н.

³¹ Мэ пририкиравпэ кэ Тыро́ допхэныбэ́н, о Раё Дэ́вла, на ладжакир ман.

³² Мэ прастава дромэ́са пир Тырэ́ припхэныбэна́, ке́ли Ту дыя́н зор мирэ́ илэскэ.

³³ Сыкля́кир ман, Раё Дэ́вла, Тырэ́ стату́ты, и мэ ява́ва тэ рискирав годы́ кэ ёнэ кэ (ко́нцо) яго́ро.

³⁴ Кэр, соб (кай) мэ тэ ґалёвав лэн и мэ ява́ва тэ рикиравпэ зоралэ́с кэ Тыро́ Зако́но и мэ ява́ва тэ приракхав лэс сарэ́ мирэ́ илэ́са.

³⁵ Кэр, соб (кай) мэ тэ псирав дромэ́са пир Тырэ́ припхэныбэна́, пал-дова́ со лэ́ндыр мэ бахталёвава.

³⁶ Бандякир миро ило́ кэ Тыро́ нарипирибэн, а на кэ ґалкима.

³⁷ Ри́скир мирэ́ якха́ тэ на дыкха́в ма́нгэ пэ хартытка (фальшыва) рэ́нды, дэ ма́нгэ джиибэ́н тэ джав Тырэ́ дромэ́са.

³⁸ Дэ зор Тырэ́ лавэ́скэ ваш Тырэ́ писхари́скэ, лав, саво́ сыс дыно́ одолэ́нгэ, савэ́ дарэ́на Ту́тыр.

³⁹ Ри́скир криг ма́ндыр мири́ ладж, савья́тыр мэ дарава, пал-дова́ со Тыро́ сэ́ндо исын чачуно́.

⁴⁰ Ѓа́да, мэ тырдавапэ кэ Тырэ́ упхэныбэна́, дэ ма́нгэ джиибэ́н пир Тыро́ чачипэ́н.

⁴¹ Мэк тэ явэ́л кэ мэ Тыри́ лачхэ́-илы́ткима, Раё Дэ́вла, зра́кх ман пир Тыро́ лав.

⁴² И мэ отпхэнава одолэ́скэ, кон обракирэла ман, пал-дова́ со мэ зоралэ́с патя́ва Тырэ́ лавэ́скэ.

⁴³ На отлэ сарэ́са чачипна́скиро лав мирэ́ мо́стыр, пал-дова́ со мэ древа́н ужакирдём лачхипэ́н Тырэ́ сэндостыр.

⁴⁴ И мэ ўса́ды (сак) ява́ва тэ ракхав Тыро́ Зако́но и пэ сарэ́ ве́ки.

⁴⁵ И мэ ўса́ды (сак) ява́ва тэ псирав пир во́ля, пал-дова́ со мэ родава Тырэ́ упхэныбэна́.

⁴⁶ И мэ ява́ва тэ ракира́в пал Тырэ́ досыкаибэна анги́л кралье́ндэ, и мэ на ява́ва ладжакирдо́.

⁴⁷ И мэ ява́ва тэ бахталёвав Тырэ́ припхэныбнэндыр, савэ́ ячнэ́.

⁴⁸ И мэ ґазда́ва пэ́скирэ васта́ кэ Тырэ́ припхэныбэна́, савэ́ исын дро́га ма́нгэ, и мэ ява́ва тэ розлав Тырэ́ стату́ты.

⁴⁹ Ри́пир Тыро́ лав ваш Тырэ́ писхари́скэ, саво́ Ту дыя́н ма́нгэ тэ ужакирав лачхипэ́н.

⁵⁰ Дава́ подрикирэ́ла ман, ке́ли ман притасавэ́на, пал-дова́ со Тыро́ лав дэ́ла джиибэ́н ма́нгэ.

⁵¹ Пхутькирдэ́ джинэ́ холямэ́с санапэ би меракиро, нэ мэ на рисиём дрэ риг Тырэ́ Законо́стыр.

⁵² Мэ рипирава Тырэ́ сэнды ґаратунэ́ бэршэ́ндыр, о Раё Дэ́вла, адя́кэ мэ подрикирава пэс.

⁵³ Холякири зор лэ́ла упралыпэ́н пэ ма́ндэ, ке́ли мэ дыкха́ва, сыр фуй мануша́ мэкэ́на Тыро́ Зако́но.

⁵⁴ Пал Тырэ́ стату́ты мэ багава гиля́ дро кхэр, пашы́л саво́ мэ лодава.

⁵⁵ Мэ рипиравас Тыро́ лав раты́, о, Раё Дэ́вла, и мэ ракхцём Тыро́ Зако́но.

⁵⁶ Дава́ исын дыно́ ма́нгэ, соб (кай) мэ тэ рикиравпэ зоралэ́с кэ Тырэ́ припхэныбэна́.

⁵⁷ Мири́ до́ля Ту́тыр, о Раё Дэ́вла, сыр мэ пхэндём, исын дро дова́, соб (кай) ма́нгэ тэ рикиравпэ зоралэ́с кэ Тырэ́ лава́.

⁵⁸ Мэ родыём Тыри́ ла́ска сарэ́ мирэ́ илэ́са: яв лачхэ́-дескиро кэ мэ пир Тыро́ лав.

⁵⁹ Мэ роздуминдём хор пал дова́, сыр мэ дживавас и мэ рискирдём миро пиро́ (стопа) кэ Тырэ́ досыкаибэна.

⁶⁰ Мэ стариндёмпэ сыгэды́р, соб (кай) ма́нгэ тэ на отчхував дурэды́р тэ сполнинав Тырэ́ припхэныбэна́.

⁶¹ Фуй мануша́ сы́рбы шэлэнца обпхандлэ́ трусця́л ман, нэ мэ на бистырдём Тыро́ Зако́но.

⁶² Дрэ пашрат мэ уштава тэ парикира́в Ту́кэ пал Тыро́ чачуно́ сэ́ндо.

⁶³ Мэ сом дру́го (мал) сарэ́нгэ, кон дарэ́ла Ту́тыр, и кодолэ́нгэ, савэ́ рикирэнапэ кэ Тырэ́ упхэныбэна́.

⁶⁴ О, Раё Дэ́вла! Пхув исын пхэрды́ Тырэ́ дрогонэ́ лачхипна́са: сыкля́кир Ман Тырэ́ статутэнгэ.

⁶⁵ Ту кэрдя́н лачхипэ́н Тырэ́ писхари́скэ, о Раё Дэ́вла, пир Тыро́ лав.

⁶⁶ Сыкля́кир ман кучэс тэ сэндякирав пир Тыро́, пал-дова́ со мэ патя́ва Тырэ́ припхэныбнэнгэ.

⁶⁷ Анги́л дова́, сыр Ту притасадян ман, мэ хохадёмпэ, нэ какана́ мэ ракхава Тыро́ лав.

⁶⁸ Ту сан лачхо́ и кэрэ́са лачхипэ́н, сыкля́кир ман Тырэ́ статутэ́нгэ.

⁶⁹ Пхутькирдэ́ пэфроми хохадэ пэ ма́ндэ: мэ ж ява́ва тэ рикиравпэ кэ Тырэ́ упхэныбэна́ сарэ́ мирэ́ илэ́стыр.

⁷⁰ Лэ́нгиро ило́ исын тхуло, на шунэ́ла нисо́, нэ ма́нгэ исын древа́н дро́го Тыро́ Зако́но.

⁷¹ Ту пририкирдян ман ваш миро лачхипэ́н, соб (кай) ма́нгэ тэ высыклёвав Тырэ́ стату́ты.

⁷² Тыро́ Зако́но исын бут фэды́р ма́нгэ, сыр бара́ котэра́ сувнака́стыр ци рупэ́стыр.

⁷³ Тырэ́ васта́ создынэ ман и чхудэ́ ман, дэ ма́нгэ годы́ тэ сыклёвав Тырэ́ припхэныбнэнгэ.

⁷⁴ Одолэ́, савэ́ дарэ́на Ту́тыр, явэ́на зоралэ́с тэ радынэ́нпэ, сыр дыкхэ́на ман, пал-дова́ со мэ ужакирава лачхипэ́н Тырэ́ лавэ́стыр.

⁷⁵ Мэ джино́м (джина́в), о Раё Дэ́вла, со Тыро́ сэ́ндо исын чачуно́, и со Ту тасадян ман пир Тыро́ чачипэ́н.

⁷⁶ Мэк тэ явэ́л Тыри́ лачхэ́-илы́ткима тэ подрикирэ́л ман, Тырэ́ писхари́с, пир Тыро́ лав.

⁷⁷ Мэк тэ явэ́л кэ мэ Тыри́ лачхэ́-илы́ткима, соб (кай) мэ могинавас тэ джива́в, пал-дова́ со мэ бахталёвава Тырэ́ Законо́стыр.

⁷⁸ Мэк пхутькирдэ́ тэ явэ́н ладжакирдэ́, пал-дова́ со ёнэ пэфроми кэрдэ́ хохаибэ́н пэ ма́ндэ: нэ мэ ж ява́ва тэ розлав Тырэ́ упхэныбэна́.

⁷⁹ Мэк одолэ́, савэ́ дарэ́на Ту́тыр, тэ явэ́н кэ мэ, и сарэ́ одолэ́, кон джинэ́ла Тырэ́ досыкаибэна.

⁸⁰ Мэк тэ явэ́л миро ило́ бидошэ́нгиро дрэ Тырэ́ стату́ты, соб (кай) ма́нгэ тэ на явэ́л ладжаво.

⁸¹ Миро ди мулёла пал Тыро́ зракхибэ́н, мэ ужакирава лачхипэ́н Тырэ́ лавэ́стыр.

⁸² Мирэ́ якха́ хасёна со дывэ́с би – Тырэ́ лавэскиро, сы́рбы камэ́на тэ пхэнэ́н: “Ке́ли Ту подрикирэса ман?”

⁸³ Пал-дова́ со мэ сом сы́рбы цыпитко гоно́ пэ пхув, нэ мэ на бистырдём Тырэ́ стату́ты.

⁸⁴ Кицы́ дывэса́ Ту дэ́са Тырэ́ писхари́скэ? Ке́ли Ту сэндякирэса одолэ́н, савэ́ традэ́на ман?

⁸⁵ Пхутькирдэ́ мануша́, савэ́ на рикирэнапэ кэ Тыро́ Зако́но, выґанадэ ґанбиня́ (ямы) ма́нгэ.

⁸⁶ Сарэ́ Тырэ́ припхэныбэна́ исын патяибнытка, мануша́ традэ́на ман на пир чачипэ́н: дэ васт ма́нгэ.

⁸⁷ Ёнэ на́бут со на хасякирдэ́ ман пэ пхув; нэ мэ на мэкцём Тырэ́ упхэныбэна́.

⁸⁸ Зоралякир ман пир Тыри́ лачхэ́-илы́ткима, и мэ ява́ва тэ рикиравпэ кэ упхэныбэна́ Тырэ́ мо́стыр.

⁸⁹ О Раё Дэ́вла! Пэ сарэ́ ве́ки Тыро́ лав ячэ́лапэ пэ болыбэ́н!

⁹⁰ Тыро́ патяибэ́н пириджала екхэ родо́стыр кэ яви́р: Ту зачхудян пхув и ёй усады (сак) ячэ́лапэ адя́кэ.

⁹¹ Саро́ исын тэрдо́ пир Тыро́ статутно упхэныбэ́н кэ/жы́ко ададывэ́с, пал-дова́ со ёнэ сарэ́ дынаринэна Ту́кэ.

⁹² Тэ на бахталёвавас мэ Тырэ́ Законо́стыр, тэ́ньчи мэ хасёвавас дро миро калыпэ́н.

⁹³ Мэ ние́кхвар на бистрава Тырэ́ упхэныбэна́, пал-дова́ со Ту подрикирдян ман лэ́нца.

⁹⁴ Мэ сом Тыро́, зра́кх ман; пал-дова́ со мэ родыём Тырэ́ упхэныбэна́.

⁹⁵ Фуй мануша́ ужакирдэ пэ ма́ндэ тэ хасякирэ́н ман, нэ мэ ява́ва тэ розлав Тырэ́ пририпирибэна.

⁹⁶ Мэ дыкхцём ко́нцо (яго́ро) сарэскэ, со исын бидошэ́нгиро, нэ Тыро́ припхэныбэ́н исын би меракиро.

⁹⁷ О, ма́нгэ пир ило́ Тыро́ Зако́но. Мэ розлава лэс дывэсэ́ и раты́.

⁹⁸ Ту кэрдя́н ман годэдыр мирэ́ вэргэ́ндыр пир Тырэ́ припхэныбэна́, пал-дова́ со ёнэ исын усады (сак) ма́нца.

⁹⁹ Мэ ґалёвава буты́р сыклякирибнаскирьендыр, пал-дова́ со мэ розлава Тырэ́ пририпирибэна.

¹⁰⁰ Мэ ґалёвава буты́р пхурэ́ манушэ́ндыр, пал-дова́ со мэ рискирдём годы́ кэ Тырэ́ упхэныбэна́.

¹⁰¹ Мэ рикирдём дрэ риг мири́ ґэро́й кажнонэ́ чорэ́ дромэ́стыр, соб (кай) тэ приракхав Тырэ́ упхэныбэна́.

¹⁰² Мэ на рисиём криг Тырэ́ сэндостыр, пал-дова́ со Ту сыклякирдян ман.

¹⁰³ Сыр гудло́ исын дро миро муй Тырэ́ лавэ́ндыр. Ёнэ исын гудлэдыр авгинэстыр мирэ́ москэ.

¹⁰⁴ Тырэ́ упхэныбнэндыр мэ лыём тэ ґалёвав, пал-дова́ со мэ бидыкхава кажно начачуно дром.

¹⁰⁵ Тыро́ лав исын момолы́тко (свети́льнико) мирэ́ ґэрьякэ, и дуд пэ миро дром.

¹⁰⁶ Мэ совлахадём и мэ допхэнава дава́, со мэ рикиравапэ зоралэ́с кэ Тыро́ чачуно́ сэ́ндо.

¹⁰⁷ Мэ сом древа́н притасадо, о Раё Дэ́вла, джидякир ман пир Тыро́ лав.

¹⁰⁸ Мэ манга́ва, о Раё Дэ́вла, тэ прилэс Мирэ́-москиро парикирибэн Ту́кэ сыр свэ́нто дыибэ́н; и сыкля́кир Ман Тырэ́ сэндоскэ.

¹⁰⁹ Миро джиибэ́н исын усады (сак) дро миро васт, нэ мэ на бистрава Тыро́ Зако́но.

¹¹⁰ Чорэ́ мануша́ кэрдэ́ фэлы́ пэ ма́ндэ, нэ мэ на рисиём дрэ риг Тырэ́ упхэныбнэндыр.

¹¹¹ Мэ прилыём Тыро́ досыкаибэн сыр миштыпэ́н пэ сарэ́ ве́ки, пал-дова́ со ёнэ радынэна миро ило́.

¹¹² Мэ прилыём мирэ́ илэ́са тэ кэрэ́л усе́нде (везде) саро́ пир Тырэ́ стату́ты кэ са́мо ко́нцо (яго́ро).

¹¹³ Мэ бидыкхав дуемуенгирэ манушэ́н, нэ ма́нгэ исын дро́го Тыро́ Зако́но.

¹¹⁴ Пал Ту́тэ мэ гарадёвава, и мэ зракхавапэ сыр пал шчы́то, мэ ужакирава лачхипэ́н Тырэ́ лавэ́стыр.

¹¹⁵ Дурьён криг ма́ндыр, тумэ́-чорэ́ мануша́лэ. Мэ ява́ва тэ рикиравпэ кэ Дэвлэ́скирэ припхэныбэна́.

¹¹⁶ Подрикир ман Тырэ́ лавэ́са, соб (кай) ма́нгэ сашты́ тэ явэ́л тэ джива́в, соб (кай) мэ тэ на явав ладжакирдо́ долэ́стыр, со́стыр мэ ужакирава лачхипэ́н.

¹¹⁷ Подрикир зоралэ́с ман и мэ зракхавапэ, и мэ ўса́ды (сак) ява́ва тэ рискирав годы́ кэ Тырэ́ стату́ты.

¹¹⁸ Ту на прилэса одолэ́н, савэ́ гинэ́ дрэ риг Тырэ́ статутэндыр, пал-дова́ со лэ́нгиро хохаибэ́н нисо́ на дэ́ла.

¹¹⁹ Ту гинэса пал ґнэё (гноё) сарэ́н чорэ́ манушэ́н пэ дая́ пхув, палдава́ ма́нгэ исын дро́га Тырэ́ пририпирибэна.

¹²⁰ Мири́ лоч (плоть) издрала дара́тыр анги́л Ту́тэ; ма́ндэ исын трашаибэ́н анги́л Тыро́ сэ́ндо.

¹²¹ Мэ кэрдём пир Зако́но и чачипэ́н, на мэк ман пэ одолэ́ндэ, савэ́ традэнапэ пал ма́ндэ.

¹²² Затэрдёв пал Тырэ́ дынаристэ ваш лэ́скиро лачхипэ́н, на мэк, соб (кай) пхутькирдэ́ тэ притасавэн ман.

¹²³ Мирэ́ якха́ мулёна со дывэ́с, ке́ли Ту зракхэ́са ман, и ёнэ махтынэна пал Тыро́ чачипна́скиро лав.

¹²⁴ Отлыджапэ Тырэ́ писхариса пир Тыри́ лачхэ́-илы́ткима и сыкля́кир ман Тырэ́ статутэнгэ.

¹²⁵ Мэ сом Тыро́ писха́ри, дэ годы́ ма́нгэ тэ джина́в Тырэ́ пририпирибэна.

¹²⁶ Дава́ исын Тыро́ часо, Раё Дэ́вла, тэ кэрэ́с вари-со, пал-дова́ со мануша́ пхагирдэ́ Тыро́ Зако́но.

¹²⁷ Палдава́ Тырэ́ припхэныбэна́ исын дрогэдыр сувнака́стыр, фэды́р чачунэ́ сувнака́стыр.

¹²⁸ Палдава́ мэ гиндём Тырэ́ упхэныбэна́ пир саро́, сыр най чачунэдыр: мэ бидыкхава какана́ начачуно дром.

¹²⁹ Тырэ́ досыкаибэна исын древа́н дро́га, палдава́ миро ди рикирэ́лапэ зоралэ́с кэ ёнэ.

¹³⁰ Дова́, со сыкавэ́на Тырэ́ лава́, дэ́ла дуд и сыклякирэ́ла манушэ́н, савэ́ ишчо (инкэ́) на́бут джинэ́на.

¹³¹ Мэ отпхандём муй и дрэ смэга/труш (жажда) дава́ ґондя́, пал-дова́ со мэ тырдавапэ кэ Тырэ́ припхэныбэна́.

¹³² Рисёв мо́са кэ мэ и яв лачхэ́-дескиро кэ мэ, сыр Ту бут мо́лы кэрэ́са одолэ́нгэ, савэ́нгэ исын дро́го Тыро́ лав.

¹³³ Мамуякир (выпрямин) мирэ́ пирэ́ (сто́пы) тэ джав пир Тыро́ лав и на домэк, соб (кай) чорэ́ мануша́ тэ хулаинэн пэ ма́ндэ.

¹³⁴ Выракх ман манушэ́ндыр, савэ́ притасавэ́на ман, и мэ ява́ва тэ рикиравпэ кэ Тырэ́ упхэныбэна́.

¹³⁵ Мэк тэ зяинэл Тырэ́-москиро дуд пэ Тырэ́ писхаристэ, и сыкля́кир ман Тырэ́ статутэнгэ.

¹³⁶ Ясва сыр панинга́ тхадэна мирэ́ якхэ́ндыр, пал-дова́ со мануша́ на рикирэнапэ кэ Тыро́ Зако́но.

¹³⁷ Ту сан чачипна́скиро, о Раё Дэ́вла, и Тырэ́ сэнды исын чачунэ́.

¹³⁸ Ту дыя́н Пэ́скирэ чачунэ́ досыкаибэна; ёнэ исын древа́н патяибнытка.

¹³⁹ Миро зэвлэныпэн хачкирдя́ сыр яг ман, пал-дова́ со мирэ́ вэ́рги бистырдэ Тыро́ лав.

¹⁴⁰ Тыро́ лав исын древа́н пропатякирдо, и Тыро́ писха́ри выкэдэ́ла лэс.

¹⁴¹ Мэ сом тыкно́ и сом дрэ тыкны паты́в, нэ мэ на бистырдём Тырэ́ упхэныбэна́.

¹⁴² Тыро́ чачипэ́н явэ́ла ўса́ды (сак) чачипна́скиро, и Тыро́ Зако́но исын чачуно́.

¹⁴³ Пхарипэ́н и би́да пирилынэ ман: нэ мэ бахталёвава Тырэ́ припхэныбнэндыр.

¹⁴⁴ Тырэ́ досыкаибэна исын чачипнаскирэ пэ сарэ́ ве́ки: дэ годы́ ма́нгэ, и мэ ява́ва тэ джива́в.

¹⁴⁵ Мэ кхара́ва зоралэ́с сарэ́ мирэ́ илэ́стыр, о Раё Дэ́вла, отпхэн ма́нгэ: мэ ява́ва тэ рикиравпэ зоралэ́с кэ Тырэ́ стату́ты.

¹⁴⁶ Мэ кхара́ва Тут: зра́кх ман и мэ ява́ва тэ рикиравпэ кэ Тырэ́ припхэныбэна́.

¹⁴⁷ Мэ ґаздавапэ пэ са́мо зло́ко тасярла́киро анги́л дывэ́с и мэ да́ва го́дла тэ помогинэн: мэ ужакирава лачхипэ́н Тырэ́ лавэ́стыр.

¹⁴⁸ Мирэ́ якха́ исын джангадэ анги́л рати́тко стрэ́га, соб (кай) ма́нгэ тэ розлав Тыро́ лав.

¹⁴⁹ Вышу́н мири́ зан пир Тыри́ лачхэ́-илы́ткима: о Раё Дэ́вла, джидякир ман пир Тыро́ сэ́ндо.

¹⁵⁰ Одолэ́, савэ́ чорьёнапэ холя́са пал ма́ндэ, явнэ́ пашылэды́р: ёнэ исын дур Тырэ́ Законо́стыр.

¹⁵¹ Ту сан пашы́л, о Раё Дэ́вла, и сарэ́ Тырэ́ припхэныбэна́ исын чачунэ́.

¹⁵² Ѓара мэ уджиндём Тырэ́ допхэныбнэндыр, со Ту учхудян лэн пэ сарэ́ ве́ки.

¹⁵³ Дыкх ракхунэс, сыр ма́нгэ исын пхаро́ и зра́кх ман, пал-дова́ со мэ на бистырдём Тыро́ Зако́но.

¹⁵⁴ Затэрдёв зоралэ́с пал миро чачипэ́н и выракх ман, джидякир ман пир Тыро́ лав.

¹⁵⁵ Чорэ́ мануша́ исын дур зракхибнастыр, пал-дова́ со ёнэ на дыкхэ́на цямкэс пэ Тырэ́ стату́ты.

¹⁵⁶ О Раё Дэ́вла, Тыри́ лачхэ́-илы́ткима исын зоралы́; джидякир ман пир Тыро́ чачипэ́н!

¹⁵⁷ Кодолэ́, савэ́ традэнапэ пал ма́ндэ и исын мирэ́ вэ́рги, лэн исын бут; нэ мэ на рисиём дрэ риг Тырэ́ допхэныбнэндыр.

¹⁵⁸ Мэ дыкхцём кодолэ́н, савэ́ дэнапэ палэ и миро ило́ калыя, пал-дова́ со ёнэ на рикирэнапэ кэ Тыро́ лав.

¹⁵⁹ Придыкхпэ, сыр исын дро́га ма́нгэ Тырэ́ допхэныбэна! Раё Дэ́вла, джидякир ман пир Тыри́ лачхэ́-илы́ткима.

¹⁶⁰ Тырэ́ лавэскиро кучипэ́н исын дро чачипэ́н, кажно Тыро́ чачипна́скиро сэ́ндо ячэ́лапэ пэ сарэ́ ве́ки.

¹⁶¹ Тхага́рья (кня́зи) рэсэна вэрги́ткэс кэ мэ би причынакиро, нэ миро ило́ дарэ́ла Тырэ́ лавэ́стыр.

¹⁶² Мэ бахталёвава Тырэ́ лавэ́стыр сы́рбы кодова́ ману́ш, кон латхя́ бари бажын.

¹⁶³ Мэ бидыкхава и дыкха́ва вучипна́стыр пэ кодолэндэ, савэ́ хохавэна, нэ ма́нгэ исын дро́го Тыро́ Зако́но.

¹⁶⁴ Мэ вышарава Тут эфта́ мо́лы пэ дывэ́с пал Тыро́ чачипна́скиро сэ́ндо.

¹⁶⁵ Пхэрдо́ рама́нё (миро) исын кодолэндэ, савэ́нгэ исын дро́го Тыро́ Зако́но и ёнэ на обштавэнапэ пир бар.

¹⁶⁶ О, Раё Дэ́вла! Мэ ужакирдём, соб (кай) Ту тэ зракхэс ман и пир Тырэ́ упхэныбэна́.

¹⁶⁷ Миро ди рикирэ́лапэ кэ Тырэ́ допхэныбэна, савэ́ исын древа́н дро́га ма́нгэ.

¹⁶⁸ Мэ рикиравапэ кэ Тырэ́ припхэныбэна́ и кэ Тырэ́ допхэныбэна, и сарэ́ мирэ́ дрома́ исын анги́л Тырэ́ якха́.

¹⁶⁹ Мэк тэ джал пашылэды́р кэ Ту миро роибэ́н, о Раё Дэ́вла: дэ годы́ ма́нгэ пир Тыро́ лав.

¹⁷⁰ Мэк тэ явэ́л мири́ па́тери (моли́тва) кэ Ту: зра́кх ман пир лав, со Ту дыя́н.

¹⁷¹ Мэк тэ шарэ́н мирэ́ ушта́ Тут, ке́ли Ту сыклякирэса ман Тырэ́ статутэнгэ.

¹⁷² Мэк тэ выпхэнэл зоралэ́с мири́ чиб пал Тыро́ лав, пал-дова́ со Тырэ́ припхэныбэна́ исын чачипнаскирэ.

¹⁷³ Мэк тэ помогинэл Тыро́ васт ма́нгэ, пал-дова́ со мэ выкэдыём Тырэ́ упхэныбэна́.

¹⁷⁴ Мэ тырдавапэ илэ́са, соб (кай) Ту тэ зракхэс ман, о Раё Дэ́вла и мэ бахталёвава Тырэ́ Законо́стыр.

¹⁷⁵ Мэк тэ дживэ́л миро ди и ёв явэ́ла тэ шарэл Тут; мэк тэ дэл васт ма́нгэ Тыро́ чачипэ́н.

¹⁷⁶ Мэ гиём дрэ риг сыр бакри, сави́ нашадыя: придыкхпэ пашылэды́р кэ Тыро́ писха́ри; пал-дова́ со мэ на бистрава Тырэ́ припхэныбэна́.