Pritčy 29 - Библия - Пэ Балтитко Романи чиб (Романэс) 2019

¹ Ману́ш, саво́ пхарьякирэла (жэсточынэла) пэ́скири мэн, на дыкхи́ пэ дова́, со лэ́скэ бут мо́лы сыкавэ́на лэ́скири банг, екха́тыр (сра́зу) хасёла, и на явэ́ла састякирибэн лэ́скэ.

² Ке́ли чачунэ́ мануша́ рикирэ́на зор дро кралипэ́н, то мануша́ зоралэ́с радынэ́напэ; нэ ке́ли фуй ману́ш кралинэла, то тэды мануша́ ровэна.

³ Конэ́скэ трэй годыпэ́н, кодолэскиро дад, радынэ́лапэ, нэ кон исын дро́го мал налачхэ́ джувленгэ, кодова́ нашавэла пэ́скиро миштыпэ́н.

⁴ Кра́ли рикирэ́ла зор пэ пхув чачунэ́ сэндоса, нэ кон лэ́ла мыты (взятки), кодолэ́с пэ́скири пхув равэла тэлэ́.

⁵ Кон шарэла на илэ́стыр пэ́скирэ пашатунэс, кодова́ росчхувэла фэлы́ лэ́скирэ ґэрэнгэ.

⁶ Бибахтало́ ману́ш пэрэ́ла дрэ фэлы́ пэ́скирэ чорэ́ рэндэ́ндыр; нэ чачуно́ ману́ш явэ́ла тэ радынэ́лпэ.

⁷ Чачуно́ ману́ш роскэдэла (розлэла) чорорэ́-манушэ́нгиро рэ́ндо, нэ фуй ману́ш на ґалёла дава́.

⁸ Ману́ш, кон салапэ нахратэс, сы́рбы пхандэла фо́ро фэляса, нэ годэ́ мануша́ рискирэна холы́ дрэ риг [биладжаипнытка мануша́ ґаздэ́на бу́нто дро фо́ро, а годьварэ́ штылякирэна бу́нто-р.с.].

⁹ Ке́ли годо́ ману́ш исын проти дылынэстэ пир рэ́ндо, ци дылыно́ салапэ, ци холясо́ла усае́кх нанэ рама́нё (миро).

¹⁰ Мануша́, савэ́ исын ґалка (жадна) тэ прочхувэн явирэскиро рат, лэ́нгэ зоралэ́с на пир ило́ бидошэнгирэ мануша́, нэ чачипнытка (праведна) мануша́ пэкэнапэ (заботисона) пал адасавэ́ манушэ́ндэ.

¹¹ Дылыно́ выпхэнэла сари́ холы́, со лэ́стэ исын пэ годы́; нэ годо́ ману́ш пририкирэла ла дрэ пэ́стэ.

¹² Ко́ли тхэмэскиро барыдыро́ рискирэ́ла ило́ (шунэ́ла) кэ хохаибэ́н, тэды сарэ́ дына́рья ячэ́на хоханэ́ лэ́стэ.

¹³ Чороро́ ману́ш и лэ́скиро притасаибнаскиро подджана екх пэ екхэ́стэ дро екх: Рай Дэвэ́л дэ́ла дуд (свэ́то) якхэнгэ дуенгэ.

¹⁴ Крали́скиро троно, кон сэндякирэ́ла чорорэн пир чачипэ́н, явэ́ла ўса́ды (сак) тэ рикирэ́л зор.

¹⁵ Ко́ли чхаворэс сыклякирэ́на пхарэ́с и раняса (розгаса), тэды ёв ячэ́лапэ годэдыр. Нэ ко́ли чхаворо́ мэкно́ кокоро́ пэ́скэ, то ёв ладжакирэла пэ́скирэ да.

¹⁶ Ке́ли фуй мануша́ явэ́на уса́ буты́р и буты́р, тэды фуипэ́н барьёла, нэ чачунэ́ мануша́ явэ́на тэ дыкхэ́н, сыр ёнэ пэрэ́на.

¹⁷ Сыкля́кир кэ дукха́ чхавэ́с, и ёв дэ́ла ту́кэ откхиныбэн, и ёв обрадынэла тыро́ ди.

¹⁸ Кай нанэ сыкадыипэн упралэстыр, одо́й мануша́ на обрикирэна пэс, нэ бахтало́ исын одова́, кон рикирэ́лапэ кэ Зако́но.

¹⁹ Ту на высыклякирэса писхари́с пал доша (промэкибэна) лавэ́нца, мэк ёв и ґалёла, нэ усае́кх ёв на явэ́ла тэ кандэл.

²⁰ Ци дыкхця́н ту манушэ́с, саво́ сы́гэс выпхэнэла лава́? Буты́р лачхипэ́н сашты́ тэ ужакирэс дылынэстыр, сыр кадасавэ́ манушэ́стыр.

²¹ Кон бучынэла (пестинэла) пэ́скирэ дынари́с тыкнал, тэ́ньчи кадасаво́ писха́ри закамэ́ла тэ лыджа́л пэс сыр чхаво́.

²² Холямо́ ману́ш выкхарэла (залыджала) кошыбэ́н, и холынакиро ману́ш кэрэ́ла бут чорэ́ рэ́нды (грэ́хо).

²³ Кон пхутёла, кодова́ пэрэ́ла тэлэ́, нэ напхутькирдо дро ду́хо (фа́но) ману́ш дорэсэ́ла паты́в.

²⁴ Кон исын кхэтанэ́ чорэса, одова́ ману́ш сы́рбы зоралэ́с исын на пир ило́ кокоро́ пэ́скэ: ёв шунэ́ла сыр прокошэна лэс, нэ ёв на сыкавэ́ла лэс.

²⁵ Кон дарэ́ла манушэ́ндыр, кодова́ сы́рбы чхувэ́ла фэлы́ пэ́скэ, нэ кон зоралэ́с патя́ла дрэ Растэ-Дэвлэ́стэ, одова́ явэ́ла бидаракиро.

²⁶ Бут мануша́ родэ́на, соб (кай) тэ явэ́н куч тхэмэ́скирэ барыдырэ́са, нэ кажно ману́ш дорэсэ́ла чачипэ́н Ра́стыр-Дэвлэ́стыр.

²⁷ Чачунэ́ мануша́ джа́на криг (брыдинэна) начачунэ манушэ́ндыр, нэ дэвлы́тка мануша́ рикирнапэ дрэ риг фуе́ манушэ́ндыр.