Psalmy 111 - Библия - Пэ Балтитко Романи чиб (Романэс) 2019

¹ Аллилуя. Мэ ява́ва тэ славинав и тэ парикира́в Ра́скэ-Дэвлэ́скэ сарэ́ мирэ́ илэ́са машки́р чачипнаскирэндэ и пэ скэдыибэ́н.

² Савэ барэ́ бутя́ кэрдя́ Рай Дэвэ́л. Сарэ́, конэ́скэ ячнэ́ дро́га ёнэ, камэ́на дава́ тэ ґалён.

³ Саро́, со кэрэ́ла Рай Дэвэ́л, исын патывало и славу́тно, и Лэ́скиро чачипэ́н ячэ́лапэ пэ сарэ́ ве́ки.

⁴ Ёв кэрдя́ адя́кэ, со Лэ́скирэ ди́вы рипирэна. Рай Дэвэ́л исын лачхэ́-дескиро и тангинэла сарэ́н.

⁵ Ёв дэ́ла хабэ́н одолэ́нгэ, кон дарэ́ла Лэ́стыр, Ёв усады (сак) рипирэла Лэ́скиро Зако́но.

⁶ Ёв сыкадя́ зор Лэ́скирэ манушэ́нгэ Пэ́скирэ бутендыр, соб (кай) тэ дэн лэ́нгэ Наюдэнгирэ-нацыенгиро мэкно́ миштыпэ́н.

⁷ Ёв саро́ кэрэ́ла пир патяибэ́н и чачипэ́н; сарэ́ Лэ́скирэ припхэныбэна́ исын патяибнытка:

⁸ ёнэ чхудэ́ кхэтанэ́ пэ сарэ́ ве́ки, ёнэ дынэ́ пир патяибэ́н и чачипэ́н.

⁹ Ёв выракхця Пэ́скирэ манушэ́н, Ёв дыя́ Пэ́скиро Зако́но пэ сарэ́ ве́ки: свэ́нто аж кэ дар исын Лэ́скиро лав.

¹⁰ Кон лэ́ла тэ дарэл Ра́стыр-Дэвлэ́стыр, одова́ лэ́ла годы́ пэ́скэ, а сарэ́ндэ, кон дживэ́ла и кэрэ́ла пир Лэ́скирэ припхэныбэна́, исын лачхи́ годы́. Тэ шарэ́н Лэс пэ сарэ́ ве́ки.