Psalmy 104 - Библия - Пэ Балтитко Романи чиб (Романэс) 2019

¹ Славин и парикир Ра́скэ-Дэвлэ́скэ, миро ди. О, Раё Дэ́вла, миро Дэвэ́л, Саво́ баро́ Ту сан! Ту учхакирдян Пэс патыва́са и райканэ слава́са.

² Ту сан учхакирдо дудэса (свэтоса) сыр урибнаса, Ту росчхудян трусця́л (кругом) болыбэ́н сыр шатракирэ рига́.

³ Ту чхудя́н бэльки (страпилы) тэл стрэ́ха (чхаки́н) ваш шука́р шту́бы (комо́ры), со исын тэл паня́, Ту кэрдя́н облокэндыр Пэ́скэ марибны́тко вурдэ́н, Ту псирэса ўсендзе (везде) пэ балвалякирэ пхака́,

⁴ Ту создыян Тырэ́ Янголэн духэ́ндыр, Ту создыян Пэ́скэ бутярнэн ягакирэ чибэндыр.

⁵ Ту чхудя́н пхув пэ фунда́менто адя́кэ, со ёй на чилавэлапэ штэто́стыр ние́кхвар.

⁶ Ту учхакирдян пхув хорэ штэтэнца сыр урибнаса; паня́ тэрдинэ́ вучэды́р бэргэндыр.

⁷ Сыр Ту бангякирэса лэн, ёнэ нашлэ, ёнэ дэнапэ тэ прастан Тырэ́-громоскирэ занятыр (глосятыр),

⁸ Ёнэ пириджана бэ́рги, ёнэ змэкэнапэ пэ долы, пэ штэ́ты, со Ту зачхудян ваш лэ́нгэ.

⁹ Ту чхудя́н кусты́к (граница), со ёнэ на пириджана, соб (кай) ёнэ на могиндлэ́ нэвэ́стыр (нэвэ́с) тэ чхакирэн пхув.

¹⁰ Ту кэрэ́са ґанынга́ пане́са дрэ долы, ёнэ тхадэна машки́р бэ́ргицы,

¹¹ ёнэ панякирэна кажнонэ́ рискирибна́скирэ мурдалэс (зверёс), со исын пэ фэ́лда, хрустытко бу́со о́сло (мега́ри) ячэ́ла во́льно пэ́скирэ трушатыр (смэгатыр).

¹² Болыбна́скирэ чирикля́ дживэ́на одо́й пашы́л лэ́ндэ, ёнэ явэ́на тэ дэн го́дла пэ́скирэ рандендыр (вэткэндыр).

¹³ Ту панякирэса бэ́рги Пэ́скирэ упратунэ шукаронэ штубэндыр, пхув исын чалы далэ́ пхабэнца, со Ту барьякирэса.

¹⁴ Ту кэрэ́са адя́кэ, со чар барьёла кхэритконэ́ мурдалэ́нгэ (скотоскэ), и раслины ваш манушэ́нгиро лачхипэ́н, соб (кай) тэ бияндёл хабэ́н пхувья́тыр,

¹⁵ и мол (вино), сави́ веселинэла (лошакирэла) манушэ́скиро ило́, и оливи́тко дзэт, соб (кай) тэ зяинэл манушэ́скиро муй, и маро́, со кэрэ́ла манушэ́с зоралэса.

¹⁶ Ливаноскирэ зоралэды́р кедры, со Ту почхудян, Тырэ́, Ра́скирэ–Дэвлэ́скирэ кашта́, исын пхэрдэ́ соко́са (хумэ́са) и санапэ,

¹⁷ Кай чирикля́ кэрэ́на пэскирэ гня́зды (ку́фы), кай бусло кэрдя́ пэ́скэ кхэроро пэ эгли (ёлки).

¹⁸ А вучэ́ бэ́рги исын ваш миргэнгэ (сарненгэ), барунэ́ крутымы гараибэн ваш шушуенгэ (зайцэнгэ),

¹⁹ Ту создыян чхон тэ сыкавэ́н уляґи (поры); кхам джинэ́ла, ке́ли лэ́скэ трэй тэ заджа́л.

²⁰ Ту кэрдя́н калыпэ́н (цямлыпэ́н) и дава́ исын рат, ке́ли сарэ́ вэшытка рискирибна́скирэ мурдала́ (звери) чорьёна.

²¹ Тэрнэ́ шчэра́ (левы) рыкинэна пал пэ́скиро дорэсыбэ́н, и родэ́на пэ́скиро хабэ́н Дэвлэ́стыр.

²² Кхам уштэ́ла: ёнэ дэнапэ палэ и исын паштэ́ дрэ пэ́скирэ пасибня (ле́жыцы).

²³ Ману́ш выджа́ла пэ пэ́скири буты́ и кэрэ́ла буты́ пхарэ́с, пака явэ́ла бэльвэ́ль.

²⁴ О, Раё Дэ́вла, кицы́ бут Ту создыян! Ту кэрдя́н лэн сарэ́н барэ́ годыпнаса, а пхув исын пхэрды́ Тырэ́ барвалыпнэнца.

²⁵ Ѓа́да, исын баро́ и буґло́ мо́рё (дэрья́в), пэ дуй рига́, кай исын ра́зна цапня́ (пресмыкаюшчы), со ту на дэ́са ра́да тэ гинэс; ра́зна тыкнэ́ и барэ́ мурдала́,

²⁶ Акэ, па́рмы (корабли) джа́на пир дава́ мо́рё (дэрья́в), и, ґа́да, Левиафано, со Ту создыян, соб (кай) лэ́скэ тэ броинэл одо́й.

²⁷ Сарэ́ ёнэ ужакирэ́на, соб (кай) Ту тэ дэс хабэ́н лэ́нгэ дро пэ́скиро часо (цы́ро):

²⁸ Ту дэ́са лэ́нгэ, ёнэ прилэ́на, ту роскэрэса Пэ́скиро васт и ёнэ ха́на чалэ́с.

²⁹ Ту рисёса лэ́ндыр и ёнэ страхадёна; Ту отлэса лэ́ндыр ду́хо (фа́но), ёнэ мэрэ́на и рисёна кэ пэ́скиро пра́хо.

³⁰ Ту бичхавэса Тыро́ ду́хо (фа́но) и ёнэ создэнапэ, и Ту кэрэ́са адя́кэ, со Ту нэвякирэса джиибэ́н пэ пхув.

³¹ Ра́скирэ-Дэвлэ́скири сла́ва ячэ́лапэ зоралэ́с пэ сарэ́ ве́ки, Рай Дэвэ́л явэ́ла тэ радынэ́лпэ Пэ́скирэ бутендыр.

³² Ёв подыкхэла пэ пхув и ёй издрала, Ёв чилавэ́ла бэ́ргицы и лэ́ндыр тхув джа́ла.

³³ Мэ ява́ва тэ бага́в Ра́скэ-Дэвлэ́скэ саро́ пэ́скиро джиибэ́н; мэ ява́ва тэ бага́в мирэ́ Дэвлэ́скэ, пака мэ сом джидо́.

³⁴ Мэк тэ явэ́н шука́р и лачхэ́ Лэ́скэ мирэ́ ду́мы, мэ ява́ва тэ радынавпэ Лэ́стыр.

³⁵ Мэк тэ хасён грэхи́тка мануша́ пхувья́тыр, мэк тэ на явэ́н буты́р пэ свэ́то чорэ́ манушэ́н. Вышар и парикир Ра́скэ-Дэвлэ́скэ, миро ило́. Аллилуя.