Pritčy 8 - Библия - Пэ Балтитко Романи чиб (Романэс) 2019

Годыпэ́н исын Кучэдыр Сарэ́стыр

¹ Ци годыпэ́н на дэ́ла го́дла зоралэ́с? Ци ґалыибэ́н на ґаздэ́ла пэ́скири зан?

² Годыпэ́н исын тэрдо́ пэ са́мо вучо́ штэ́то пэ вучипэна́, пашы́л дром, пэ трушулытка дрома́.

³ Годыпэ́н дэ́ла го́дла портатыр (вратэндыр), сыр тэ джас андрэ́ дро фо́ро, ке́ли джа́са пирда́л вуда́р:

⁴ “О муршалэ. Мэ кхара́ва тумэн; и мири́ зан (глос) кхарэ́ла тумэн, манушэ́нгирэ чхавэ́:

⁵ Тумэ́, простонэ-годякирэ, сыклён тэ явэ́н барэ́-годякирэ! Тумэ́, дылынинька, сыклён тэ явэ́н годэ́.

⁶ Шунэ́н! Мэ ява́ва тэ ракира́в най фэдэды́р лава́, и мирэ́ ушта́ пхэнэ́на екх чачипэ́н.

⁷ Пал-дова́ со мирэ́-москиро талой (нёбо) пхэнэ́ла патяибэ́н, фуипэ́н исын джунгало́ (брыдко) уштэнгэ.

⁸ Сарэ́ лава́ мирэ́ мо́стыр исын чачипнаскирэ, ни саво́ хохаибэ́н, ци чорипэ́н пэфроми (нарочнэс) нанэ дрэ мирэ́ лава́.

⁹ Лэн простэс тэ ґалён, ёнэ исын чачунэ́ одолэ́нгэ, савэ́ джинэ́на пал дава́.

¹⁰ Шунэ́н, со мэ сыклякирава, саво́ ваш тумэ́нгэ исын фэды́р рупэ́стыр, и выкэдэно джиныбэ́н ваш тумэ́нгэ исын дрогэдыр чикадэ сувнака́стыр.

¹¹ Пал-дова́ со годыпэ́н Дэвлэ́стыр исын фэды́р рубинэндыр, и саро́, со ману́ш камдя́, нашты́ тэ припарувэс (тэ приравнинэс) кэ годыпэ́н.

¹² “Мэ, годыпэ́н Дэвлэ́стыр, джива́ва барэ́ годя́са, ма́ндэ исын джиныбэ́н, соб (кай) хор тэ розлав (тэ розґалёвав).

¹³ Соб (кай) тэ дэс паты́в кэ дар Ра́скэ-Дэвлэ́скэ, трэй древа́н тэ на камэс фуипэ́н, пхутькирибэ́н, и одолэ́н, кон пэс барьякирэ́ла, чорэ́ рэ́нды (де́лы) и, кон пэфроми ракирэ́ла чорипэ́н – мэ древа́н на кама́м.

¹⁴ Мэ да́ва годы́ и чачуно́ годыпэ́н: ма́ндэ исын хор ґалыибэ́н и ма́ндэ исын зор.

¹⁵ Ма́нца кра́лья кралинэна; тхэмэ́скирэ барыдыра́ (вельможы) кэрэ́на чачунэ́ стату́ты (уставы).

¹⁶ Ма́нца тхага́рья рикирэ́на зор, и барэ́ раё, и сарэ́ сэнда́рья пэ пхув.

¹⁷ Мэ кама́м тэ сыкавав паты́в одолэ́нгэ, савэ́ сыкавав паты́в ма́нгэ, и кодолэ́, кон добусовэс родэ́ла ман, ёнэ латхэ́на ман.

¹⁸ Ма́ндэ исын барвалыпэна и паты́в; дро́гима, сави́ на хасёла, чачипэ́н;

¹⁹ ма́ндэ барьякирдо́ (пло́до) исын фэды́р чикадэ рупэ́стыр и ма́ндыр льго́та буты́р чикадэ (выкэдынэ́) рупэ́стыр.

²⁰ Мэ псирава чачунэ́ дромэ́нца, машки́р дроморэ, кай исын чачипэ́н,

²¹ соб (кай) ма́нгэ тэ кэра́в адя́кэ, соб (кай) одолэ́, савэ́ камэ́на ман, тэ дорэсэн мэкно́ миштыпэ́н; соб (кай) мэ тэ пхэрдякирав лэ́нгири пиралы́ (сокровишчница).

²² Рай Дэвэ́л создыя́ ман дро са́мо англыпэ́н, анги́л, сыр Ёв создыя́ саро́ ґарым ґара́.

²³ Мэ, годыпэ́н, со́мас помакхно самонэ векэндыр, англыпна́стыр, анги́л дова́, сыр пхув сыс чхуды́.

²⁴ Ке́ли ишчо (инкэ́) на сыс хор штэ́ты, Мэ лотиём (бияндыём), и ке́ли ишчо (инкэ́) на сыс панескирэ ґанынгорья пхэрдэ́ пане́са:

²⁵ анги́л дова́, сыр бэ́рги сыс зачхудэ, анги́л дова́, сыр сыс бэ́ргицы, мэ ўжэ лотиём (бияндыём);

²⁶ анги́л дова́, сыр Рай Дэвэ́л создыя́ пхув, ци фэ́лды, ци пэ́рва прахитка частыра (частицы) дро свэ́то (лот).

²⁷ Ке́ли Ёв кэрэ́лас болыбэ́н, мэ, годыпэ́н, со́мас одо́й; ке́ли Ёв пролыджия круго упра́л хорэ штэтэ́ндыр:

²⁸ ке́ли Ёв чхудя́ о́блоки упралэстыр, ке́ли Ёв зорьякирдя панескирэ ґанынгорья хорэ штэтэ́ндыр;

²⁹ ке́ли Ёв упхэндя морёскэ кусты́к, соб (кай) паня́ тэ на пиритхадэн лэ́скиро припхэныбэ́н; ке́ли Ёв чхудя́ пхувья́киро фунда́менто;

³⁰ тэ́ньчи мэ, годыпэ́н, со́мас, пашы́л Ра́скирэ-Дэвлэ́скири риг, сыр Лэ́скиро помогибнаскиро дрэ буты́: Ёв радынэласпэ ма́ндыр; мэ со́мас усады (сак) бахтало́ анги́л Лэ́стэ.

³¹ Мэ бахталыём дрэ Лэ́скирэ-пхувья́кири паш, и мэ, годыпэ́н, зоралэ́с радындёмпэ манушэ́нгирэ чхавэ́нца.

³² И акана́, чхавэ́, шунэ́н ман, пал-дова́ со бахталэ́ исын одолэ́, савэ́ джа́на пир мирэ́ дрома́:

³³ шунэ́н, со мэ сыклякирава, и явэ́н годэ́ и на вычхурдэн илэ́стыр мирэ́ лава́.

³⁴ Бахтало́ исын одова́ ману́ш, саво́ кандэ́ла ман; саво́ дыкхэ́ла цямкэс со дывэ́с пашы́л мири́ по́рта; саво́ ужакирэ́ла пашы́л вудара́.

³⁵ Ману́ш, саво́ латхэ́ла ман – годыпэ́н, латхэ́ла джиибэ́н и Рай Дэвэ́л явэ́ла тэ бахтякирэ́л лэс;

³⁶ нэ ману́ш, кон бистрэла пал ма́ндэ, кодова́ кэрэ́ла чорипэ́н пэ́скирэ дескэ; сарэ́, конэ́скэ мэ на сом пир ило́, сы́рбы ужакирэ́на мэрибэ́н.