Pritčy 7 - Библия - Пэ Балтитко Романи чиб (Романэс) 2019

¹ Ми́ро чха́ва! Ри́пир мирэ́ лава́, и ракх лэн дрэ годы́ сыр барвалыпэ́н мирэ́ припхэныбэна́.

² Рикирпэ кэ мирэ́ припхэныбэна́ и ракх дрэ годы́ миро зако́но сыр лялька (зрачко) дрэ якх.

³ Припхандэ лэн кэ тырэ́ ангушта (пальцы), чхин лэн пэ ило́ сыр пэ таблицы.

⁴ Пхэн годыпнаскэ: “Ту сан мири́ пхэн, и кхар годы́ сыр тыри́ са́мо фэды́р сэмэ́нца:

⁵ соб (кай) ёнэ тэ ракхэ́н тут чужонэ́ джувлятыр, одолятыр, сави́ притырдэла кэ пэ гудлэ́ лавэ́нца.

Фуй Джувлы́

⁶ Ѓа́да, екх мо́ло мэ дыкха́вас пир ришотка (краты) дрэ фэнштра мирэ́ кхэрэ́скири;

⁷ ґа́да, мэ машки́р балвалитконэ манушэ́ндэ, роздыкхцём тэрнэ́ манушэ́ндэ, тэрнэ́ манушорэс набарэ́ годя́са,

⁸ саво́ пириджалас вули́ца (га́са) пашы́л вэнгло, кай дживэлас екх джувлы́. И ёв гия́ дроморэса кэ ла́киро кхэр,

⁹ дрэ пацёмки, бэльвэле́, калэ́ и цямлэ ратяса.

¹⁰ И, акэ, ада́я джувлы́ пирилыя лэс; ёй сыс уриды сыр биладжакуны джувлы́ фрэнтонэ илэ́са.

¹¹ Ёй зоралэ́с ракирдя́ и кэрдя́, со ёй камдя́. Ла́кирэ ґэра́ на ячэнаспэ кхэрэ́.

¹² Екх мо́ло ёй сыс яври́, яви́р мо́ло ёй сыс пэ штэ́то, кай мануша́ скэдэнаспэ, ужакири чораханэ́с пашы́л кажно вэнгло.

¹³ И ёй ухтылдя кадалэ́ тэрнэ́ манушорэс и чамудя лэс; ёй пхэндя́ лэ́скэ биладжаипнытконэ мо́са:

¹⁴ “Ма́ндэ исын свэ́нта яныбэна́ тэ парикирас Дэвлэ́скэ, ададывэ́с мэ дыём пэ́скирэ совлаха́ Дэвлэ́скэ.

¹⁵ Палдава́ мэ явдём тэ пирилав тут, мэ добусовэс (старательнэс) родыём тыро́ муй и мэ латхём тут.

¹⁶ Мэ прикэдыём миро чхуибэ́н парингэнца (коврэнца), цвятнонэ цэргэнца Египто́скирэ ґандлэстыр (лёностыр).

¹⁷ Мэ почхудём (подушындём) миро чхуибэ́н миро́са, алоёса, корицаса.

¹⁸ Яв, ява́са тэ камас екх екхэ́с бут кэ тасярла (кэ зло́ко), ява́са тэ бахталёвас камибнаса чалэ́с.

¹⁹ Миро ром исын на кхэрэ́, ёв традыя́ дро баро́ дром.

²⁰ Ёв лыя́ муенгиро (кошэлько) ловэнца пэ́са, ёв явэ́ла палэ дро дывэ́с, сыр явэ́ла пхэрдо́ чхон.

²¹ Ёй утырдэлас дро грэ́хо (бизо) лэс пэ́скирэ лавэ́нца адя́кэ, со ёв поддыяпэ, ёй хоханэ́, гудлэ́ лавэ́нца притырдыя лэс.

²² Екха́тыр (сра́зу) ёв гия́ пал ла́тэ, сыр гурув, саво́ джа́ла пэ пэ́скиро чхиныбэ́н, ци сыр дылыно́, соб (кай) лэс пхарэ́с тэ сыклякирэ́н пэ заньдир [ці сыр аленё, соб (кай) тэ дэн карье лэс-р.с.];

²³ анги́л, сыр марибны́тко буст (стрела) промарэла пир лэ́скиро кало́ буко (печонка). Дава́ ману́ш исын сы́рбы чириклоро, со сы́гэс прастала дрэ фэлы́ (петля). Ёв на джинэ́ла, со саро́ дава́ хасякирэ́ла лэс.

²⁴ Палдава́, чхавалэ, шунэ́н ман, рискирэ́н ило́ кэ лава́, со мэ пхэна́ва:

²⁵ на домэкэн, соб (кай) кадая́ джувлы́ тэ рискирэ́л кэ пэ тумаро́ ило́, соб (кай) тумэ́ тэ джа́н ла́кирэ дроморэнца:

²⁶ бут мануша́ дукхандынэ пал ла́тэ, и сарэ́, савэ́ исын мулякирдэ́, сыс зоралэ́ мануша́.

²⁷ Ла́киро кхэр лыджа́ла кэ лю́но (адо), лэ́стыр джа́на тэлэ́ кэ мэрибнаскирэ штэ́ты.