Pritčy 27 - Библия - Пэ Балтитко Романи чиб (Романэс) 2019

¹ На шарпэ атасятунэ дывэсэса, пал-дова́ со ту на джинэ́са, со дывэ́с янэ́ла ту́кэ.

² Мэк яви́р ману́ш тэ шарэл тут, а на тыро́ муй; мэк тэ явэ́л чу́жо ману́ш, а на тырэ́ ушта́.

³ Бар исын пхаро́ и пра́хо исын пхаровато, нэ ке́ли дылыно́ зоралэ́с холясо́ла, дава́ исын пхарэдыр дуендыр.

⁴ Баро́ холякирибэ́н исын биманушытко, и холы́ исын трашаны, нэ кон сашты́ (могинэ́ла) тэ тэрдёл проти баро́ зэвлыныпэ́н?

⁵ Тэ сыкавэс банг манушэ́скэ анги́л якха́ исын фэды́р, сыр тэ сыкавэс паты́в чораханэ́с.

⁶ Даба́ (пэкаибэна) патяибнытконэ малэстыр (другостыр) исын фэды́р вэргоскирэ чамудыпнастыр.

⁷ Чало ди на дыкхэ́ла и пэ авги́н, нэ бокхалэ́ дескэ кажно кирко котэ́р исын гудло́.

⁸ Сыр чириклы, сави́ лодэла пэ́скирэ гнязда́тыр (куфо́стыр), адя́кэ-паць исын и ману́ш, саво́ лодэла пэ́скирэ штэто́стыр.

⁹ Макхибэн (мазилки) и гудло́ тхувлякирибэн (куриныбэн) зоралэ́с радынэна ило́, и гудло́ исын кажно мал, кон дэ́ла годы́ илэ́стыр.

¹⁰ На мэк пэ́скирэ малэс, ци тырэ́-дадэ́скирэ малэс; на джа́ кэ тырэ́-пшалэскиро кхэр дро дывэ́с, ке́ли ту́тэ исын бари би́да. Фэды́р исын пашатуно, кон исын пашылэды́р кэ ту, сыр пшал, саво́ исын дур.

¹¹ Мро чха́ва! Яв годо́ и радын миро ило́, соб (кай) ма́нгэ сашты́ тэ явэ́л тэ отпхэнав кодолэ́скэ, саво́ обракирэла ман.

¹² Барэ́-годя́киро ману́ш дыкхэ́ла анги́л биба́хт (би́да), и гарадёла, а балвалитко ману́ш джа́ла дурэды́р и дорэсэ́ла ка́ра.

¹³ Лэ и́дя кодолэстыр, саво́ яця́н якхитконэса (поручителёса) пал чужонэ́ манушэ́стэ; и рикир ла сыр сымады́, ке́ли ёв исын якхи́тко пал явирэ джувля́тэ рига́тыр.

¹⁴ Кон ґаздэ́ла шариндой пэ́скирэ малэс зоралэ́ заня́са (глосаса) тася́рлэс (ра́нэс) пэ зло́ко (пэ ра́нко), дава́ могинэ́ла тэ загинэлпэ сыр прокошыбэ́н лэ́скэ.

¹⁵ Пани, со ўса́ды (сак) пэрэ́ла дро брышындытко дывэ́с, и джувлы́, кон усады (сак) чингардэлапэ, исын шэра́ (ра́внэс):

¹⁶ кон сучхакирэла ла; одова́ сы́рбы обрикирэла балва́л, и сы́рбы лэ́скиро чачо́ васт рикирэ́ла оливи́тко дзэт (елеё).

¹⁷ Састы́р востринэла састы́р, адя́кэ-паць ману́ш востринэла лачхипэ́н пэ́скирэ малэстэ.

¹⁸ Кон ракхэ́ла инжыритко кашт (смоковница), кодова́ явэ́ла тэ хал лэ́скири пхабай; адя́кэ-паць, кон приракхэла пэ́скирэ хула́с, одова́ явэ́ла дрэ паты́в.

¹⁹ Сыр дро пани́ муй сыкавэ́ла, саво́ ёв исын; адя́кэ-паць и манушэ́скиро ило́ сыкавэ́ла, саво́ ману́ш исын.

²⁰ Лю́но (адо) и Аввадоно (мулыкано штэ́то) ние́кхвар нанэ пхэрдэ́, адя́кэ-паць и манушэ́скирэ якха́ ние́кхвар нанэ чалэ.

²¹ Дрэ кака́ви (котло) билавэна руп, а дро бов сувнака́й, нэ, саво́ ману́ш исын, сыкавэ́ла мавлы́н (малва), сави́ пхэнэ́на яви́р мануша́.

²² Мэк ту тэ тоўчынэс (тэ курэс) дылынэс дрэ ступа тоўкачоса, нэ усае́кх лэ́скиро дылныпэ́н на дурьёла лэ́стыр,

²³ Дыкх кучэс пал пэ́скиро бакрэнгиро гурто, и придыкх миштэ́с пал пэ́скири кхэри́тко стада:

²⁴ пал-дова́ со барвалыпэ́н нанэ пэ сарэ́ ве́ки, и, крали́тко стадык (коро́на) жа на ячэ́лапэ пэ сарэ́ ро́ды?

²⁵ Кхас укэдэна криг и ялы́ (свя́жо) чар сыкадёла, и бэргитка зэлэна чарья́ скэдэ́на.

²⁶ Бакрэ́ исын ту́кэ ваш урибэ́н, и бузнэ (козлы) исын ваш ту́кэ, соб (кай) тэ дэн ловэ́ пэ фэлдакири тими́н;

²⁷ ту́кэ явэ́ла тэ ухтылэл (тэ явэ́л до́си) бузнытко (козлытко) тхуд ваш тыро́ хабэ́н, ваш хабэ́н тырэ́ кхэритконэнгэ, и тэ чалякирэн тырэ́ дынарицэн.