Pritčy 26 - Библия - Пэ Балтитко Романи чиб (Романэс) 2019

¹ Сыр ив лынаскиро, и сыр брышы́нд, ке́ли чхинэна гив, адя́кэ-паць на подджа́ла тэ кэрэ́с паты́в дылынэ́ манушэ́скэ.

² Сыр чириклы, сави́ вурняла одори́к и палэ и сыр бахирка (ласточка), сави́ вурняла, и сави́ на бэшэ́ла, адя́кэ-паць и бипричынакиро прокошыбэ́н на рисёла дро чачипэ́н.

³ Чхупны трэй грэскэ, а швар (узда) трэй ослоскэ, и ран (рандь) трэй ваш дылынэскиро думо.

⁴ На отпхэн дылынэскэ пир лэ́скиро дылныпэ́н, соб (кай) ту тэ на явэс дасаво, сыр ёв исын.

⁵ Отпхэн дылынэскэ пир лэ́скиро дылныпэ́н, соб (кай) ёв тэ на явэ́л годо́ дрэ пэ́скирэ якха́.

⁶ Кон бичхавэ́ла дылынэ́ манушэ́с тэ пиридэл зан (звесь), одова́ сы́рбы подчхинэла ґэра́ пэ́скэ и кэрэ́ла биба́хт (налачхипэн).

⁷ Сы́рбы ґэра́ лангалэ манушэ́скэ, савэ́ на псирэ́на маму́й (роўнэс), адя́кэ-паць исын годопхэныбэн дро дылынинэскиро муй.

⁸ Тэ кэрэ́с паты́в дылынэскэ, исын дова́-паць сыр тэ пхандэс куч бар дрэ марибны́тко раґатка.

⁹ Годопхэныбэн дрэ дылынэскирэ ушта́ исын дова́-паць, сыр пхусадытко хру́сто (терно) дрэ матымарискирэ ушта́.

¹⁰ Рай [зорало́ ману́ш-р.с.] кэрэ́ла пир пэ́скири годы́ и лэ́ла пэ буты́ дуе́н: и дылынэс, и сваконэ манушэ́с, саво́ джа́ла пашы́л. Баро́ Дэвэ́л, Саво́ создыя́ саро́, дэ́ла дуенгэ мазу́ри (награда): и дылынэскэ и одолэ́скэ, кон кэрэ́ла фуипэ́н.

¹¹ Сыр джукэл рисёла кэ пэ́скирэ чхадыпэн, адя́кэ-паць и дылыно́ кэрэ́ла нэвэ́стыр пэ́скиро дылныпэ́н.

¹² Ци дыкхця́н ту манушэ́с, саво́ гинэ́ла пэс годэ́ манушэ́са? Дылыниньконэ манушэ́стыр буты́р сашты́ тэ ужакирэс лачхипэ́н, сыр кадасавэ́ манушэ́стыр.

¹³ Кирнэ-масэ́нгиро ману́ш ракирэ́ла: “Холынакиро шчэр (ле́во) исын пэ дром. Мижэх шчэр исын пэ вули́цы (га́сы).”

¹⁴ Сыр вуда́р рисёла пэ пэ́скирэ завесы (зачхудэ), адя́кэ-паць и кирнэ-масэ́нгиро рисёла пэ пэ́скиро чхуибэ́н.

¹⁵ Кирнэ-масэ́нгиро ману́ш чхувэ́ла пэ́скиро васт дро чаро́, нэ лэ́скэ исын пхаро́ тэ лыджас палэ васт кэ пэ́скиро муй.

¹⁶ Кирнэ-масэ́нгиро ману́ш думинэ́ла пэ́скэ, со ёв исын годэдыр эфта́ (битринэ́нгиро дэш) манушэ́ндыр, савэ́ отпхэнэна барэ́ годыпнаса.

¹⁷ Кон чхувэ́ла пэ́скиро накх дрэ чу́жо чинга́рд, одова́ исын сы́рбы ману́ш, саво́ ухтылэ́ла джуклэс пал кана́.

¹⁸ Сы́рбы бигодякиро ману́ш, кон чхурдэ́ла яг (ягунэ глоўни), марибны́тка бустя́ (стре́лы) и мэрибэ́н,

¹⁹ исын адасаво́ ману́ш, саво́ хохавэла пэ́скирэ пашатунэс, и ракирэ́ла: “Мэ фэ́ни (то́ка) кэра́ва пэраса (шутки).”

²⁰ Кай буты́р кашта́ нанэ, одо́й яг мурдёла; и кай нанэ ману́ш, саво́ исын би-патывакиро кэ яви́р, кошыбэ́н пириячэ́ла (штылёла).

²¹ Сыр вангар чхувэ́на дрэ яг тэ хачол, и кашта́ ваш яг, адя́кэ-паць исын чингардуно ману́ш, кон росхачкирэла кошыбэ́н.

²² Лава́, савэ́ ракирэ́ла ману́ш, саво́ ґундяринэла, исын сы́рбы бонбоны (присмаки), и ёнэ джа́на хор андрэ́ маса́.

²³ Ѓалка исын ушта́, и фуй ило́ исын сы́рбы кхоро́ (сасудо), савэ́ исын шукарьякирдэ туфтонэ (хоханэ́) рупэ́са.

²⁴ Одова́, кон бидыкхэла (зоралэ́с на камэ́ла) явирэ манушэ́с сы́рбы гаравэла дава́ пэ́скирэ уштэ́нца, адасаво́ ману́ш счхувэла фрэнтыма (мэндрима) дро пэ́скиро ило́:

²⁵ ке́ли ёв ракирэ́ла лачхэ́ заня́са (глосаса), нэ ту на патя, пал-дова́ со исын эфта́ (битринэ́нгиро дэш) налачхэ́ мысли дро лэ́скиро ило́.

²⁶ Мэк лэ́скири зоралы́ намилыма исын учхакирды лэ́скирэ фрэнтымаса, нэ лэ́скиро фуипэ́н сыкадёла анги́л саро́ скэдыибэ́н.

²⁷ Кон ґанавэла ґанби́н (яма), одова́ кокоро́ пэрэ́ла дрэ ла́тэ, и кон катынэла упрэ́ бар, пэ одолэ́стэ бар рисёла палэ.

²⁸ Хоханы чиб зоралэ́с на выкэдэ́ла одолэ́н, савэ́н ёв дукхавэла, и начачуно муй кэрэ́ла фуипэ́н.