Pritčy 31 - Библия - Пэ Балтитко Романи чиб (Романэс) 2019

¹ Крали́скирэ-Лемуилоскирэ лава́. Упхэныбэ́н, савэ́са лэ́скири дай сыклякирдя́ лэс:

² Со, мро чха́ва? Со чха́ва, саво́ сан мирэ́ лочовя́тыр? Со чхаво́, мирэ́ совлахатыр?

³ На отдэ́ сарэ́са тыри́ зор джувленгэ, ци на отдэ́ пэс одолэ́скэ, со хасякирдя́ кралье́н.

⁴ Дава́ исын на ваш кральенгэ, о Лемуило, дава́ исын на ваш кральенгэ тэ пьен мол, ци тхэмэ́скирэ барыдырэ́нгэ тэ пхучэ́н: “Кай исын зорало́ пибэ́н?”:

⁵ соб (кай) ёнэ тэ на матён, и соб (кай) ёнэ тэ на бистрэн пал зако́но, и соб (кай) ёнэ тэ на рискирэ́н чачипэ́н одолэ́ндыр, савэ́н притасавэ́на.

⁶ Дэ зорало́ пибэ́н кодолэ́скэ, кон исын хасибны́тко, и мол кодолэ́скэ, савэ́скэ исын кирко пэ ило́:

⁷ мэк ёв тэ пьел, и тэ бистрэл пал пэ́скиро чорорипэн, мэк ёв тэ на рипирэл буты́р пал пэ́скири бари би́да.

⁸ Ра́кир пал манушэ́ндэ, савэ́ на ракирэ́на, и пал рэ́ндо одолэнгиро, савэ́н мэкнэ́.

⁹ Ра́кир пал одолэ́ндэ, савэ́н притасавэ́на, и пал богэ́ндэ; сэндякир лэн пир чачипэ́н и рисёв кэ лэ́нгиро чачипэ́н.

Лачхи́ Джувлы́

¹⁰ Кон латхэ́ла бидошэнгирья (лачхэ́-илыткона) джувля́? Ла́киро кучипэ́н исын дрогэдыр рубинэндыр.

¹¹ Ла́кирэ-ромэскиро ило́ явэ́ла тэ патял дрэ ла́тэ би дара́киро; и лэ́стэ на явэ́ла наухтылыбэн (на́доси) ни дро со.

¹² Ёй кэрэ́ла лачхипэ́н лэ́скэ, а на биба́хт, дрэ ла́кирэ джиибна́скирэ сарэ́ дывэса́.

¹³ Ёй родэ́ла [дорэсэ́ла-р.с.] пошом (шэрсь) и ґандладо (лёно), и ёй кэрэ́ла буты́ илэ́стыр пэ́скирэ вастэ́нца.

¹⁴ Ёй исын сы́рбы тылгарискирэ па́рмы (корабли): ёй янэ́ла пэ́скиро хабэ́н дурипнастыр.

¹⁵ И ёй уштэ́ла, ке́ли ишчо (инкэ́) рат исын, и ёй дэ́ла тэ хан пэ́скирэ кхэратунэнгэ, и дывэсы́тко буты́ пэ́скирэ дынарицэнгэ.

¹⁶ Ёй думинэ́ла пал фэ́лда и кинэла ла; ёй меркинэла тэ кинэл винагра́днико пал ко́фо, со яндлэ́ ла́кирэ васта́.

¹⁷ Ла́тэ исын бари зор, и ёй пхарэ́с кэрэ́ла буты́ вастэ́нца.

¹⁸ Ёй ґалёла анги́л, со ла́киро рэ́ндо исын лачхо́, и со ла́киро момолы́тко на мурдёла раты́.

¹⁹ Ёй протырдэла васта́ кэ прялка (катлы́), и ла́кирэ васта́ рикирэ́на кхувитко рота.

²⁰ Ёй подэла пэ́скиро васт чорорэнгэ, и ёй тырдэла пэ́скирэ васта́ кэ бо́ги.

²¹ Ёй на дарэ́ла ивэстыр пал пэ́скири сэмя (ири), пал-дова́ со сари́ ла́кири сэмя уриды дрэ таты и́дя.

²² Ёй кэрэ́ла пэ́скэ цэрги пэ чхуибэ́н; ёй урьелапэ дро куч тхан (матер΄яло) и дро пурпуро.

²³ Ла́кирэ ромэс джинэ́на пашы́л форитко по́рта, ке́ли ёв исын бэшто́ машки́р годэпхурэндэ пэ доя́ пхув.

²⁴ Ёй кэрэ́ла цэрги (покрывалы) и бикнэла лэн, и ёй дорэсэ́ла барэ́ кустыка тылгарьенгэ (купцэнгэ) Финикиякирэнгэ.

²⁵ Ёй сы́рбы исын уриды дро зоралыпэ́н и паты́в; ёй радынэ́лапэ дывэсэ́стыр, со явэ́ла анги́л.

²⁶ Ёй ракирэ́ла годэс, и ла́кири чиб дэ́ла лачхо́ годыпэ́н.

²⁷ Ёй дыкхэ́ла пал пэ́скири сэмя (ири), и ёй на ха́ла маро́, со ёй на закэрдя.

²⁸ Ла́кирэ чхавэ́ шарэна и бахталякирэна ла; адя́кэ-паць и ла́киро ром, кон шарэла ла.

²⁹ Бут джувля́ кэрэ́на адя́кэ, нэ ту сан фэды́р сарэ́ндыр.

³⁰ Гожыма хохавэла и шукарипэ́н исын пэ мэнта (минута), нэ джувля́, сави́ дарэ́ла Ра́стыр-Дэвлэ́стыр, явэ́на тэ шарэ́н.

³¹ Дэн ла́кэ дова́, со ёй исын мол пал ла́кирэ васта́; и мэк ла́кирэ бутя́ тэ шарэ́н ла пашы́л по́рта (вра́ты)!