Pritčy 6 - Библия - Пэ Балтитко Романи чиб (Романэс) 2019

Ко́фо Годыпнастыр

¹ Ми́ро чха́во! Ко́ли ту яця́н сы́рбы сымады́ (залого) / порэнчындянпэ пал тырэ́ малэстэ (другостэ), ци ко́ли ту мардян пир васта́ совлахаса пал чужонэ́ манушэ́стэ,

² тэды ту пыян дрэ фэлы́ пэ́скирэ лавэ́ндыр, тырэ́-москирэ лава́ ухтылдэ́ тут.

³ Акэ, миро чхаво́, сыр тэ вытэрдэс пэс, ко́ли ту пыян дрэ пэ́скирэ малэскирэ васта́: джа́ и пэр кэ лэ́скирэ ґэра́ (бандёв тэлэ́), манг зоралэ́с тэ мэкэл тут тыро́ мал.

⁴ Мэк тэ на совэн тырэ́ якха́, и мэк тэ на дэн линдра (на дреминэн) тырэ́ цымблы (ресницы).

⁵ Зра́кх пэс сыр газэль карэдынитконэ́скирэ (охотнико́скирэ) вастэ́стыр, и сыр чириклы манушэ́скирэ вастэ́стыр, саво́ ухтылэ́ла (старэла) чириклэн.

⁶ Джа́ кэ кири (мурашка), ту кирнэ-масэ́нгиро, придыкхпэ, сыр и со ёй кэрэ́ла, яв годо́:

⁷ кирьятэ нанэ ни рас, ни дыкхибнаскирэс, ни барыдырэ́с,

⁸ нэ ёй кэрэ́ла запасы лынаскиро, и ёй кэдэла хабэ́н, ке́ли счхиныбэн джа́ла.

⁹ Кицы́ ту явэ́са тэ пасёс, кирнэ-масэ́нгиро! Ке́ли ту уштэса соибнастыр?

¹⁰ Ко́ли на́бут совэса, на́бут дэ́са линдра, на́бут буты́р счхувэса васта́ тэ откхинён,

¹¹ тэды тыро́ чорипэ́н явэ́ла сыр розмарибнаскиро, саво́ лодэла и явэ́ла тыри́ трэ́бима сыр марибнаскиро ману́ш.

¹² Фрэнто (хартытко) манушоро исын фуй ману́ш, саво́ псирэ́ла розмэкнэ мо́са,

¹³ Ёв марэла (миргинэла) пэ́скирэ якхэ́нца, ёв сы́рбы ракирэ́ла пэ́скирэ ґэрэ́нца, ёв сыкавэ́ла пэ́скирэ ангуштэнца (пальцэнца).

¹⁴ Лэ́скири годы́ исын розмэкны, ёв усады (сак) придуминэла чорипэ́н, ёв кэрэ́ла адя́кэ, соб (кай) мануша́ тэ чингардэнпэ.

¹⁵ Палдава́ екха́тыр лэ́скэ явэ́ла бари би́да: екха́тыр ёв явэ́ла дукхадо би драбакирибнаскиро.

¹⁶ Акэ, исын шов чачипэна́, со Рай Дэвэ́л древа́н на камэ́ла; ґа́да, эфта́ (битринэ́нгиро дэш) чачипэна́, савэ́ исын джунгалэ́ Лэ́скэ:

¹⁷ пхутькирдэ́ якха́, хоханы чиб и васта́, со прочхувэна бибангипнаскиро рат;

¹⁸ годы́, сави́ придуминэла фуй рэ́нды; ґэра́, савэ́ сы́гэс праста́на кэ чорипэ́н;

¹⁹ начачуно дудвало /якхи́тко (свидетелё), саво́ хохавэла, и ману́ш, кон подхачкирэла холы́ машки́р пшалэ́ндэ.

²⁰ Миро чхаво́! Рикирпэ зоралэ́с кэ тырэ́-дадэ́скиро припхэныбэ́н, на мэк дова́, ваш со дай сыклякирэ́ла тут:

²¹ припхандэ лэн кэ тыро́ ило́ пэ ўса́ды (сак), и пхандэ лэн трусця́л мэн.

²² Ке́ли ту джа́са вари-карик, лэ́нгирэ лава́ явэ́на тэ лыджа́н тут; и ёнэ явэ́на тэ ракхэ́н тут, ке́ли ту явэ́са суто́; ке́ли ту джангадёса (прошнинэсапэ), ёнэ явэ́на тэ ракирэ́н ту́кэ, со тэ кэрэ́с.

²³ Пал-дова́ со дадэ́нгиро припхэныбэ́н исын момолы́тко (свети́льнико), и лэ́нгиро сыклякирибэ́н исын дуд. Ко́ли ёнэ сыклякирэ́на дукханэс тут, дава́ екх исын ваш дова́, со трэй дро джиибэ́н:

²⁴ тэ ракхэ́л тут криг фуе́ джувлятыр, чужонэ́-джувлякирэ хоханэ́ чибатыр.

²⁵ На традэпэ пал ла́киро шукарипэ́н, на домэк, соб (кай) ёй тэ затырдэл тут ла́кирэ цымблэнца (ресницэнца).

²⁶ Пал-дова́ со биладжакуны джувлы́ пэ́скирэ биладжаипнаса чорьякирэла манушэ́с кэ лабо маро́, а джувлы́, сави́ кэрэ́ла биладжаипэ́н, сы́рбы чорьёла пэ лэ́скиро дро́го джиибэ́н.

²⁷ Ци могинэ́ла ману́ш тэ чхувэ́л яг пал пэ́скири брэк и, соб (кай) лэ́скирэ и́ди тэ на прохачон?

²⁸ Ци могинэ́ла ману́ш тэ джал пир хачкирдэ́ вангара и, соб (кай) лэ́скирэ ґэра́ тэ на обхачон?

²⁹ Дова́-паць исын кодолэ́ манушэ́са, саво́ псирэ́ла кэ пэ́скирэ-пашатунэскири ромны́: ко́ли вари-кон чилавэ́ла (чэпинэла) ла, кодова́ на ячэ́лапэ бибангипнаскиро (на явэ́ла на банго́).

³⁰ Мануша́ на примангэна чорэскэ, ко́ли ёв чорэла, соб (кай) тэ явэ́л чало, ке́ли ёв бокхалёла:

³¹ нэ ко́ли латхэ́на лэс, тэньці ёв явэ́ла банго́ тэ дэл палэ эфта́ мо́лы бутэды́р; лэ́скэ приявэлапэ тэ отдэ́л саро́ лэ́скирэ кхэрэ́стыр.

³² Кодолэстэ, кон кэрэ́ла биладжаипэ́н явирэ джувля́са, исын на́бут годы́. Ко́ли ману́ш кэрэ́ла дава́, ёв сы́рбы хасякирэ́ла кокоро́ пэс.

³³ Ёв дорэсэ́ла даба (марибэ́н) и бипатыв (ладжакирибэн), и лэ́скиро обракирибэн ячэ́лапэ пэ лэ́стэ.

³⁴ Пал-дова́ со зэвлыныпэ́н выкхарэла ла́кирэ-ромэскиро холякирибэ́н, и ёв на явэ́ла тэ тангинэ́л (тэ жалинэл) дро дывэ́с, сыр явэ́ла тэ дукхавэл палэ.

³⁵ Ёв на прилэ́ла ни саво́ выкиныбэ́н, ёв на явэ́ла штыл, мэк ту и дэ́са лэ́скэ бут да́ры.