Psalmy 102 - Библия - Пэ Балтитко Романи чиб (Романэс) 2019

¹ Притасадо Ману́ш мангэлапэ Дэвлэ́скэ, ке́ли лэ́скиро Ду́хо (Фа́но) пхадия и ёв выпхэнэла пэ́скиро Калыпэ́н пэ Ило́ анги́л Растэ-Дэвлэ́стэ.

² О, Раё Дэ́вла, пошун мири́ па́тери (моли́тва), мэк миро ровибэн тэ доджал кэ Ту.

³ На гарадёв ма́ндыр, ке́ли ма́нгэ исын пхаро́; рисёв палэ и шун ракхунэс мирэ́ лава́. Дро дывэ́с, ке́ли мэ прикхарава Тут, сы́гэс вышу́н ман.

⁴ Пал-дова́ со мирэ́ дывэса́ проджа́на (накхэ́на) сыр тхув, и мирэ́ кокалы́ обхачинэ сыр ґлоўні.

⁵ Миро ило́ исын дукхадо и вышутия сыр чар, со мэ аж бистрава тэ хав миро маро́,

⁶ Мирэ́ кокалы́ припынэ кэ мири́ цы́па, пал-дова́, со мэ да́ва ґондя́.

⁷ Мэ сом сыр пеликано пэ чхучэ́ прахи, мэ яцём сыр сова пэ чхучо́ штэ́то

⁸ Мэ сом пашто́ джангадо, Мэ сом сы́рбы чириклы пэ кхэрэ́скири стрэ́ха (чхаки́н).

⁹ Мирэ́ вэ́рги обракирэна ман со дывэ́с, и кодолэ́, савэ́ санапэ холямэс ма́ндыр, прокошэна ман.

¹⁰ Мэ хаём пра́ска сыр маро́, и дова́, со мэ пиём, сыс пхэрдо́ мирэ́ ясвэ́нца.

¹¹ Ту пэ́скирэ холя́тыр и барэ́ холынатыр, ґаздыян ман и чхурдыян дро хма́ро (туча),

¹² Мирэ́ дывэса́ проджа́на (накхэна) сы́рбы зэр (тенё), сави́ хасёла, Мэ вышутиём сы́рбы чар.

¹³ Нэ Ту, Раё Дэ́вла, явэ́са ве́чнэс, и сарэ́ ро́ды рипирэна Тыро́ лав.

¹⁴ Ту уштэса и сыкавэса лачхэ́-илы́ткима пэ Сио́но; пал-дова́ со явдя́ часо тэ явэс тангипнаскиро кэ ёв, пал-дова́ со упхэндло́ часо явдя́.

¹⁵ Тырэ́ писхарье́нгэ ячэ́на дро́га Тырэ́ бара́, и ёнэ жалинэна пра́ска, со яця́пэ форо́стыр.

¹⁶ И машки́р Наюды́тка на́цыи явэ́ла трашаибэ́н анги́л Растэ-Дэвлэ́стэ, и сарэ́ кра́лья пэ пхув явэ́на тэ дарэ́н Лэ́скирэ славатыр.

¹⁷ Ке́ли Рай Дэвэ́л ґаздэ́ла Сио́но, тэды Ёв сыкавэ́ла Пэ́скири сла́ва.

¹⁸ Ёв явэ́ла тэ дэл паты́в бизорья́кирэ манушэ́нгэ, савэ́ мангэ́напэ Лэ́скэ, и Ёв на явэ́ла тэ дыкхэ́л вучипна́стыр, сыр ёнэ мангэ́напэ Лэ́скэ.

¹⁹ Пал дава́ явэ́ла чхиндло́ родо́скэ, со явэ́ла, соб (кай) мануша́, савэ́ бияндёна, тэ славинэ́н Рас-Дэвлэ́с.

²⁰ Пал-дова́ со Ёв дыкхця́ сы́гэс вычипнастыр Пэ́скирэ Свэнтонэ́ Штэто́стыр, Рай Дэвэ́л обдыкхця пхув болыбна́стыр;

²¹ соб (кай) тэ шунэ́л, сыр дэ́ла ґондя́ годла́са одова́, кон исын дро штарибэ́н, соб (кай) Ёв тэ мэкэл пэ во́ля одолэ́ чхавэ́н, савэ́н мэрибэ́н ужакирэ́ла,

²² соб (кай) тэ ракирэ́н сарэ́нгэ пал Ра́скирэ-Дэвлэ́скиро лав пэ Сио́но, соб (кай) тэ шарэ́н Лэс дро Ерусалимо,

²³ ке́ли Наюды́тка на́цыи и кралипэна́ зджанапэ кхэтанэ́, тэ дэн паты́в ёнэ Ра́скэ-Дэвлэ́скэ.

²⁴ Ёв тыкнякирдя мири́ зор дрэ мирэ́ лачхэ́ бэрша́, Ёв кроткэдыр кэрдя́ миро джиибэ́н.

²⁵ Мэ пхэндём: “Миро Дэ́вла! На закэ́дэ ман джиибнастыр акана́, пака мэ на сом пхуро́. О, Раё Дэ́вла! Сарэ́ ро́ды дыкхэ́на, со Ту ве́чнэс дживэса.

²⁶ Ту чхудя́н пхув ґарым-ґара́, Ту создыян болыбэ́н Пэ́скирэ вастэ́нца:

²⁷ ёнэ хасёна, нэ Ту явэ́са, ёнэ сарэ́ ячэ́на пхуранэ́ сыр и́дя, и сыр урибэ́н Ту парувэса лэн, и ёнэ парудёна.

²⁸ Нэ Ту сан Кадасаво́ пэ сарэ́ ве́ки, и Тырэ́ бэрша́ на кончынэнапэ.

²⁹ [р.с.] Тырэ́-манушэ́нгирэ чхавэ́ явэ́на тэ дживэ́н дурэды́р, и Ту зорьякирэса лэ́нгиро ро́до.