Psalmy 109 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Давидо́скиро Пса́лмо. На яв штыл, о Дэ́вла, сла́ва Ту́кэ!

² Пал-дова́ со чорэ́ и хоханэ́ мануша́ ракирэ́на пэ ма́ндэ: ёнэ роспхэнэна пал ма́ндэ хоханэ́ чиба́са (чибьяса),

³ ёнэ обчхувэна ман, кай камэ́на, хоханэ́ лавэ́нца и холя́са, и ёнэ джа́на марибна́са пэ ма́ндэ би причынакиро.

⁴ Пал миро ило́ ёнэ ячнэ́ ма́нгэ мирэ́ вэ́рги, нэ мэ мангавпэ Дэвлэ́скэ пал лэ́ндэ.

⁵ И мэ дорэсцём лэ́ндыр фуипэ́н пал миро лачхипэ́н, и ёнэ бидыкхэна ман пал мири́ паты́в кэ яви́р.

⁶ Чхув чорэ́ манушэ́с пэ мирэ́ вэргостэ, мэк на́лачхо тэ тэрдёл пэ лэ́скири чачи́ риг;

⁷ ке́ли лэс явэ́на тэ сэндякирэн, мэк тэ приджинэн лэс, со ёв исын банго́;

⁸ мэк лэ́скиро мангипэ́н тэ ячэ́л грэхоса;

⁹ мэк лэ́скирэ дывэса́ тэ явэ́н кротка, соб (кай) яви́р мануша́ тэ лэн лэ́скири буты́;

¹⁰ мэк лэ́скирэ чхавэ́ ўса́ды (сак) тэ мангэ́н дыибэ́н и тэ псирэ́н би штэтоскиро, и тэ родэ́н маро́ дур штэтэ́ндыр, кай вытрадынэ́ лэн;

¹¹ мэк одова́, кон залэла ловэ́ лэ́скэ, тэ чхувэ́л фэлы́ (петля), соб (кай) тэ отлэл саро́ лэ́стыр, и мэк чу́жа мануша́ тэ обчорэн саро́, со ёв закэрдя,

¹² мэк нико́н тэ на сыкавэ́л лачхэ́-илы́ткима анги́л лэ́стэ, мэк нико́н тэ на отлыджалпэ илэ́са кэ лэ́скирэ пиро́ты (сироты),

¹³ мэк лэ́скири сэмэ́нца тэ хасёл, мэк тэ на явэ́н лэ́нгирэ вурмы (фамилии) машки́р яви́р ро́до.

¹⁴ Мэк Рай Дэвэ́л тэ рипирэл чорипэ́н, со кэрдэ́ лэ́нгирэ дада́, мэк грэ́хи, со кэрдэ́ лэ́нгирэ дая́, тэ на явэ́н бистырдэ.

¹⁵ Мэк Рай Дэвэ́л тэ рипирэл лэ́нгирэ грэ́хи, соб (кай) Ёв тэ хасякирэ́л рипирибэ́н пал лэ́ндэ пэ пхув:

¹⁶ пал-дова́ со ёнэ на думиндлэ тэ явэ́н лачхэ́-илэ́скирэ, а ёнэ притасавэнас чорорэн и манушэ́н дрэ трэ́бима; и домарэнас одолэ́н, конэ́стэ калыпэ́н сыс пэ ило́.

¹⁷ Кадава́ ману́ш сыс скэдыно́ тэ прокошэл, и мэк лэ́скиро прокошыбэ́н тэ ячэ́лпэ пэ лэ́стэ. Ёв, кадасаво́ ману́ш, на выпхэндя бахтякирибэ́н, мэк кокоро́ бахтякирибэ́н тэ джал криг лэ́стыр.

¹⁸ И дасаво ману́ш сы́рбы уридя пэ пэ́стэ прокошыбэ́н сыр тхали́к / ку́лько (пиджако), мэк лэ́скиро прокошыбэ́н тэ джал андрэ́ лэ́скирэ виндырья сыр пани́, и сыр дзэт (алеё) дрэ лэ́скирэ кокалы́;

¹⁹ мэк тэ явэ́л лэ́скиро прокошыбэ́н сыр урибэ́н, со ёв чхувэ́ла пэ пэ́стэ, и сыр кусты́к, со́са ёв подпхандэлапэ.

²⁰ Мэк саро́ дава́ тэ явэ́л сыр мазу́ри (награда) Ра́стыр-Дэвлэ́стыр мирэ́ вэргэ́нгэ и явирэ́нгэ, кон ракирдя́ чорипэ́н пэ ма́ндэ.

²¹ Нэ Ту, Дэ́вла, Рае Дэ́вла, помо́гин мангэ ваш Тыро́ лав, зра́кх ман: пал-дова́ со Тыри́ ла́ска исын дро́го.

²² Пал-дова́ со ман притасавэ́на и ма́нгэ исын пхаро́, и миро ило́ исын дукхадо дрэ ма́ндэ.

²³ Сыр зэр (тенё) мэ хасёвава, ке́ли ёй кэрлапэ диндькирдэдыр, ман традэ́на сыр скочкос.

²⁴ Мирэ́ чанга́ ячнэ́ бизорья́кирэ, пал-дова́ со мири́ лоч (плоть) вышуция би тхулыпнаскиро.

²⁵ И кадалэ́ мануша́ обракирэна ман: ёнэ дыкхэ́на пэ ма́ндэ и кунинэна шэрэнца.

²⁶ Помогин ма́нгэ, Раё Дэ́вла, миро Дэ́вла; зра́кх ман пир Тыри́ лачхэ́-илы́ткима:

²⁷ соб (кай) ёнэ тэ джинэ́н, со дава́ исын Тыро́ васт, со Ту, Раё Дэ́вла, кэрдя́н дава́.

²⁸ Мэк ёнэ тэ прокошэн, нэ Ту явэ́са тэ бахтякирэс: ёнэ ґаздэ́напэ пэ ма́ндэ и явэ́на ладжакирдэ́, и Тыро́ писха́ри явэ́ла тэ радынэ́лпэ.

²⁹ Мэк мирэ́ вэ́рги тэ урьен пэ пэ́стэ ладж сыр и́дя, и учхакирэн пэс ладжаса сыр кулькоса (тхаликоса).

³⁰ Мэ ява́ва зоралэ́с тэ парикира́в Ра́скэ-Дэвлэ́скэ мирэ́ мо́са и мэ ява́ва тэ шара́в Лэс машки́р манушэ́ндэ.

³¹ Пал-дова́ со Ёв явэ́ла тэ тэрдёл пир чачи́ риг пашы́л чорорэндэ, Ёв явэ́ла тэ зракхэ́л одолэ́ манушэ́с, савэ́с сэндякирэна.