Psalmy 101 - Библия - Пэ Балтитко Романи чиб (Романэс) 2019

¹ Давидо́скиро Пса́лмо. Мэ ява́ва тэ бага́в пал лачхэ́-илы́ткима и чачуно́ сэ́ндо: Ту́кэ, Раё Дэ́вла, мэ ява́ва тэ бага́в псалмы.

² Мэ ява́ва тэ рикиравпэ годьварэс кэ бидошакиро джиибэ́н. Ке́ли Ту явэ́са кэ мэ? Мэ ява́ва тэ джива́в дро миро кхэр чачунэ́ илэ́са.

³ Мэ на домэкава, соб (кай) мирэ́ якха́ тэ дыкхэ́н пэ фуипэ́н, со кэрэ́на мануша́; ма́нгэ исын на́ пир ило́ одолэ́ рэ́нды, со кэрэ́на мануша́, ке́ли рисёна криг Дэвлэ́стыр, и ёнэ на приячэна кэ мэ.

⁴ Розмэкно ило́ явэ́ла тэ дурьёл ма́ндыр, мэ на кама́м тэ джина́в чорэ́ манушэ́с.

⁵ Кодолэ́с, кон чораханэ́с чхувэ́ла патарава (плётки) пэ пэ́скирэ пашатунэ́ манушэ́стэ, Мэ хасякирэва. Мэ нашты́ тэ дыкха́в пэ кодолэстэ, саво́ дыкхэ́ла барипнаса пэ явирэндэ и саво́ пхутёла.

⁶ Мирэ́ якха́ явэ́на тэ дыкхэ́н пэ патяибнаскирэндэ, савэ́ исын пэ дая́ пхув, соб (кай) ёнэ могиндлэ́ тэ явэ́н ма́нца дрэ миро кхэр. Кодова́, саво́ дживэ́ла бидошэ́нгиро, одова́ явэ́ла тэ дынаринэ́л ма́нгэ.

⁷ Кон жэ хохавэла (дэ́ла дукха́) манушэ́н, на явэ́ла тэ дживэ́л андрэ́ миро кхэр; ние́кх, саво́ хохавэла, на явэ́ла зорало́ анги́л мирэ́ якха́.

⁸ Тасярлатыр мэ ява́ва тэ хасякира́в фуе́ манушэ́н, савэ́ исын пэ дая́ пхув, соб (кай) ма́нгэ тэ обчхинав дром фуе́ манушэ́нгэ кэ Ра́скирэ-Дэвлэ́скиро фо́ро.