Psalmy 115 - Библия - Пэ Балтитко Романи чиб (Романэс) 2019

¹ [9] На амэн, о Раё Дэ́вла, на амэн, нэ екх Тыро́ Лав трэй тэ шарэ́н, пал-дова́ со Ту сан лачхэ́-илэ́скиро, пал Тыро́ патяибэ́н.

² [10] Со́скэ Наюды́тка на́цыи ракирэ́на? “Кай исын какана́ лэ́нгиро Дэвэ́л?”

³ [11] Нэ амаро́ Дэвэ́л исын пэ болыбэ́н: Ёв кэрдя́ саро́, со Ёв камдя́.

⁴ [12] Нэ лэ́нгирэ и́долы (хоханэ́ дэвлорэ́) исын рупэ́стыр и сувнака́стыр, савэ́ манушэ́нгирэ васта́ кэрдэ́:

⁵ [13] лэ́ндэ исын муй, нэ ёнэ на ракирэ́на; лэ́ндэ исын якха́, нэ ёнэ на дыкхэ́на;

⁶ [14] лэ́ндэ исын кана́, нэ ёнэ на шунэ́на; лэ́ндэ исын накх, нэ ёнэ на сунгэна;

⁷ [15] лэ́ндэ исын васта́, нэ ёнэ нисо́ на могинэ́на тэ кэрэ́н лэ́нца; лэ́ндэ исын ґэра́, нэ ёнэ на псирэ́на; и ёнэ на пхэнэ́на нисо́ пэ́скирэ кирлэса;

⁸ [16] мэк сарэ́, кон кэрдя́ лэн, тэ явэ́н бизорья́кирэ, сыр ёнэ исын; адя́кэ-паць и сарэ́ одолэ́, кон патя́ла дрэ далэ́ и́долы.

⁹ [17] О, Изра́иле! Патя зоралэ́с Ра́скэ-Дэвлэ́скэ; Ёв помогинэла и затэрдёла пал тумэ́ндэ.

¹⁰ [18] Ароноскиро кхэр, патя зоралэ́с Ра́скэ-Дэвлэ́скэ: Ёв помогинэла и затэрдёла пал тумэ́ндэ.

¹¹ [19] Тумэ́, савэ́ дарэ́н Ра́стыр-Дэвлэ́стыр; патя́н зоралэ́с Ра́скэ-Дэвлэ́скэ, Ёв помогинэла и затэрдёла пал тумэ́ндэ.

¹² [20] Рай Дэвэ́л рипирэла пал амэ́ндэ: Ёв бахтякирэ́ла амэн; Ёв бахтякирэ́ла Израилёскиро кхэр, Ёв бахтякирэ́ла Ароноскиро ро́до.

¹³ [21] Ёв бахтякирэ́ла одолэ́н, савэ́ дарэ́на Ра́стыр-Дэвлэ́стыр, тыкнэн и барэн.

¹⁴ [22] Рай Дэвэ́л явэ́ла тэ дэл бутэды́р и бутэды́р чхаворэ́н ту́кэ и тырэ́ чхавэ́нгэ.

¹⁵ [23] Рай Дэвэ́л, Кон создыя́ болыбэ́н и пхув, бахтякирэ́ла тут.

¹⁶ [24] Болыбэ́н исын Ра́скирэ-Дэвлэ́скиро болыбэ́н, нэ Ёв дыя́ пхув манушэ́нгирэ чхавэ́нгэ.

¹⁷ [25] Мулэ́ на шарэна Рас-Дэвлэ́с, адя́кэ-паць ни одолэ́, савэ́ джа́на дро штэ́то, кай исын штыл.

¹⁸ [26] Нэ амэ ява́са тэ бахтякирас Рас-Дэвлэ́с ададывэсатунэ дывэсэ́стыр и пэ сарэ́ ве́ки. Аллилуя.