Psalmy 103 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. Славин и парикир Ра́скэ-Дэвлэ́скэ, миро ди, мэк миро ило́ и ду́хо (фа́но) тэ славинэ́н Лэс.

² Славин и парикир Ра́скэ-Дэвлэ́скэ, миро ди, и на бистыр лэ́скиро баро́ лачхипэ́н.

³ Рай Дэвэ́л примангэла саро́ миро чорипэ́н, Ёв высастякирэла сарэ́ мирэ́ дукха́.

⁴ Ёв выракхэла тыро́ джиибэ́н хасибнастыр, Ёв чхудя́ вя́нка (коро́на) пэ ту́тэ лачхипнастыр и лачхэ́-илыткиматыр,

⁵ Ёв дэ́ла дова́, со ту камэ́са, соб (кай) ту тэ дживэ́с сыр тэрно́ о́рло (ки́до).

⁶ Рай Дэвэ́л кэрэ́ла саро́ и сэндякирэ́ла пир чачипэ́н одолэ́н, савэ́ исын притасадэ.

⁷ Ёв сыкадя́ Пэ́скирэ дрома́ Мойза́скэ, Пэ́скирэ кэрибэна Израилёскирэ чхавэ́нгэ.

⁸ Рай Дэвэ́л исын лачхэ́-илэ́скиро и тангинэла сарэ́н, Ёв насыгэс холясо́ла и исын барвало́ тэ сыкавэ́л Лэ́скири лачхэ́-илы́ткима.

⁹ Ёв на сыклякирэ́ла холя́са саро́ часо, Ёв на рикирэ́ла ўса́ды (сак) Лэ́скири холы́.

¹⁰ Ёв на кэрдя́ адя́кэ, соб (кай) амэ тэ явас бангэ́ пал амарэ́ грэ́хи, Ёв на отдыя́ палэ фуипнаса амэ́нгэ пал амаро́ чорипэ́н.

¹¹ Пал-дова́ со сыр вучэ́с исын болыбэ́н пхувья́тыр, ада́кицы-паць бут исын лачхэ́-илы́ткима Дэвлэ́стэ ваш одолэ́нгэ, савэ́ дарэ́на Лэ́стыр.

¹² Ада́кицы дур исын чачэ́ рига́тыр кэ зэ́рво (ле́во) риг пэ пхув, ада́кицы-паць дур ёв чхувэ́ла криг амарэ́ грэ́хи.

¹³ Сыр ада́кицы бут дад тангинэла пэ́скирэ чхаворэ́н, адя́кэ-паць зорало́ Рай Дэвэ́л тангинэла одолэ́н, савэ́ дарэ́на Лэ́стыр.

¹⁴ Пал-дова́ со Ёв джинэ́ла, со́стыр амэ сам создынэ, Ёв рипирэла, со амэ сам фэ́ни (то́ка) пра́хо.

¹⁵ Манушэ́скирэ дывэса́ исын сы́рбы чар, сыр лулуди́ (цвэто), со исын пэ фэ́лда, адя́кэ-паць и ману́ш дживэ́ла:

¹⁶ сы́рбы балва́л, со сы́гэс провурняла и нанэ лэс и нико́н на уджинэла лэ́скиро штэ́то.

¹⁷ Нэ Ра́скирэ-Дэвлэ́скири лачхэ́-илы́ткима исын биконио́скиро (биягоро́скиро) ваш одолэ́нгэ, савэ́ дарэ́на Лэ́стыр, а лэ́скиро чачипэ́н ваш чхавэ́нгирэ чхавэ́нгэ,

¹⁸ ваш одолэ́нгэ, савэ́ рикирэнапэ кэ Лэ́скиро Завето, савэ́ рипирэна и кэрэ́на адя́кэ-паць пир Лэ́скирэ припхэныбэна́.

¹⁹ Рай Дэвэ́л зачхудя троно Пэ́скэ пэ болыбэ́н и лэ́скиро кралипэ́н рикирэ́ла зор пир саро́.

²⁰ Славинэ́н и парикирэ́н Ра́скэ-Дэвлэ́скэ, сарэ́ Лэ́скирэ Янго́лы, савэ́ исын древа́н зоралыпнаскирэ, савэ́ кэрэ́на пир лэ́скиро лав, савэ́ кандэ́на лэ́скиро лав.

²¹ Славинэ́н и парикирэ́н Ра́скэ-Дэвлэ́скэ, сарэ́ Лэ́скирэ болыбна́скирэ Янго́лы, сарэ́ тумэ́, кон дынаринэла Лэ́скэ, кон кэрэ́ла пир Лэ́скири во́ля.

²² Славинэ́н и парикирэ́н Ра́скэ-Дэвлэ́скэ, сарэ́ Лэ́скирэ бутя́, дрэ сарэ́ Лэ́скирэ штэ́ты, кай Ёв рикирэ́ла зор! Славин и парикир Ра́скэ-Дэвлэ́скэ, миро ди.