Pritčy 25 - Библия - Пэ Балтитко Романи чиб (Романэс) 2019

¹ Адалэ́ исын адя́кэ-паць Соломоно́скирэ притчы, савэ́ зачхиндлэ́ Езэкияскирэ мануша́. Езэки́я сыс кра́ли пир Юдэ́я.

² Дава́ исын барипэ́н Дэвлэ́скэ тэ гаравэл дова́ рэ́ндо, со на трэй тэ джинэ́н манушэ́нгэ; нэ барипэ́н кральенгиро исын дрэ дова́, соб (кай) тэ розґалёл саро́ пал дава́ рэ́ндо.

³ Сыр болыбэ́н дро вучыпэн, и хор исын пхув, адя́кэ-паць и крали́скиро ило́ нашты́ тэ розґалёс.

⁴ Лэ криг туфта рупэ́стыр, и лэ́стыр выджа́ла кхоро́ (сасудо), со явэ́ла лачхо́ рупунарискэ (рупэскирэ мастероскэ).

⁵ Лэ криг фуе́ манушэ́н крали́стыр, и лэ́скиро троно явэ́ла тэ рикирэлпэ чачипна́са.

⁶ На сыка́в пэс барэ́ манушэ́са анги́л кралье́ндэ, и на тэрдёв пэ штэ́то, саво́ исын ваш барэ́ манушэ́нгэ;

⁷ пал-дова́ со исын фэды́р, ке́ли пхэнэ́на ту́кэ: “Яв вучэды́р адари́к,” сыр тут чхувэ́на тэлэды́р анги́л крали́скирэ барыдырэндэ, конэ́с тырэ́ якха́ дыкхнэ́.

⁸ На джа́ сы́гэс пэ сэ́ндо, пал-дова́ со ту на джинэ́са, со явэ́ла дро ко́нцо (дро яго́ро), ке́ли тыро́ пашатуно ладжакирэла тут.

⁹ Пириракир тыро́ рэ́ндо тырэ́ пашатунэса кокорэса, и на выпхэн чораханыбэн явирэскэ,

¹⁰ соб (кай) одова́, кон шунэ́ла лэс, тэ на сыкавэ́л сарэ́нгэ тыри́ ладж, и мавлы́н (малва) пал ту́тэ тэ на явэ́л бэдытко (налачхи).

¹¹ Лав, со пхэндло́ кэ штэ́то, исын сы́рбы сувнакунэ́ пхаба́ дрэ рупэскирэ кхорэ́ (сасу́ды).

¹² Лав, савэ́са годо́ ману́ш сыкавэ́ла банг одолэ́скэ, кон кандэ́ла лэс, исын сы́рбы сувнакуны́ чэн и гожакирибэн выкэдынэ́ сувнака́стыр.

¹³ Сыр шылыпэн ивэса дро часо (цы́ро), ке́ли укэдэна гив, исын адя́кэ-паць патяибнаскиро бичхадо́ ману́ш ваш одолэ́нгэ, савэ́ бичхадэ́ лэс; пал-дова́ со ёв сы́рбы панякирэла ди пэ́скирэ ра́скиро.

¹⁴ Сыр о́блоки и балва́л исын бибрышындэскирэ, адя́кэ-паць исын одова́, саво́ шарэлапэ, со ёв дэ́ла хохано́ да́ро.

¹⁵ Кон длу́гэс (ґара́) вырикирэ́ла, одова́ сашты́ тэ патякирэл барыдырэ́с, и ковлы чиб пхагирэ́ла кокалы́.

¹⁶ Ци латхян (ластян) ту авги́н (мэда)? На ада́кицы, кицы́ ту́кэ трэй, соб (кай) ту тэ на пирихас, и тэ на чхадэс.

¹⁷ На псир бут мо́лы кэ тыро́ пашатуно кхэрэ́, соб (кай) ёв тэ на кхинёл ту́тыр, и, соб (кай) ёв тэ на лэл древа́н тэ на камэл тут.

¹⁸ Ману́ш, саво́ допхэнэ́ла хохаибэ́н пэ пэ́скирэ пашатунэстэ, исын сы́рбы кило, курта́ла и марибны́тко буст (стрела).

¹⁹ Зоралэ́с тэ патяс дрэ напатяибнытконэ манушэ́стэ исын сы́рбы на́лачхо данд ци лангалы ґэро́й.

²⁰ Тэ багас гиля́ смэнтнонэ илэскэ исын сы́рбы тэ лэс криг лэ́стыр и́дя, ци тэ чхувэ́с шут (уксусо) пэ даб (рана).

²¹ Ко́ли тыро́ вэ́рго исын бокхало, дэ лэ́скэ маро́ тэ хал; ци ко́ли ёв камэ́ла тэ пьел, дэ лэ́скэ пани́ тэ пьел:

²² палдава́, кэри дава́, ту кэдэса хачкирдэ́ вангара пэ лэ́скиро шэро́ и Рай Дэвэ́л отдэ́ла мазу́ри (награда) пал дова́, со ту са́нас лачхо́ кэ вэ́рго.

²³ Паш-ратякири (шылалэ-ригакири) балва́л лыджа́ла кэ брышы́нд, и бэдытко (чораханы) чиб лыджа́ла кэ холямо́ муй.

²⁴ Фэды́р исын тэ дживэ́с пэ кунто пэ кхэрэ́скири стрэ́ха (чхаки́н), сыр тэ явэс кхэтанэ́ джувля́са, сави́ чингардэлапэ.

²⁵ Сыр шылало пани́ ваш ди, савэ́стэ сыс труш (смэга), адя́кэ-паць исын лачхи́ зан (звесь) дуратунэ́ тхэмэстыр.

²⁶ Чачуно́ ману́ш, саво́ пэрэ́ла анги́л фуе́ манушэ́ндэ, исын сыр мэлалы ґанынгори, и блатуны ґаны́нг.

²⁷ Дава́ исын намишто тэ хас бут авги́н, адя́кэ-паць и барипэ́н, со ману́ш кокоро́ родэ́ла пэ́скэ, нанэ барипэ́н.

²⁸ Кон на рикирэ́ла зор пэ пэ́скиро ду́хо (фа́но), одова́ исын сы́рбы фо́ро, со исын пхагирдо́ тэлэ́, и саво́ исын би вантэнгиро.