Psalmy 114 - Библия - Пэ Балтитко Романи чиб (Романэс) 2019

¹ Ке́ли Израилёскирэ мануша́ гинэ́ криг Египто́стыр, а Яково́скиро ро́до гия́ долэ́ манушэ́ндыр, савэ́ ракирдэ́ пэ чу́жо чиб,

² Юдэ́я яця́ Лэ́скирэ свэнтонэ́ штэтоса, а Израилё Лэ́скирэ кралипнаса.

³ Мо́рё (дэрья́в) дыкхця́ и насця, Иорда́но рисия́ палэ;

⁴ бэ́рги ухтынэ сыр бакрэ́, тыкнэ́ бэ́ргицы сыр бакрорэ.

⁵ Со дукхадя тут, море (дэрья́в), со ту нашэса? О, Иорда́не, со ту рисёса палэ?

⁶ Тумэ́, бэргия́лэ, со тумэ́ ухтэна сыр бакрэ́? Ци тумэ́, бэргица́лэ, сыр бакрорэ?

⁷ Издра пхув анги́л Растэ-Дэвлэ́стэ, анги́л Яково́скирэ Дэвлэ́стэ,

⁸ Кон пирикэрдя ска́ла дро панескиро зеро (озеро), кремнё дрэ панескири ґанынгори?