Psalmy 116 - Библия - Пэ Балтитко Романи чиб (Романэс) 2019

¹ Мэ рикирава сыр Дро́гима Рас-Дэвлэ́с дро ило́, пал-дова́ со Ёв шунэ́ла мири́ зан и миро мангипэ́н Лэ́скэ:

² пал-дова́ со Ёв причхудя кан кэ мэ; мэ ява́ва тэ кхарав Лэс дрэ дывэса́, пака мэ джива́ва.

³ Мэрибэ́н сы́рбы шэлэнца обчхудя́ трусця́л ма́ндэ, и люноскирэ дукха́ пынэ́ пэ ма́ндэ, ма́нгэ яця́ пхаро́ и мэ пыём дро ду́хо (фа́но):

⁴ тэ́ньчи мэ кхардём Ра́скирэ-Дэвлэ́скиро лав: ‘Мэ зоралэ́с манга́ва Тут, Раё Дэ́вла, зра́кх миро ди.’

⁵ Рай Дэвэ́л исын лачхэ́-дескиро и чачипна́скиро, и амаро́ Рай Дэвэ́л исын лачхэ́-илэ́скиро.

⁶ Рай Дэвэ́л приракхэла простонэн: мэ яцём бизорья́киро; и Ёв зракхця́ ман.

⁷ Рисёв тэ откхинёс пэ́скэ, миро ди; пал-дова́ со Рай Дэвэ́л бахтякирдя́ тут.

⁸ Пал-дова́ со Рай Дэвэ́л выракхця миро ди мэрибна́стыр, мирэ́ якха́ ясвэндыр, и мирэ́ ґэра́ пэрибнастыр.

⁹ Мэ ява́ва тэ псирав анги́л Растэ-Дэвлэ́стэ пэ пхув, кай дживэ́на. [ПСАЛМО 115-р.с.]

¹⁰ [1] Мэ патяндыём, палдава́ мэ и пхэндём: “Ман зоралэ́с притасавэнас”

¹¹ [2] Мэ сы́гэс пхэндём пэ́скэ: “Сарэ́ мануша́ исын хоханэ́.”

¹² [3] Со́са мэ отда́ва палэ Ра́скэ-Дэвлэ́скэ пал саро́ лэ́скиро баро́ лачхипэ́н ма́нгэ?

¹³ [4] Мэ ґазда́ва тахта́й (чаша) пал дова́, со Ёв зракхця́ ман и кхара́ва Ра́скирэ-Дэвлэ́скиро лав.

¹⁴ [5] Мэ кэра́ва пир пэ́скири совла́х анги́л Растэ-Дэвлэ́стэ какана́, сыр Лэ́скирэ мануша́ скэдэ́напэ.

¹⁵ [6] Пхаро́ исын Ра́скирэ-Дэвлэ́скирэ якхэнгэ тэ дыкхэ́н мэрибэ́н Лэ́скирэ свэнтонэнгиро.

¹⁶ [7] О, Раё Дэ́вла, мэ чачэс, сом Тыро́ писха́ри, мэ сом Тыро́ писха́ри, Тырэ́-бутярнэнгиро чхаво́: Ту роспхандян мирэ́ пе́нты (кхурья́).

¹⁷ [8] Мэ яна́ва Ту́кэ свэ́нто дыибэ́н (жэ́ртва) парикирибнаса, соб (кай) тэ парикирэ́н Ту́кэ, и мэ ява́ва тэ кхарав Ра́скирэ-Дэвлэ́скиро лав.

¹⁸ [9] Мэ кэра́ва пир пэ́скири совла́х Ра́скэ-Дэвлэ́скэ акана́, сыр Лэ́скирэ мануша́ скэдэ́напэ,

¹⁹ [10] дрэ трэмы Ра́скирэ-Дэвлэ́скиро Кхэр машки́р ту́тэ, Ерусалиме. Аллилуя!