Pritčy 4 - Библия - Пэ Балтитко Романи чиб (Романэс) 2019

Дадэ́скиро Упхэныбэ́н

¹ Шунэ́н, тумэ́ чхава́лэ, сыр дад сыклякирэ́ла тумэн и рискирэ́н годы́, соб (кай) хор и буґлэс тэ ґалён.

² Дова́, со мэ сыклякирава тумэн, исын лачхипэ́н: на мэк миро зако́но (сыклякирибэ́н).

³ Ке́ли мэ, Соломо́но, со́мас мирэ́ дадэ́скиро, (Давидо́скиро) чхаво́, дро́го и екхоро анги́л мирэ́ да́кирэ якха́,

⁴ то миро дад адя́кэ-паць сыклякирдя́ ман и пхэндя́ ма́нгэ: “Мэк тыро́ ило́ тэ рипирэл мирэ́ лава́: ри́кирпэ кэ мирэ́ припхэныбэна́ и джив.

⁵ Сыклёв тэ явэс годэдыр, сыклёв хор и буглэс тэ ґалёс, на бистыр дава́, на рисёв криг мирэ́ лавэ́ндыр, со мэ ракира́ва.

⁶ На мэк годыпэ́н, и ёв явэ́ла тэ ракхэ́л тут; рикир сыр дро́гима лэс и годыпэ́н явэ́ла тэ дыкхэ́л ракхибны́ткэс пал ту́тэ.

⁷ Годыпэ́н исын баро́ рэ́ндо, сыклёв тэ явэс годэдыр, и сыклёв тэ ґалёс саро́, со ту́тэ исын.

⁸ Дэ бари чол (тими́н) годыпнаскэ и ёв ґаздэ́ла тут: годыпэ́н янэ́ла паты́в, сыр ту прилэса илэ́са лэс.

⁹ Годыпэ́н чхувэ́ла пэ тыро́ шэро́ бахталыпнаскири шука́р вя́нка, янэ́ла патывакири коро́на ту́кэ.”

¹⁰ Шун, миро чхаво́, прилэ́ мирэ́ лава́, и ту явэ́са тэ дживэ́с бут бэрш.

¹¹ Мэ сыклякирдём тут годэ́ дромэскэ, мэ лыджиём тут чачунэ́ дроморэнца.

¹² Сыр ту джа́са, тырэ́ ґэра́ на явэ́на тэ штавэн пхарипнаса; и, ке́ли ту прастаса, то ту на явэ́са тэ обштавэспэ.

¹³ Рикирпэ зоралэ́с кэ чачуно́ сыклякирибэ́н, на бистыр пал лэ́стэ: ракх лэс, пал-дова́ со дава́ сыклякирибэ́н исын тыро́ джиибэ́н.

¹⁴ На тэрдёв пэ дроморо, кай исын бидэвлэскирэ; на псир чорэ́-манушэ́нгирэ дромэ́са:

¹⁵ ри́кирпэ ригаса, на лодэ далэ́ дроморэса, рисёв криг лэ́стыр и джа́ маму́й.

¹⁶ Пал-дова́ со соибэн на лэ́ла фуе́ манушэ́н, анги́л, сыр ёнэ тэ кэрэ́н чорипэ́н, и лэ́нгиро суно́ джа́ла криг лэ́ндыр анги́л, сыр ёнэ тэ кэрэ́н адя́кэ, соб (кай) вари-кон тэ пэрэ́л (тэ хасёл).

¹⁷ И ёнэ ха́на маро́ фуе́ рэндэ́ндыр, ёнэ пьена мол (вино), со дорэснэ́ нахратэс (зорья́са).

¹⁸ Нэ чачунэ́-манушэ́нгиро дром исын сы́рбы дуд (свэ́то), со зяинэла, саво́ свэнцынэла и зяинэла яркэдыр анги́л парно́ дывэ́с.

¹⁹ Нэ дром фуе́-манушэ́нгиро исын сы́рбы цямлыпэ́н; ёнэ на джинэ́на, пир со ёнэ обштавэнапэ.

²⁰ Ми́ро чхаво́! Прилэ́ илэ́са дова́, со мэ пхэна́ва; причху́в тыро́ кан (пришунпэ) кэ мирэ́ лава́.

²¹ Мэк ёнэ тэ на джа́н криг тырэ́ якхэ́ндыр, ракх лэн машкира́л тыро́ ило́.

²² Пал-дова́ со ёнэ исын сы́рбы джиибэ́н кодолэ́нгэ, кон латхэ́ла лэн и састыпэн сарэ́ лэ́нгирэ масэнгэ (лочакэ).

²³ Ракх пэ́скиро ило́ бутэды́р сарэ́стыр, со исын дро́го ту́кэ. Пал-дова́ со лэ́стыр тхадэ́ла ґаны́нг, сави́ дэ́ла джиибэ́н.

²⁴ Ри́скир пэ́стыр хоханы чиб, и ушта́, со исын фрэнта.

²⁵ Мэк тырэ́ якха́ тэ дыкхэ́н маму́й, мэк тырэ́ цымблы (ресницы) тэ дыкхэ́н маму́й анги́л ту́тэ.

²⁶ Продумин миштэ́с, карик тыри́ ґэро́й джа́ла (лыджа́ла), мэк сарэ́ тырэ́ дрома́ тэ лыджа́н тут би дара́киро.

²⁷ На ри́скир (на рисёв) ні пэ чачи́ (право) ні пэ зэ́рво (ле́во) риг; лэ (отлыджа) криг тыри́ ґэро́й чорипна́стыр.