Pritčy 9 - Библия - Пэ Балтитко Романи чиб (Романэс) 2019

Годыпэ́н и Дылныпэ́н

¹ Годыпэ́н чхудя́ пэ́скиро кхэр, ёв вычингирдя пэ́скэ эфта́ (битринэ́нгиро дэш) сты́лбы;

² ёв чхиндя́ пэ́скирэ мурдалэ́н (жывотнонэн), ёв змешындя пэ́скири мол (вино), ёв адя́кэ-паць кэрдя́ пэ́скиро сками́нд (хабэ́н).

³ Годыпэ́н бичхадя́ анги́л пэ́скирэ дынарицэн, ёв кхарэ́ла кэ пэ най вучэдыршонэ штэтэ́ндыр дро фо́ро:

⁴ “Кон исын набарэ́ – годя́киро, рисёв адари́к.” Одолэ́скэ, саво́ бут на ґалёла, годыпэ́н пхэндя́:

⁵ “Явэ́н, хан миро маро́ и пьен мол (вино), сави́ мэ змешындём.

⁶ Мэкэ́н дылныпэ́н, соб (кай) тэ дживэ́н, псирэ́н годьварэ́ дромэ́са.”

⁷ Ману́ш, кон сыкавэ́ла банг явирэ манушэ́скэ, саво́ сыкавэ́ла напатыв кэ яви́р мануша́, прилэ́ла ладжаипэ́н пэ пэ́стэ; кодова́ ману́ш, кон бангякирэла чорэ́ манушэ́с, дорэсэ́ла дош пэ́скэ.

⁸ На сыка́в банг кодолэ́скэ, саво́ сыкавэ́ла напатыв кэ яви́р мануша́, соб (кай) ёв тэ на бидыкхэл тут: сыка́в банг годэ́ манушэ́скэ и ёв явэ́ла тэ сыкавэ́л паты́в ту́кэ.

⁹ Подсыклякир годэ́ манушэ́с, и ёв явэ́ла годэдыр, сыкля́кир чачунэ́ (вортэ) манушэ́с и лэ́стэ явэ́ла бутэды́р джиныбэ́н.

¹⁰ Англэды́р трэй тэ дарэс Ра́стыр-Дэвлэ́стыр, соб (кай) тэ явэс годо́: и джиныбэ́н пал Свэнтонэ́ Растэ-Дэвлэ́стэ, дэ́ла хор розлыибэн (розґалыибэн).

¹¹ Мэ, годыпэ́н Ра́стыр-Дэвлэ́стыр, дава́ буты́р дывэса́ ту́кэ тэ дживэ́с, и дава́ бутэды́р бэрша́ кэ тыро́ джиибэ́н.

¹² Ко́ли ту сан годо́, ту сан годо́ ваш пэ́скэ, ко́ли ту сыкавэса бипатыв кэ мануша́, ту кокоро́ явэ́са тэ тугинэс (тэ пиридживэс) пал дава́.

¹³ Дылынинько джувлы́ нахратэс ракирэ́ла; ёй исын простонэ-годякири, и на джинэ́ла нисо́.

¹⁴ И ёй исын бэшты пашы́л вуда́р ла́кирэ кхэрэ́скиро, ци пэ банко пэ вучэ́ штэ́ты дро фо́ро,

¹⁵ соб (кай) тэ кхарэл кэ пэ одолэ́н, савэ́ джа́на пашы́л, савэ́ джа́на маму́й пэ́скирэ дромэ́са:

¹⁶ Кон исын набарэ́-годя́киро, рисёв адари́к. Кодолэ́скэ, саво́ на́бут ґалёла, ёй ракирэ́ла:

¹⁷ “Чордо пани́ исын гудло́, и маро́, саво́ ха́на чораханэ́с, исын дро́го.”

¹⁸ Нэ кадалэ́ мануша́ на джинэ́на, со мынэ́ мануша́, кон гия́ кэ ёй, со ла́кирэ гости исын хор паштэ́ дро лю́но (адо).