Psalmy 1 - Библия - Пэ Балтитко Романи чиб (Романэс) 2019

¹ Бахтало́ исын одова́ ману́ш, саво́ на псирэ́ла тэ скэдэлпэ надэвлытконэ манушэ́нца, саво́ исын на тэрдо́ пэ дром грэхитконэ́ манушэ́нца, и саво́ исын на бэшто́ дрэ кампания, кай санапэ Дэвлэ́стыр.

² А лэ́скири ра́дыма исын дрэ Дэвлэ́скиро Зако́но и ёв розлэла лэ́скиро Зако́но дывэсэ́ и раты́.

³ И ёв явэ́ла сыр кашт (дрэ́во), со исын чхудо паш панигвалэ рэ́ки (лэня́), саво́ дэ́ла пэ́скири пхабай дро аплодоскиро уляго (пора). Лэ́скирэ патря (листы) ние́кхвар на зашутёна и саро́, со ёв тэ на кэрэ́л, явэ́ла тэ джал бахтяса.

⁴ А чорэ́ мануша́ на адасавэ́ исын сарэ́са. Ёнэ исын сы́рбы чхучо́ пхус, со балва́л рострадэла.

⁵ Палдава́ надэвлытка мануша́ на проджа́на Дэвлэ́скиро Сэ́ндо, а грэхи́тка мануша́ на явэ́на тэ скэдэ́нпэ патяибнытконэ манушэ́нца.

⁶ Пал-дова́ со Дэвэ́л джинэ́ла дром, пир савэ́ чачунэ́ мануша́ псирэ́на, а надэвлытка дрома́ хасёна.