Psalmy 108 - Библия - Пэ Балтитко Романи чиб (Романэс) 2019

¹ Гилы́ Давидо́скиро Пса́лмо.

² Миро ило́ исын скэдымо: о Дэ́вла! Мэ ява́ва тэ бага́в и тэ шара́в Тут.

³ Джангадён гусли и арфа: мэ джангавава кхам, сыр дывэсёла.

⁴ Мэ ява́ва тэ шара́в Тут машки́р манушэ́ндэ, о Раё Дэ́вла, мэ ява́ва тэ бага́в Ту́кэ машки́р манушыпнаскирэ на́цыи:

⁵ пал-дова́ со Тыри́ лачхэ́-илы́ткима исын вучэды́р болыбна́стыр и Тыро́ патяибэ́н доджа́ла кэ о́блоки.

⁶ Тэ барьякирэл Тут саро́ вучэды́р болыбна́стыр, о Дэ́вла, мэк тэ явэ́л Тыри́ сла́ва вучэды́р пхувья́тыр,

⁷ соб (кай) тэ зракхэнпэ одолэ́, конэ́с Ту выкэдыян Пэ́скэ. Помо́гин (посо́бин) тэ зракхэнпэ Тырэ́ чачэ́ вастэ́са и отпхэн ма́нгэ.

⁸ Дэвэ́л пхэндя́ пэ Пэ́скиро Свэ́нто Штэ́то: “Мэ ґаздавапэ радыма́са, Мэ роскэрава пэ паша́ Сихемо, и Мэ розмеринава Сукотоскиро до́ло.

⁹ Миро исын Галаа́до, и Миро исын Мана́сия, Ефре́мо исын тва́рдыма тэ ракхэ́л Миро шэро́; Юда исын Мирэ́–крали́скиро дэсто́ (жэзло).

¹⁰ Моа́во исын Миро чаро́ москэ (умывальница), Мэ чхурдава Мири́ шкорня пир Эдо́мо: пир Филистимия Мэ ява́ва тэ дав го́дла радыма́са.

¹¹ Кон янэ́ла Ман дро зорало́ фо́ро? Кон лыджа́ла Ман кэ Эдо́мо?

¹² Ци Ту чхурдыян амэн дрэ риг, чачэс, Дэ́вла? Ци Ту на джа́са анги́л амарэ́ халадыбнэндыр?

¹³ Дэ васт тэ тэрдёвав проти пхарипэ́н, палдова со хартытко (подхалимо) исын, ке́ли мануша́ дэ́на васт тэ зракхэн.

¹⁴ [р.с.] Дэвлэ́са амэ кэра́са муршканэ́ рэ́нды; Ёв ростасавэла амарэ́ вэргэн (врогэн)